Romiko lạgitʼ Pạul Apostolakʼ ciṭhi 11 - সান্তালী বাইবেল

Israel jạtrenko cetanre Isorakʼ daya

¹ Adoń meneda, Isor do cetʼ acʼren hoṛkoe giḍisaeketʼ koa? Tisge baṅa. Ente iń hõ mitʼṭen Israel hoṛ kangeạń, Abraham bõsren ar Benjamin gusṭirenge.

² Isor do acʼren okoeko hoṛ laha khongeye bachao akatʼko tahẽkan onko do bae dea giḍiletʼkoa. Se bape baḍaea, sonot sostorre Eliạ nạbi reakʼ cetʼe meneda mente? Uni do Isor ṭhen Israel upạrteye roṛleda,

³ “E Probhu Isor, noko do amren nạbikoko gocʼ akatʼkoa ar amakʼ pinḍko rạputʼ giḍiakada. Eken iń eskarge sarecʼ minạńa, ar iń hõ gojeń reakʼko kurumuṭu kana.”

⁴ Menkhan Isor do Eliạ cetʼe roṛ ruạṛe emade tahẽkana? Uniye metade tahẽkana, “Eae hajar herel hoponkoń sarecʼ doho akawana, one onko do Bakʼal-deb ṭhen bako ikhṛum akan.”

⁵ Isor do onkage ńit hõ Israelkoe daya akokanteye bachao doho akatʼkoa.

⁶ Isor do dayategeye bachao dohoakatʼko khan, enḍekhan ona do jãhãn kạmi reakʼ jo do baṅkana. Ar onkage hoylen khan daya do daya mente baṅ tahẽkokʼa.

⁷ Enḍekhan bujhạukʼ kana, Israelko okaṭakʼ ńam reakʼko kurumuṭuyetʼ tahẽkan ona do bako ńamleda, menkhan Isor okoekoe bachao doho akawan tahẽkan onkoge ona doko ńamakada, ar eṭakʼkoakʼ mon do dhiri leka keṭecʼ akantakoa.

⁸ Sonot sostorre olakana, “Isor do onkoakʼ ontor nonkae goṛdhoketʼ takoa, teheń hạbicʼ onko do ńeńel tulucʼ bako ńeńel kana ar luturte ańjom tulucʼ bako ańjomeda.”

⁹ Dạud raj hõe menleda, onkoakʼ jojom ar ńũńũakʼ do pạsi ar jhampa leka hoyokʼ ma; ona do jemon onkoakʼ tạkicʼakʼ hoyokʼtako, ar oka kuṛại menakʼtako onage jemonko ńam.

¹⁰ Onkoakʼ mẽtʼ do kãṛãkʼtako ma jemon aloko ńeńel, ar onkoakʼ dea do jaejug kubjạ akan tahentako ma.

¹¹ Enḍekhan Jihudikoko tohotʼente cetʼ jaejug hạbicʼko gurena? Ekalte baṅa, bickom onkoakʼ kại gunạkʼtege boṅgan hoṛ jạtrenko do bańcaokʼ lạgitʼ ạtko ńamkeda jemon Jihudiko gagoj hecʼako.

¹² Enḍekhan ńelokʼ kana, Jihudikoakʼ kại gunạkʼte dhạrtiren hoṛkoakʼ ḍher lab hoyakana, ar onkoakʼ loksan iạte boṅgan hoṛ jạtrenko do Isorakʼ bhorko ńamkeda. Onate Jihudiko cetanre Isorakʼ purạ bhor hijukʼre boṅgan hoṛ jạtrenko hõ artetʼ bạ̃ṛti bhor hecʼakoa!

Boṅgan hoṛkoakʼ bańcaokʼ reaṅ

¹³ E boṅgan hoṛ jạtrenko, metape kạnạń, boṅgan hoṛ jạtrenko ṭhen apostol lekate ińakʼ kạmiko do ạḍi manot salakʼ iń ńeleda.

¹⁴ Ar nonkate jemon apnar jạtren hoṛkoń gagoj ocokote onko mod khon thoṛa hoṛ iń bańcao daṛeako.

¹⁵ Isor do Jihudiko bae bạsutako khan ar onkoakʼ giḍi ocokʼ do dhạrtirenkoakʼ samgeakʼkan khan enḍekhan Jihudikoe ataṅlekore do cetʼ hoyokʼa? Ona do cetʼ gocʼko jionko ńamakatʼ leka do baṅa?

