Romiko lạgitʼ Pạul Apostolakʼ ciṭhi 7 - সান্তালী বাইবেল

Bapla khon sikhạuna

¹ E boehako ape ma ạn-ạrikope baḍaege. Ape do cetʼ bape baḍaea, manwa jiwetʼ tahen bhorge ạn do uni cetanreye mạlikokʼ kana mente?

² Jãwãetetʼ tinạkʼ din jiwetʼe tahen, unạkʼ din bạhu hõ ạn-tạrire tolgeye tahenkana. Menkhan jãwãetetʼe gocʼlen khan ona ạn-tạri reakʼ tonol khon bạhu doe sạdhin ocokʼa.

³ Onate jãwãetetʼ jiwetʼ tahenrege eṭakʼ herel ṭhene jãwãelen khan enḍekhan uni do laṭghaṭicʼ menteye bikạukʼa. Menkhan jãwãetetʼe gocʼlen khan uni do ona ạn-tạri reakʼ tonol khone sạdhingea. Unre eṭakʼ jãhãe ṭhene jãwãelenre hõ uni do loṭghoṭiyicʼ bae hoyokʼa.

⁴ Ṭhik onkage E ińren boehako, Mạsiyakʼ hoṛmo secʼte ar Moseyakʼ ạn-ạri lekate ape hõpe gocʼena. Onate ape do okoe gocʼko khone jiwetʼ beretʼ ocoakan uni Jisu Mạsiren hoṛpe hoyakana, jemon apeakʼ jion do Isor lạgitʼ jo baha daṛeakʼ.

⁵ Kại gobolre bon tahẽkanre ạn-ạriko do abo talare kại reakʼ laloce rakapʼ ocoyetʼ tahẽkana ar ona lalocge aboakʼ hoṛmoreye kạmikan tahẽkana; onate aboakʼ jionre moron lạgitʼ bon jokʼ kan tahẽkana.

⁶ Unre abo okaṭakʼko tol akawatʼ bon tahẽkan onarege bon gocʼlena. Onate ńitokʼ do ạn khon bon sạdhingea. Ona iạte abo do olakʼ ạn-ạri reaṅ ona sedaeakʼ jion horren golam dobon baṅkana, menkhan sonot Jiu emakʼ nãwã jion horren golam bon hoyakana.

Ạn-ạri ar kại

⁷ Enḍekhan cetʼbon mena, ạn do bạṛicʼgea? Khạṭige baṅa; bickom noa katha do ṭhikgea je, ạnko baṅ tahẽlen khan kại do cetʼkana mente ohoń baḍae daṛelea. “Alom lalocakʼa,” Ạn-ạrire noa katha baṅ lạilen khan laloc do cetʼkana mente ona hõ ohogeń baḍae daṛelea.

⁸ Menkhan kại do hukum reakʼ ạte ńamketʼte ińre joto lekan laloce omon ocokeda, ente ạnko baṅ tahẽlen khan kại do gocʼge tahẽkokʼa.

⁹ Ińakʼ jionre ạnko hijukʼ lahare iń do jiwetʼgeń tahẽkana, menkhan hukum hijukʼ são sãote kại hõ jiwetʼ ruạṛena.

¹⁰ Ar iń hõń gocʼena. Okaṭakʼ hukum iạte jion ńam reakʼ katha, ona do iń lạgitʼ gujukʼe ạgukeda,

¹¹ ente ona hukum reakʼ ạt iạte kại doe bulạukedińa, ar ona hukum hotetege kại doe gocʼkedińạ.

¹² Noa katha do khạṭigea je, ạn do sonotgea ar ona reakʼ hukum hõ sonot, dhorom ar bhagegea.

¹³ Enḍekhan okaṭakʼ bhạlạiyakʼ kan ona hotete cetʼ iń doń gocʼena? Tisge baṅa, bickom bhạlạiyakʼ hotetege kại do ińakʼ gujukʼe hoyocokeda, jemon kại do kại kana mente oromokʼ. Ar kại je tinạkʼ bạṛicʼakʼ kan ona do hukum hotetege bujhạukʼ kana.

Manwawakʼ bar leka colon

¹⁴ Baḍaegea bon ạn do Jiu reaṅ kana, menkhan iń doń kại gobolren kante kạiren golamiń hoyakana.

¹⁵ Iń okaṭakʼ iń kạmikan ona do iń nijạge bạń bujhạueda, ente okaṭakʼ cekayiń menetʼkan ona do bạń onkayeda bickom okakoń hirkhạwakʼ kan onakogeń onkayeda.

¹⁶ Okaṭakʼ bạń khojkan, onageń kạmikan khan iń do noań aṅgocetʼ kana je, ạnko do bhagegea.

¹⁷ Enḍekhan ńelokʼ kana apnarte noako do bạń kạmikana, menkhan ińre oka kại bolo akan unige onakoe kạmi ocoyediń kana.

¹⁸ Ińiń baḍaea ińre, metakʼme ińakʼ jel reakʼ sanare bhage mente do cetʼge bạnukʼa. Ar okaṭakʼ sạrige bhageakʼ kan ona kạmi reakʼ sana do menakʼgea menkhan daṛe do bạnukʼtińa.

¹⁹ Okako bhage kạmi sanańkan ona do bạń kạmiyeda, bickom ona bodolte oka bạń khojkan onako bạṛicʼ kạmigeń kạmiyeda.

²⁰ Okaṭakʼ kạmi bạń menjoṅkan, onageń kạmikan khan apnarte ona do bạń kạmiyeda, bickom ińreye berel akan kạige ona doe kạmi ocoyediń kana.

²¹ Enḍekhan ińre mitʼṭecʼ niạm kạmikaniń ńel ńameda. Ona niạm do noage okaṭakʼ bhageakʼ tinre kạmiń menjoṅ unre bạṛicʼakʼ do jao ghuṛi ińre tahenkana.

²² Ińakʼ ontor do Isorakʼ ạn-ạrikoteye rạskạkʼ kana;

²³ enrehõ iń doń ńel ńameda je, mitʼṭecʼ eṭakʼ lekan niạm do ińakʼ hoṛmoreye kạmikana. Oka bhageakʼkan ińakʼ mon do onage bhageakʼ menteye ataṅeda, menkhan noa eṭakʼ niạm do ińakʼ mon upạrteye lạṛhại kana, are gobol akadińạ. Ińre oka kại menakʼ noage ona reakʼ niạm do.

²⁴ Hae iń dukhạliạ hoṛ do! Ińre noa kại, one oka do gujukʼe ạguiyetʼ, ona khon okoeye rukhiyạyińạ?

²⁵ Aboren Probhu Jisu Mạsi hotete iń do Isor iń sarhao edekana je, uni do ińe rukhiyạ akadińạ. Enḍekhan ńelokʼ kana, mon secʼte iń do Isorakʼ ạnren golam kạnạń, menkhan kại secʼte do kại reakʼ niạmren golamge.