Romiko lạgitʼ Pạul Apostolakʼ ciṭhi 15 - সান্তালী বাইবেল

Eṭakʼko kusi ocoko

¹ Abo okoe do bon daṛeanko kan aboakʼ do dạyik kana bin daṛeankoakʼ nijorakʼkore teṅgo goṛowako, ar eken apnar kusikʼ lạgitʼ do baṅ.

² Biswạsi boehako benao rakabe lạgitʼ abo sanamkoge jemon uniyakʼ bhạlại lạgitʼ uni bon kusiocoye.

³ Mạsi hõ apnartetʼ do bae kusi ocolena. Sonot sostorre olakana, “Okoe amko opomanetʼme onkoakʼ sanam opoman do ińrege paṛaokʼ kana.”

⁴ Sonot sostorre okako ol lahalen ona do abo cetʼ abon lạgitʼge ollena, jemon sostor khon sobori ar udgạu bon ńamte as tahen tabon.

⁵ Jisu Mạsi sãote calakʼ horre sobori ar udgạuicʼren Isor do ape sanamkoakʼ mon baṛeye mitʼ ocoytapema.

⁶ Enḍekhan ape do mitʼ monte ar mitʼ aṛaṅte aboren Probhu Jisu Mạsiren Isor Babape sarhao daṛeaea.

Bhage sombat do sanamko lạgitʼge

⁷ Isorakʼ ṭhonok jemon sodorokʼ, onate Mạsi cetʼlekae ataṅ sãohãketʼpe onkage ape hõ ape apere ataṅ sãohãkʼpe.

⁸ Baḍaekakʼpe, Isorakʼ katha je sạriyakʼkan ona sạbud lạgitʼge Mạsi do Jihudikoren sapʼ dapʼicʼe hoylena. Noa reakʼ monsubạ do tahẽkana, Isor do hapṛamko ṭhen okae gokʼletʼ tahẽkan ona jemon purạukʼ ar uniyakʼ daya iạte boṅgan hoṛ jạtrenko hõ uniko sarhaoe.

⁹ Sonot sostorre olakana, ona iạte iń do boṅgan hoṛ jạtrenko talareń sarhaomea, ar amakʼ ńutumiń õṛhẽytama.

¹⁰ Arhõe meneda, E ape boṅgan hoṛ jạtrenko, ape do Isorren hoṛko tulucʼ uni sarhaoepe.

¹¹ Arhõ olakana, Probhu Isorge sarhaoepe, E sanam boṅgan hoṛ jạtrenko; ar jạt jạtrenko do uniko ńumema.

¹² Arhõ Jesaeae meneda, okoe doe Jisại reakʼ kahle kan, uni doe hijukʼa, uni do joto jạtrenko cetanre rajokʼ lạgitʼe teṅgona. Ar sanam jạtren hoṛko do unireko bhorsakʼa.

¹³ Okoe ase dan abonkan uni Isor do apeakʼ biswạs hotete asambheṛ rạskạ ar sulukteye perecʼpema. Enḍekhan sonot Jiu reakʼ daṛete apeakʼ ontor reakʼ as do sareṛokʼtapea.

Pạulakʼ monejoṅ

¹⁴ E ińren boehako, iń do noań pạtiạukʼ kana, apeakʼ ontor do bhageakʼte purun akana, ar joto lekan akeltehõpe perecʼgea, ente ape do mimitʼkope sikhạu paṛhao daṛeako kana.

¹⁵ Enrehõ iń do mitʼ bar katha disạ ocope lạgitʼ dilkate noań olape kana, ente Isor do boṅgan hoṛ jạtrenko ṭhen Mạsi Jisuren sapʼ dapʼicʼ hoyokʼ reakʼ ạsirbade dan akawạdińa.

¹⁶ Sonot Jiu hotete okoe Jihudikoko bachao doho ocoakan, onko do Isor ṭhen jemon samaṅokʼakʼko hoydaṛeakʼ ona iạte uniyakʼ bhage sombat lại pasnaore naeke kạmiyiń kạmikana.

