Romiko lạgitʼ Pạul Apostolakʼ ciṭhi 9 - সান্তালী বাইবেল

^1-2 Mạsi tulucʼ mitʼakanteń meneda, iń do ontorre ạḍi duk ar ạḍi kosṭoń ńameda, ar noa do sạri katha kana, eṛe do baṅa. Ińakʼ bibek hõ sonot Jiure jopoṛao tahẽkate inạ mitʼ gohageye emeda.

³ Ińren boehako bodolte, metakʼme iń jạtren hoṛko bodolte hoydaṛeakʼ khan iń apnarge Mạsi ṭhen khon pharakokʼ reakʼ sarapiń hataokea.

⁴ Onko ma Israel jạtren hoṛ kanako. Isor do hopon hoyokʼ reakʼ ạidạriye em akawatʼkoa, uni do acʼakʼ ṭhonoke udukʼ akawatʼkoa, onko lạgitʼ bondobose dohoakada, ạn-ạrikoe emakada, acʼ sewawae reakʼ ponthae emakana ar ạḍi utạr gokʼakʼ hõe gokʼ akawatʼkoa.

⁵ Isorren maraṅ sekʼwako do onkoren hapṛamgeko tahẽkana ar manwa lekate Mạsi do onko bõsregeye janamlena. Uni kangeae Isor do, one uni sanamakʼko cetanre menae; jaejug hạbicʼ uniyakʼge sarhao hoyokʼtae ma. Amen.

⁶ Isorakʼ katha je eṛeteakʼ hoyakan ona do baṅa, ente okoe Israel jạtrenko talareye janam akan onko sanamkoge khạṭi Israel doko baṅkana.

⁷ Onko doko Abrahamren bõskanre hõ uniren sạriyakʼren hopon doko baṅkana, bickom sonot sostor reakʼ katha leka, “Isạhakren bõskoge amren bõs menteko lekhakʼa.”

⁸ Metakʼme, Israel jạtreko janam akanre hõ Isorren gidrạ doko baṅkana, menkhan Isorakʼ gokʼakʼ lekate okoekoakʼ janam hoyakan, onkoge Abrahamren bõs menteko lekhakʼa.

⁹ Ona gokʼakʼ do noage, “Ṭhik oktereń ruạṛ hijukʼa ar Sararen do mitʼṭen koṛa gidrại hoyokʼtaea.”

¹⁰ Eken ona do baṅ, Rebekaren jawa gidrạ hõ uni mitʼ herel hoṛren gidrạge kin tahẽkana.

^11-12 Uni herel hoṛ doe tahẽkana aboren hapṛam Isạhakge. Unkin gidrạ ạurikin janamokʼrege ar boge bạṛicʼ ạurikin kạmirege Isor do Rebekae metade tahẽkana, “Maraṅicʼ do huḍińicʼren gutiye hoyokʼa.” Noate Isor doe udukʼletʼ tahẽkana, acʼakʼ monejoṅakʼ purạu lạgitʼgeye bachao joṅa; ar jãhãn kạmi iạte do bae onkaea bickom acʼakʼ kusilekage hoṛkoe hohowakoa.

¹³ Onate sonot sostorre ol menakʼa, “Jakob doń dulạṛkedea, menkhan Esau do bạń moneyadea.”

¹⁴ Enḍekhan cetʼ bon menkea Isor doe behoketʼ kana? Ekaltege baṅa. Uni do Moseye metade tahẽkana,

¹⁵ “Okoe hoṛiń dayawae unigeń dayawaea; ar okoe hoṛiń mãyãwae unigeń mãyãwaea.”

¹⁶ Enḍekhan noa do okoeyakʼ kurumuṭu se sana lekate hõ baṅ hoyokʼ kana, eken Isorakʼ daya cetanrege ṭehãḍokʼ kana.

¹⁷ Sonot sostorre Isor do Pharao noa kathae metade tahẽkana, “Amiń raj akatʼmea jemon am hotete ińakʼ daṛeń udug ar goṭa dhạrtire jemon ińakʼ ńutum lại pasnaokʼ.”

