Romiko lạgitʼ Pạul Apostolakʼ ciṭhi 2 - সান্তালী বাইবেল

Isorakʼ bicạr

¹ Jãhãege noa iạte eṭakʼkoe dusiko enḍekhan uniń metaea, amakʼ ạnḍuṅteakʼ do okortam? Am do eṭakʼkom dusiyetʼkore apnarge cetʼ dusi mente bam sạbudokʼ kana? Ente eṭakʼko dom dusiyetʼkoa menkhan am do onagem kạmikana.

² Baḍaegea bon okoe nonkanakʼko kạmikan Isor do onko hok reakʼgeye bicạrkoa.

³ Oka kạmi lạgitʼ eṭakʼkom dusiyetʼko ona kạmige am hõm kạmiyetʼ khan enḍekhan cetʼ Isorakʼ sạjại khonem paskao daṛeakʼa?

⁴ Am do Isorakʼ asambheṛ daya, sahao daṛe ar soborim neṅghaoetʼtaea. Am dom hiṛiń akada, Isorakʼ noa daya do kại khone ạcur ruạṛetʼmea mente.

⁵ Menkhan amakʼ mon do keṭecʼgea; am do kại khon mon ạcur bam khojkana. Onate Isorakʼ edre tis sodorokʼ, enhilokʼ lạgitʼ amakʼ bakhra sạjạyem sõcjoṅ kana. Ar unrege Isorakʼ dhorom bicạr do sodorokʼa.

⁶ Uni do mitʼke mitʼ hoṛ akoakʼ kạmi lekae halawakoa.

⁷ Okoe sombhuri salakʼ bhage kạmikote Isor ṭhen khon ṭhonok, man ar bin maraokʼ jionko khojkan, onkoge Isor do jaejug jione emakoa.

⁸ Menkhan okoe akoakʼ sana lekako senokʼ, ar sạriyakʼ baṅ bataokate bedhoromakʼko bataoetʼkan, Isor do onko ạḍi bạṛicʼe sạjạikoa.

⁹ Okoe bạṛicʼakʼko kạmikan onko mimitʼko do duk saset ar santaoko ńama. Pạhilre Jihudiko, ar ona tayom do boṅgan hoṛ jạtrenko.

¹⁰ Menkhan bhageakʼ kạmikanko do ṭhonok, man ar sulukko hameṭ joṅa. Pạhilre Jihudiko ar ona tayom do boṅgan hoṛ jạtrenkoge.

¹¹ Ente Isor ṭhen mẽtʼãhã beṅgetʼakʼ do bạnukʼ anaṅ.

¹² Moseyakʼ ạn-ạri bahre tahẽkate okoeko kạiyetʼkan onko do begor ạntegeko nosṭokʼa. Menkhan okoe ạn bhitrire tahẽkateko kạiyetʼ onkoakʼ bicạr do ạn hotetege hoyokʼa.

¹³ Okoe eken ạn reakʼ kathako ańjometʼkan onko do Isor samaṅre dhorom doko baṅkana, menkhan ạn lekate calakʼkankoge Isor do dhorom menteye ataṅkoa.

¹⁴ Boṅgan hoṛ jạtrenko do Moseyakʼ ạn bako ńamakada, menkhan enrehõ onko do apnar khonge ạn lekako kạmiyeda, ar ạn bako ńamakatʼre hõ onko do apnar lạgitʼ ạn kanako.

¹⁵ Ente ạn lekate oka lekge ona do onkoakʼ ontorrege ol menakʼa. Ar onkoakʼ bibek hõ ona gohageye emetʼkana. Onkoakʼ hudisge oka oka jokhecʼ doe dusikoa, arhõ oka jokhecʼ doe onko sejokʼa.

¹⁶ Oka hilokʼ Isor do Jisu Mạsi hotete manwakoakʼ okoakʼkoe bicạra enhilokʼge ona do sodorokʼa. Ar okaṭakʼ bhage sombatiń porcaretʼkan ona lekage bicạr do hoyokʼa.

Ạn-ạri ar Jihudiko

¹⁷ Am do apnarte Jihudiyem ńumogokʼ kana? Am do Moseyakʼ ạn-ạrikorem hirlạ joṅkana ar apnarte Isorren hoṛ mentem gorbokʼ kana.

¹⁸ Isor okae khojkan ona hõm baḍaegea ar okaṭakʼ bhageakʼkan ona dom aṅgoceda, ente ạn-ạri khonge ona sikhnạt dom ńamakada.

¹⁹ Am dom hudiseda kãṛãko horem udukʼ akokana. Ar ńutre okoe menakʼko onko ṭhen do marsal lekam hudisokʼ kana.

²⁰ Amakʼ hudisre, bebujko dom sudhrạuetʼkoa ar ạn-ạri reaṅ sikhạuna bako ńamakatʼ hoṛ dom cetʼako kana. Ạnre akel ar sạritetʼ menakʼ iạtege noako dom hudis aṭkareda.

²¹ Bhagegea, eṭakʼ hoṛkom cetʼakokanre am do cedakʼ bam cetʼjoṅ kana? Am dom porcareda, “Alom kombṛoya,” Menkhan amge cetʼ bam kombṛoyeda?

²² Am dom menetʼkana, “Alom laṭghaṭa,” Menkhan amge cetʼ bam laṭghaṭeda? Am ma murtikom hirkhạwako kan, menkhan amge cetʼ murtikoakʼ mundilte bolokate bam kombṛoyeda?

²³ Am do ạn-ạrikotem gorbokʼ kana, menkhan amge ạn bam bataoetʼte Isorge cetʼ bam henostawae kana?

²⁴ Sonot sostorre olakana, “Ape iạtege boṅgan hoṛ jạtrenko do Isorakʼ ńutumko henostawakʼ kana.”

²⁵ Ạn-ạrikom senakʼkan khan enḍekhan khatna do porhoanakʼ kangea, menkhan ạn-ạri bam bataoetʼ khan khatna akanre hõm Isor samaṅre do bin khatna akan hoṛ lekanam.

²⁶ Onate jãhãe bin khatna hoṛ ạn-ạrikoe manaoetʼ khan enḍekhan Isor do cetʼ khatna akan hoṛ mente bae aṅgocea?

²⁷ Am ṭhen ma coṅ olakʼ ạnko menakʼge ar khatna hõm khatna ocoakange. Menkhan ạn-ạriko bam bataoetʼ khan okoe bin khatna akanre hõ ạnkoe manaoetʼ, uni do cetʼ ạn bam bataoetʼkante bae dusimea?

²⁸ Eken bahre secʼte okoeye Jihudikan uni do khạṭi Jihudi doe baṅkana. Ar hoṛmo bahre secʼte khatna akanicʼ hõ khạṭi khatnayicʼ doe baṅkana.

²⁹ Menkhan ontorte okoe doe Jihudikan uni kangeae khạṭi Jihudi. Ar khạṭigeye khatna akan reakʼ kạmi hõ ontorrege hoyokʼa. Ona do sonot Jiu reakʼakʼko kana, olakʼ ạnko pańjae reakʼ do baṅkana. Nonkan hoṛ do manwa secʼ khon sarhao do bako ńama, menkhan Isor secʼ khon sarhao doko ńamgea.