Romiko lạgitʼ Pạul Apostolakʼ ciṭhi 16 - সান্তালী বাইবেল

Pạulakʼ johar katha

¹ Niạ dhao iń do aboren misera Phoebe ape ṭheniń cinhạpkae kana. Uni do Kenkhrea manḍerren sapʼdapʼicʼ kanae.

² Ar cetʼleka Isorren hoṛko ataṅ daram lek kan onkage Probhu Isor ńutumte ataṅepe. Ape ṭhen jãhãn goṛokoe khoj khan goṛowaepe, ente uni do aema hoṛe goṛo akatʼkoa ar iń hõe goṛowạdiń tahẽkana.

³ Priskạ ar Akuilạ hõ ińakʼ johar emakinpe. Unkin do Mạsi Jisuakʼ kạmire iń sãote ạḍikin khaṭao akana.

⁴ Unkin do ińakʼ jiwi rukhiyạ khạtirte ạkinakʼ hoṭokʼkin alaeletʼa. Eken iń eskar do baṅ, menkhan sanam boṅgan hoṛ jạtrenkoakʼ joto manḍerrenko hõ unkinko gunmanao johar ạkin kana.

⁵ Unkinakʼ oṛakʼre okoe do manḍerren lekate mitʼ ṭhenko jarwakʼkan onko hõ joharakope. Ińren dulạṛiạ gate Epaenetos hõ joharaepe, ente Asiạre unige pạhilte Mạsiye ataṅledea.

⁶ Mạriạm hõ joharaepe, uni do ape lạgitʼ ạḍi ãṭe khaṭaolena. Ona chaḍa Andronikus ar Juniạ hõ joharakinpe.

⁷ Unkin do iń leka Jihudi hoṛ kanakin ar iń sãote hajotrekin tahẽkana. Apostolko modre ạḍi manotan hoṛ kanakin. Unkin do iń khon hõ laharege Mạsiren kin hoyakana.

⁸ Probhu Isore ińren dulạṛiạ gate Ampliatus joharaepe.

⁹ Urbanus, one okoe do abo sãote Mạsi lạgitʼe kạmikan, uni ar ińren dulạṛiạ gate Skatus hõ joharaepe. Apelles hõ joharaepe.

¹⁰ Mạsiren hoṛ lekate uni doe biḍạu ocoakana. Aristobulus gharońjrenko hõ joharakope.

¹¹ Herodion, joharaepe, one okoe do iń lekae Jihudikan. Narkissus oṛakʼren okoe do Probhu Isorren hoṛkanko onko hõ joharakope.

¹² Truphaena ar Truphosa joharạkinpe. Nukin maejiu do Probhu Isor lạgitʼkin khaṭao akana. Dulạṛiạ Persis hõ joharaepe. Ente nui maejiu hõ Probhu Isor lạgitʼ ḍhere khaṭao akana.

¹³ Mạsire keṭecʼ pạtiạuicʼ mente okoeyakʼ ńutum menakʼ uni Ruphus ar uniren eṅgattetʼ hõ joharạkinpe. Ente uniren eṅgat do ińren hõ gogoleka kanae.

¹⁴ Asunkritus, Phelegon, Hermes, Patrobas, Hermas ar onko sãoren Mạsire pạtiạkʼkan eṭakʼ boehako hõ joharakope.

¹⁵ Philologus ar Julia, Neresus ar uniren miserat, Olumpas ar onko sãote Isorren okoe hoṛko menakʼko onko sanamko joharakope.

¹⁶ Sonot cokʼte jopoharpe. Mạsiyakʼ sanam manḍerrenko do apeko joharape kana.

Mucạtʼ sopolha

¹⁷ E boehako, okaṭakʼ sikhnạtpe ńamakatʼ ona upạrte okoe do kạphạriạu ar tạkicʼakʼko janam ocoyetʼkan onko oromkakope ar onko khon sahaṛokʼpe,

¹⁸ ente nonkanko hoṛ do aboren Probhu Mạsiren golam hoyokʼ baṅkate apnar lacʼgeko moneyakʼkana. Onko do sebel ar luhum suhum kathate sojhe monan hoṛko bulạuetʼkoa.

¹⁹ Apepe bataoetʼ reakʼ katha do jotogeko ańjomakada, ar onate apereń kusiakana. Iń doń khojkana ape do jemon bhageakʼko oromkatepe ataṅ ar bạṛicʼakʼko khon pharakpe tahen.

²⁰ Sulukren Isor do ạḍi usạrage apeakʼ jaṅga latarre Soetane lebetʼ gańjaoea. Aboren Probhu Jisuakʼ daya ape cetanre baṛe tahenma.

²¹ Ińren são kạmiyạicʼ Timothi hõe joharape kana; Lukius, Jason ar Sosipatros hõ apeko joharapekana. Iń lekage onko hõ Jihudi jạtren hoṛ kanako.

²² Iń Tertiusge, Pạulakʼ noa ciṭhi doń oletʼkana. Probhu Isorren hoṛ lekate iń hõ apekoń joharape kana.

^23-24 Ar iń okoeyakʼ oṛakʼreń tahenkan ar manḍerren hoṛko okoeyakʼ oṛakʼrele jarwa midokʼkan, uni Gaius hõ apekoe joharape kana. Noa nagrahare ṭaka-poesa hisạb dohoy reakʼ bhar okoe cetanre menakʼ uni Erastus ar aboren boeha Kuartus hõ apekin joharape kana.

²⁵ Jisu Mạsi reaṅ oka bhage sombat iń porcaretʼkan ona bhage sombat hotete ṭarhao dohope reakʼ daṛe do Isorakʼ menakʼgetaea. Ar ḍher jug hạbicʼ Isor do acʼakʼ okoakʼko reaṅ okoege bae lại akawatʼkoa,

²⁶ menkhan ńitokʼ bhage sombat hotete ona do sodorakana ar ona lekage iń hõń porcareda. Ar jaejugicʼ Isorakʼ hukum leka nạbikoakʼ olakʼ hotete sanam jạtren hoṛko ṭhen ona do baḍae ocoakana, jemon onko do Mạsireko pạtiạukʼte Isorren bataokoko hoydaṛeakʼ.

²⁷ Eken uni eskargeae Isor do, ar unige akelanicʼ do. Jisu Mạsi hotete jaejug hạbicʼ uniyakʼge ṭhonok hoyokʼtaema. Amen.