Rut reakʼ kạhini 2 - সান্তালী বাইবেল

Rut ar Boas

¹ Jãwãe secʼte Naomiren do mitʼṭen manotan kisạ̃ṛ peṛae tahẽkana. Uni do Elimelek bõsren hoṛe tahẽkana. Ar uniyakʼ ńutum do tahẽkana Boas.

² Mitʼ din Rut do Naomiye metadea, “Ạliń do cetʼ khette senkate hulạkʼ liń halaṅ ạguiya? Ar okoe ạlińreye dayakʼte onae halaṅ ocowạliń uni tayomrege liń tahena.” Naomi do uniye metadea, “Hẽ bạhu, ma calakʼ ben.”

³ Unre Rut doe oḍokena ar khetre senkate phosol gegetʼko tayom tayomte hulạkʼ halaṅe dhurạuena; ar uni okare hulạkʼe halaṅetʼ kan tahẽkan ona do Elimelek bõsren Boasakʼ khetge tahẽkana.

⁴ Unre Boas do Bethlehem khone hecʼena ar phosol gegetʼkan tahẽkan hoṛkoe metatʼkoa, “Probhu Isor ape sãore baṛeye tahenma.” Onko hõ uniko men ruạṛadea, “Probhu Isor hõ ame bhoram ma.”

⁵ Ar Boas do phosol gegetʼ kạmikoe ńel todarotetʼ tahẽkan gutiye kulikedea, “Uni juạn kuṛi doe okoe kana?”

⁶ Uni ńel todarotetʼ tahẽkan guti doe roṛ ruạṛkeda, “Moab disạm khon Naomi sãote okoe maejiue hecʼakan uni kangeae nui do.

⁷ Uni doe metadiń tahẽkana, phosol gegetʼko tayomte ạṭi tala reakʼ hulạkʼko dayakate halaṅ ocoạńme. Ar uni do setakʼ khon ńit hạbicʼ nonḍege menaea; eken thoṛa ghạṛicʼ sate latarreye jirạulena.”

⁸ Unre Boas do Rute metadea, “E mại, ańjomme. Am do niạ khetrege hulạkʼ halaṅme ar nonḍe ińren kạmiyạ kuṛiko sãote tahenme.

⁹ Ar jumi reakʼ oka aṛere phosol gedokʼkan ona ńelkate kạmiyạ kuṛiko tayom tayomte onḍe calakʼme. Iń do hoṛkoń men akatʼkoa jemon am aloko ạṛisme. Ińren hoṛ okoe do dakʼko lolokan, tetaṅlem khan am do onḍe senkate dakʼ ńũime baṛe.”

¹⁰ Noa katha ańjomkate Rut do ombakʼkate uni ḍobokʼ adeteye menkeda, “Dayate nunạkʼem moneyạń kan, noa do cekate hoyena? Iń doń porjạtren hoṛ kan coṅ.”

¹¹ Boase roṛ ruạṛkeda, “Amren jãwãe gocʼ tayom hanharme lạgitʼ okam ceka akatʼ ona sanamakʼgeń ańjom akada, ar noa hõń ańjom akada, amren go-baba ar janam jaega bạgikate bin baḍae mitʼṭen jạtrenko talare tahen lạgitʼem hecʼakana.

¹² Onate Probhu Isor do ame bhoram kana. Ar Israelkoren Probhu Isor, okoeyakʼ phạ̃kṛạ̃kʼ latarre asray ńam lạgitʼem hecʼakan, uni do jemon amakʼ bakhratam purạteye emkatam.”

¹³ Unre Rute menkeda, “E ińren kisạ̃ṛ, am do daya mẽtʼtem ńeleń kana. Ar amren kạ̃ṛmĩ ṭhen noa udgạu reakʼ katham roṛketʼte am do jiwi raṛecʼem emadińạ, ente iń do amren kạmiyạ kuṛiko sãote teṅgokʼ lekgeń baṅkana.”

¹⁴ Ado jojom okte hoyen khan Boas do uniye metadea, “Nonḍe hijukʼte piṭhạ hataome ar sirkạre topokate jomme.” Unre Rut do phosol gegetʼkan hoṛko ṭhen senkateye duṛupʼen khan Boas do thoṛa ata anaje emadea. Ar Rut do lacʼ bikʼe jomketʼ tayom hõ thoṛa sarecʼ tahẽyena.

¹⁵ Ona tayom Rut do hulạkʼ halaṅe beretʼen khan Boas do acʼren hoṛkoe metatʼkoa, “Ạṭiko reakʼ tala khon hulạkʼe halaṅlere hõ uni do alope egerea.

¹⁶ Bickom phosol gegetʼ jokhecʼ thoṛa dope hulạkʼ oṭokakʼa ar onape halaṅ ocoaea, ar alope dhomkaoea.”

¹⁷ Rut do ạyupʼ hạbicʼ ona khetre hulạkʼe halaṅkeda. Ar halaṅakʼkoe gum saphaketʼ khan ona jao do gel irạl keji hoyena.

¹⁸ Ar onako hataokate atoteye ruạṛ calaoena. Ar tinạkʼ hulạkʼe halaṅketʼ ona do acʼren hanhartetʼe ńelkeda. Ar lacʼ bi jom tayom sarecʼ okae dohoakatʼ tahẽkan ona oḍok kate hanhartetʼe emadea.

¹⁹ Naomi do uniye kulikedea, “Teheń do bạhu okare ben halaṅkeda, ar okare ben kạmikeda? Abene talasakatʼ ben Isor do uniye bhoraema.” Unre Rut okoeyakʼ khetreye halaṅletʼ ona do hanhartetʼe lạiyadea. Uniye menkeda, “Okoeyakʼ khetreń halaṅketʼ uniyakʼ ńutum do Boasaea.”

²⁰ Niạ katha ańjomkate Naomi do acʼren kimintetʼe metadea, “Probhu Isor, okoe do jiwetʼko se gocʼko acʼakʼ daya khon bae bad akatʼko unigeye bhoraema.” Uni do arhõe menkeda, “Uni do aboren sor peṛa kangeae. Okoe peṛa cetanre ińren jãwãeakʼ sanamakʼ chaḍaokʼ reakʼ ar rukhiyạ reakʼ ạidạri menakʼtae uni do onko modren mitʼ hoṛ kanae.”

²¹ Rute menkeda, “Uni do arhõe men akadińạ acʼakʼ sanamakʼ phosol ạuri getʼ cabakʼ hạbicʼ jemon uniren hoṛko sãoteń tahen.”

²² Unre Naomi do acʼren kimintetʼe metadea, “E bạhu, eṭakʼ jãhãnakʼ khetre jemon okoe hõ aloko ạṛis ben onate uniren kạmiyạ kuṛiko sãote tahenge aben lạgitʼ bhagea.”

²³ Ar onate jao ar guhum ạuri getʼ cabakʼ hạbicʼ Rut do Boasren kạmiyạ kuṛiko sãote tahẽkate hulạkʼe halaṅkeda. Ar acʼren hanhartetʼ sãoteye tahẽyena.