¹⁷ Iń do Isor lạgitʼ okaṭakʼ iń kạmikan onate Mạsi Jisu hotete ińakʼ sarhaokʼ reakʼ ạidạri do menakʼgetińạ.

^18-19 Iń hotete Mạsi okaṭakʼe kạmiakatʼ ona bahre jãhãn katha roṛ do ohoń dil daṛekea. Unige ińakʼ katha ar kạmite, hahaṛa kạmi ar cinhạko hotete ar sonot Jiu reakʼ daṛete boṅgan hoṛ jạtrenko do Isorreye tabe ocoakatʼkoa. Onate iń do Jerusalem khon ehopʼkate Illurikum hạbicʼ sanam jaegare Mạsiyakʼ bhage sombat purạteń lại jạhirakada.

²⁰ Okare Mạsiyakʼ ńutum tisge baṅ lại akan onḍege bhage sombat jạhirakoń jidkeda, jemon eṭakʼkoakʼ ehopʼakʼre aloń benao rakab.

²¹ Sonot sostorre ol akana, “okoe uni reaṅ baṅ lại akawatʼko, onkoko ńela, ar okoe baṅko ańjomakatʼ, hoṛ doko bujhạua.”

Pạulakʼ Romte calakʼ reaṅ

²² Ona iạtege ape ṭhen senokʼ do ạḍi dhao iń akoṭena.

²³ Menkhan ńitokʼ noako ṭoṭhare ińakʼ kạmi reakʼ jaega do ar bạnukʼa. Ar ḍher bochor khonge ape ṭhen senokʼ reakʼ sana menakʼtińạ,

²⁴ onate ńitokʼ Spaniạ disạmte parom calakʼ jokhecʼ ape ṭhen calakʼ iń menjoṅ kana. Ar asiń dohoyeda, ona horte sen paromokʼ jokhecʼ apeń ńel torapea ar ape tulucʼ thoṛa okte rạskạte khemao tayom apege Spaniạ disạmte calakʼ reakʼpe bondobosạńạ.

²⁵ Menkhan ńitokʼ do Isorren hoṛko goṛowako lạgitʼ Jerusalemteń calakʼ kana,

²⁶ ente Jerusalemre Isorren hoṛko modre okoe reṅgecʼ hoṛ menakʼko onko lạgitʼ Makedoniạ ar Akhaea manḍerren hoṛko do thoṛa danko uṭhạu akada.

²⁷ Onko do noa dan rạskạtegeko uṭhạu akada. Ona chaḍa noa manḍerko do Jerusalemren Isorren hoṛko ṭhenko rinigea, ente Jihudiko do akoakʼ Jiuteakʼ bhor dan reakʼ bhag tinre boṅgan hoṛ jạtrenkoko hạṭiń akatʼkoa unre boṅgan hoṛ jạtrenko hõ Jihudiko gharońj secʼte goṛowako do lek kantakoa.

²⁸ Ińakʼ noa kạmiń sạtle khan ar ona dan ṭhik leka seṭerakana menteń baḍaele khan ape secʼte Spainiạteń calakʼa.

²⁹ Ińiń baḍaea ape ṭheniń senlenre iń do Mạsiyakʼ purạ puri bhoriń iditoraea.

³⁰ E boehako, aboren Probhu Jisu Mạsi hotete ar sonot Jiuakʼ dulạṛteń nehõrape kana, iń lạgitʼ Isor ṭhen koejoṅre iń sãote lạgiyạ paṛaokʼpe.

³¹ Koejoṅpe, Jihudiạre okoe do Isorko henostawekan onkoakʼ ti khon jemon rukhiyạń ńam, ar Jerusalemre Isorren hoṛko jemon ińakʼ noa goṛoko ataṅ daṛeakʼ.

³² Unre Isorakʼ sanaleka iń do kusi monte ape ṭheniń calao daṛeakʼa ar ape sãote tahẽkate jiwiń ṭanḍhaetińa.

³³ Sulukren Isor do ape sanamko sãoteye tahenma. Amen.