¹⁸ Onate Isor do acʼakʼ kusi leka okoeye daya akokan onkogeye daya akokana ar okoe keṭejeye menjoṅkan uni doe keṭecʼ edekana.

Isorakʼ daya

¹⁹ Hoedaṛeakʼa ape modre jãhãepe mitạńa, “Cedakʼ enḍekhan ńit hõe dusi kana? Ar jãhãege cetʼ uniyakʼ monejoṅakʼreye teṅgo daram daṛeakʼa?”

²⁰ Enḍekhaniń menkea, E manwa; am dom celekante Isor upạrtem roṛ ruạṛetʼkana? Jãhãe hoṛ mitʼṭecʼ jinise benao khan, enḍekhan ona benaoakʼ jinis do cetʼ uniye kuli daṛekea, “Cedakʼ nonka dom benaokedińa?”

²¹ Kuṅkạl do inạ hasa ḍhimbạ khonge mitʼ bhajan do manotakʼ lạgitʼ ar eṭagakʼ do bemanotakʼ lạgitʼ benao reakʼ ektiạri do cetʼ bạnukʼtaea?

²² Ṭhik onkage Isor do acʼakʼ edre ar daṛe udug lạgitʼe monejoṅkan tahẽkana; enrehõ okoe hoṛko upạrte acʼakʼ edre sodore menletʼ, onkoakʼ do ạḍi soborikateye sahaoketʼtakoa. Ente onko hoṛkoakʼ kuṛại do moron tahẽkana.

²³ Arhõ uni do acʼakʼ bin mucạtʼ ṭhonok reakʼ katha hõ baḍae ocokoe menletʼ tahẽkana. Okoe uniyakʼ dayako ńamakatʼ onko do laha khongeye tear akatʼko tahẽkana acʼakʼ ṭhonok ńam lạgitʼ.

²⁴ Abo kangea bon ona dayaren hoṛ do. Uni do Jihudiko mod khon eken abo eskar do bae hohoakatʼ bona, menkhan boṅgan hoṛ jạtrenko mod khon hõe hohoakatʼkoa.

²⁵ Ente Hosea nạbi puthire Isore menakada, “Okoe ińrenko baṅkan, onkoge ińren hoṛ menteń hohowakoa. Ar okoe bạń dulạṛakade, uni do dulạṛiạ menteń hohoaea.

²⁶ Oka jaegare onkoko men ocolen; ‘ape do ińren hoṛpe baṅkana,’ onḍege onko do jiwetʼ Isorren hopon menteko hoho ocokʼa.”

²⁷ Jesaea nạbi hõ Israelko reaṅe roṛleda, “Israel hoponko reakʼ lekha do jalapuri reakʼ gitil unạkʼlenre hõ eken sarecʼkoge bańcaoko ńama.

²⁸ Probhu Isor do ạḍi usạrage dhạrti reakʼ kuṛại do purạteye emkataea.”

²⁹ Jesaea do arhõe roṛleda, “Sanam daṛeanicʼ Probhu Isor do bõsko aloe sarecʼ abon khan enḍekhan Sodom ar Gomora nagraha leka bon hoykokʼa.”

Israel jạtrenko ar bhage sombat

³⁰ Enḍekhan noa katha bon mena je, boṅgan hoṛ jạtrenko do Isorakʼ dhorom khudạu bako kurumuṭuletʼre hõ pạtiạu hotetege onko do Isorren dhoromko menteko lekha ocoyena.

³¹ Menkhan Israelko do ạn-ạri hotete Isorakʼ dhoromko khudạuletʼ tahẽkana, menkhan bako hoedaṛeada.

³² Cedakʼ bako daṛeada? Ente onko do biswạsre ṭehãḍ baṅkate kạmire ṭehãḍ akanko tahẽkana. Okaṭakʼ dhirire hoṛko tohodokʼ onarege onko hõko tohotʼlena.

³³ Noa reaṅ sonot sostorre olakana, Ńelpe, Sionre tohotʼakʼ dhiri ar tạkicʼakʼ cạṭạniń dohoyeda, unire pạtiạuicʼ do baṅgeye lajao ocokʼa.