Romiko lạgitʼ Pạul Apostolakʼ ciṭhi 3 - সান্তালী বাইবেল

¹ Ar onkage hoyokʼ khan enḍekhan Jihudikoakʼ do bises cetʼ porho hoyakana? Ar khatnakʼ reakʼ porho baṅ cetʼkan?

² Ona do joto secʼ khonge porhowanakʼ hoyakana. Pạhilte Isor do acʼakʼ katha Jihudikogeye ematʼko tahẽkana.

³ Onko modre adom hoṛ do bako pạtiạulena, menkhan onate do cekayena? Onko bako pạtiạu akan iạte Isor hõ cetʼ bepạtiạricʼe hoyokʼa?

⁴ Khạṭige baṅa. Sanam manwako eṛegere hõ Isor do jao okteye sạrigea. Sonot sostorre ol menakʼa, jemon amakʼ kathakore dhoromem ṭarhaokʼ arem bicạrokʼre dom jitạukʼ.

⁵ Menkhan aboakʼ behokakʼ kạmiko khon arhõ pusṭạute bujhạukʼ kana, Isor do jaoge hok reakʼe kạmikana. Enḍekhan cetʼ bon menkea, aboe sạjạiyetʼ bonre uni doe behokeda? Iń do manwa lekateń roṛeda, sạrige uni do tishõ bae behoka.

⁶ Isore behokle khan enḍekhan cekate uni do manwakoakʼe bicạrtakoa?

⁷ Jãhãeye menkea, “Ińakʼ eṛe roṛ iạte Isorakʼ sạritetʼ do arhõ bes okocʼte sodorokʼ kana. Ar noate Isore mạhimakʼkan khan kại hoṛ mente cedakʼ iń doń dusi ocokʼkana?”

⁸ Enḍekhan cetʼ noa katha bon mena, “Dela, bạṛicʼakʼ bon kạmi idima jemon bạṛicʼakʼ hotete bhageakʼ hoyokʼtabon?” Adom adom hoṛko nisṛạuetʼbona je, abo do nonkan kathage bon roṛ baṛayeda. Onko do akoakʼ sạjạiko ńamjoṅa.

Dhorom do okoe hõ bạnukʼkoa.

⁹ Enḍekhan ńitokʼ cetʼbon menkea? Jihudi lekate cetʼ boṅgan hoṛ jạtrenko khon aleakʼ dosa do cetʼ sorosgea? Baṅa. Ente laharege coṅle menakatʼ Jihudiko ar boṅgan hoṛ jạtren sanamkoge kại gobolren kanako.

¹⁰ Sonot sostorre olakana, dhorom do okoe hõ bạnukʼkoa, mitʼ hoṛ hõ baṅa;

¹¹ okoe hõ sạriyakʼ reakʼ akelte do bako calakʼkana. Ar okoe hõ Isorakʼ sana leka bako kạmikana.

¹² Sanamkoge sạri hor khonko ocokʼ akana, ar jotoge mitʼ domteko bạṛicʼ akana. Bhageakʼ kạmi lạgitʼ do okoe hõ bạnukʼkoa, mitʼ hoṛ hõ baṅa.

¹³ Onkoakʼ moca do oṭakʼ akatʼ topa leka, onko do alaṅte eṛeko roṛa, ar luṭire do bińakʼ bisge menakʼtakoa.

¹⁴ Onkoakʼ moca do sarap ar haṛhatʼte perecʼgetakoa.

¹⁵ Khũn lạgitʼ jaṅga do usạrate lahakʼtakoa,

¹⁶ onkoakʼ horkore do jarkhar ar harkhetge menakʼa.

¹⁷ Suluk reakʼ hor onko do bako baḍaea,

¹⁸ onko do Isor hõ bako botoraea.

¹⁹ Baḍaegea bon Moseyakʼ ạn do onko lạgitʼge one okoe do ona ạn gobolre menakʼko. Onate Jihudi ar boṅgan hoṛ jạtrenko okoe hõ jãhãnakʼ mementeakʼ do bạnukʼtakoa, sanam manwage Isor samaṅreko dusigea.

²⁰ Ạn-ạri manao lekhange Isor do manwa dhorom menteye ataṅkoa ona do baṅa, menkhan ạn hotetege manwa do acʼakʼ kại reaṅ cehaonae ńameda.

Manwa dhorom mente ataṅokʼ reaṅ

²¹ Isor do manwako ạn begorte cetʼlekate dhorom menteye ataṅkoa ona do ńitokʼ sodor akana. Moseyakʼ ạnre ar nạbiko hõ ona reaṅ gohako emakada.

²² Okoe Jisu Mạsireko pạtiạukʼkan onkoakʼ ona biswạs hotetege Isor do dhorom mente onkoe ataṅkoa. Jihudi ar boṅgan hoṛ jạtrenko sanamgeko somangea,

²³ ente sanamkogeko kại akada ar Isorakʼ sarhao ńam lạgitʼko be lekgea.

²⁴ Menkhan Jisu Mạsi do manwako kại khon chaḍaoko reakʼe bondobos akada ar ona chaḍaokʼ hotete pạtiạukʼko do daya dan lekate dhorom menteye ataṅetʼkoa.

²⁵ Isor doe sodorakatʼ tahẽkana je, okoeko pạtiạukʼkan onko lạgitʼ Jisu Mạsi do acʼakʼ mãyãm hotete, metakʼme acʼakʼ jiwiye alaeketʼte uniye kusi ocokedea. Nonkate Isor doe udukʼ akada acʼakʼ sahao gun iạte manwakoakʼ lahateakʼ kại reakʼ sạjại bae emlenre hõ uni doe dhoromgea.

²⁶ Onate ńitokʼ sạbudokʼ kana je, acʼ cetʼlekae dhoromge onkage Jisure pạtiạukʼicʼ hõ dhorom menteye ataṅea.

²⁷ Niạ tayom manwa do gorbokʼ reakʼ ar cetʼ menakʼtaea? Cetʼhõ baṅa. Menkhan cedakʼ bạnukʼa? Manwa do ạnkoe manaoetʼkante gorbokʼ reakʼ cetʼge bạnukʼtaea? Ona do baṅa. Sạri katha do noa kana, biswạsre gorbokʼ reakʼ jaega do bạnukʼa,

²⁸ ente bon baḍaegea, Isor do biswạs hotete manwa do dhorom menteye ataṅea, menkhan ạn-ạriko manaote do baṅa.

²⁹ Isor do cetʼ eken Jihudikoren kangeae, boṅgan hoṛ jạtrenko doe baṅkana? Hẽ, uni do boṅgan hoṛ jạtkoren hõ Isor kanae,

³⁰ ente Isor doe mitʼ goṭengea. Uni do Jihudiko cetʼleka biswạs hotete dhorom menteye ataṅ akatʼko onkage boṅgan hoṛ jạtrenko hõe dhorom ocokoa.

³¹ Noa biswạs iạte cetʼ ạn-ạriko bon mạutạ ocoyeda? Tis hõ baṅa, bickom ạn reakʼ katha sạrikana mente bon sạbud ocoyetʼ kana.