Romiko lạgitʼ Pạul Apostolakʼ ciṭhi 6 - সান্তালী বাইবেল

Mạsi sãote jiwetʼ tahen

¹ Enḍekhan cetʼ noa bon mena, Isorakʼ daya jemon bạ̃ṛtikʼ, onate kại iditege bon tahena?

² Khạṭige baṅa. Ente kại secʼte ma bon gocʼge; enḍekhan cekate abo do arhõ kại horte bon calakʼa?

³ Noa katha do cetʼ bape baḍaea je, abo okoe do Mạsi Jisure bon bạptis akan, abo do uniyakʼ gujukʼre seletʼkatege bon onka akada mente?

⁴ Onate bạptisma hotete abot do Mạsi tulucʼ bon gocʼena arbon topayena, jemon Isor Baba cetʼleka acʼakʼ maraṅ daṛe hotete Mạsi gocʼko khone jiwetʼ beretʼakade onkage abo hõ jemon nãwã jion reakʼ horte bon taṛam daṛeakʼ.

⁵ Mạsi sãotebon gocʼente cetʼleka unire bon mitʼakan, ar cetʼleka gocʼko khone jiwetʼ beretʼ akan, ṭhik onkage abo hõ uni tulucʼ bon jiwetʼ beredokʼa.

⁶ Baḍaegea bon, aboakʼ kại hoṛmo marao lạgitʼge aboren ‘mare hoṛtetʼ’ do Mạsi sãoteye kurus ocoyena jemon kạiren golam do ar alo bon tahen;

⁷ ente okoeye gocʼ akan uni do kại khon chaḍaogeye ńamakada.

⁸ Abo do tinre Mạsi tulucʼ bon gocʼakana unre bon pạtiạukʼ kana je, uni tulucʼ jiwetʼ hõ bon tahena.

⁹ Baḍaegea bon Mạsi do gocʼko khone jiwetʼ beretʼ ocoakante ar tishõ bae gujukʼa, metakʼme uni cetanre moron do ar bae mạlik daṛeakʼa.

¹⁰ Uni tinreye gocʼlena unre uni do kại secʼteye gocʼlena; ar unire kại reakʼ jãhãnakʼ ar do baṅ tahẽlena. Ńitokʼ uni doe jewetʼ beretʼ akante Isor lạgitʼ bańcao menaea.

¹¹ Ṭhik onkage noa kathare pạtiạukʼpe je, Jisu Mạsi tulucʼpe mitʼ akante ape hõ kạirepe gocʼ akana, ar ńitokʼ do Isor lạgitʼ jiwetʼ menakʼpea.

¹² Onate apeakʼ gujukʼakʼ hoṛmore kại do raj alope calao ocoyaea. Arpe calao ocoyae khan apeakʼ hoṛmo reakʼ bạṛicʼ sana gobolrepe calao idikʼa.

¹³ Hoṛmo reakʼ oka hạṭiń hõ behokakʼ kạmi reakʼ hạtiạr lekate kại reakʼ tire alope jimạkakʼa. Gocʼko khon jiwetʼ akan hoṛko lekate ape do Isor ṭhen gobolokʼpe ar dhorom kạmi reakʼ hạtiạr lekate apeakʼ goṭa hoṛmoge Isor emaepe.

¹⁴ Ape do kạiren golamko dope baṅkana, ente Isorakʼ daya tạriren kanape, ạn-tạriren dope baṅkana.

Dhoromren golam

¹⁵ Menkhan ạn-tạrire tahẽ baṅkate daya tạriren bon hoyakante cetʼ enḍekhan bon kạigea? Khạṭige baṅa.

¹⁶ Ape do cetʼ bape baḍaea, golam leka jãhãeakʼ gobolrepe tahen ar uniyakʼ hukumkope bataotae enḍekhan uniren golamkope hoyokʼ kana mente? Onkage ape do kạiren golam hoyokʼtepe gujukʼa, ar baṅkhan Isorren golam leka dhoromakʼkope kạmiya.

¹⁷ Menkhan Isorakʼ sarhao baṛe hoyokʼma, ente ape do kạiren golampe tahẽkanre hõ, okaṭakʼ sikhạunape ńamakatʼ ona reakʼ do goṭa ontortepe batao akada.

¹⁸ Kại khonpe sạdhinente dhoromren golampe hoyakana.

¹⁹ Manwakoakʼ nijortetʼ iạte iń do manwako bujhạu ocoko lekage kathań roṛeda. Ape hõ cetʼleka lahate artetʼ behokakʼ kạmi lạgitʼ apeakʼ hoṛmo hạṭińko besapha ar bedhoromren golampe hoyocoletʼ, onkage ńitokʼ do sonotre hara rakabokʼte apeakʼ hoṛmo hạṭińko dhorom kạmi lạgitʼ golam baṛe hoeocoytape.

²⁰ Tinre ape do kạiren golampe tahẽkana unre dhoromren golam do bape tahẽkana.

²¹ Lahateakʼ kạmiko reakʼ kathako hudiskate ńitokʼpe lajaokʼkan khan onako kạmi khon apeakʼ do cetʼ porho hoykokʼa? Ona reakʼ mucạtʼ jo do hoyokʼ kana moron.

²² Menkhan ńitokʼ do kại khonpe sạdhin akante Isorren golampe hoyakana. Onate porho do noage hoyakana, ape dope sonot ocokʼa, ar ona reakʼ mucạtʼ jo do hoyokʼkana jaejug jion.

²³ Kại reakʼ kuṛại do moron kana, menkhan Isorakʼ daya dan do aboren Probhu Mạsi hotete jaejug jionge.