¹⁶ Sipiyakʼ holoṅ khon pạhil benaoakʼ piṭhạge sonotge khan enḍekhan ma sanam sipiyakʼ holoṅ hõ sonotge. Jạitun dare reakʼ rehetʼge sonotge khan ḍạrko hõ sonotgea.

¹⁷ Jodi ona jạitun dare reakʼ adom ḍạrko rạputʼ giḍikate onare am lekan bir jạitun dare reakʼ ḍạrko kolom mitʼlen khan am do asol jạitun dare reakʼ rehetʼ khon ros hatao joṅme,

¹⁸ ar rạputʼ giḍiakatʼ ḍạrko khon apnar do maraṅ alom hudisokʼa. Arem hudisokʼkan khan enḍekhan disạime, rehetʼ do bam sapʼ ṭahraoetʼ kana bickom rehetʼge am doe sapʼ ṭahraoetʼmea.

¹⁹ Am dom men botecʼkea, “Ińiń kolom mitʼ ocokʼ iạtege ḍạrko do rạputʼ giḍi ocoakana.”

²⁰ Bhagegea. Menkhan onkoko rạputʼ giḍi ocoakana onkoakʼ bepạtiạu iạte ar am dom kolom mitʼ akana amakʼ pạtiạu iạte. Onate alom usul monokʼa bickom botorokʼme,

²¹ ente Isor do asol ḍạrkoge bae mãyãwakʼ kan khan enḍekhan am hõ ohoe mãyãlema.

²² Onate Isor do tinạkʼ dayakʼicʼ ar tinạkʼ ajhãṭicʼ kanae ona baṛe hudisme. Okoeko ńurhạ akan onko lạgitʼ doe ajhãṭena, menkhan am lạgitʼ do dayawạnicʼge, khạjuk uniyakʼ daya latarrem tahen. Ar baṅ khan am hom makʼ giḍi ocokʼa.

²³ Onko do bepạtiạu khonko ạcur ruạṛlen khan enḍekhan akoakʼ dare sãote arhõko kolom mitʼ ocokʼa, ente noa kolom mitʼ reakʼ kạmi do Isorgeye daṛeakʼa.

²⁴ Am do mitʼṭecʼ bir jạitun dare reakʼ ḍạrem tahẽkana, ar ona dare khonem makʼ ạgu ocoyente bagwan reakʼ jạitun darerem kolom mitʼ ocoakana. Enḍekhan okoe ona dareren asol ḍạrkoko tahẽkan, onko do tinạkʼ algatege arhõ akoakʼ darereko kolom mitʼ ocokʼa!

Sanamko cetanre Isorakʼ daya

²⁵ E boehako, apnarte jemon budanko alope monejoṅ onate iń do mitʼṭecʼ sạri okowakʼ baḍae ocopeń menjoṅ kana. Ona sạriyakʼ do noage, boṅgan hoṛ jạtrenkoakʼ lekha ạuri purạukʼ hạbicʼ ḍher bhag Israelkoakʼ ontor do keṭecʼge tahena.

²⁶ Nonkate joto Israelko do bańcaoko ńama. Sonot sostorre olakana; Sion khon babańcaoicʼe hijukʼa; uni do Jakob bõsren hoṛko tala khon, bedhoromkoe ocokʼ giḍiya.

²⁷ Iń do tinre onkoakʼ kạikoń meṭao giḍiytakoa unre onko tulucʼ noage ińakʼ bondobos do hoyokʼa.

²⁸ Bhage sombat secʼte apeakʼ bhạlại lạgitʼge onko do ńitokʼ Isorren bạiri kanako. Menkhan Isorakʼ bachao lekate onko do hapṛamko iạte Isorren dulạṛiạko kanako.

²⁹ Isor okae dan ar okoeye hohowae ona babotre acʼakʼ mon do bae bodoltaea.

³⁰ Mitʼ jokhecʼ ape do Isorakʼ bebataorepe tahẽkana, menkhan ńitokʼ do Jihudikoakʼ bebatao iạte Isorakʼ dayape ńamakada,

³¹ ar onkaleka mãyãpe ńamakatʼte onko hõ ńitokʼ bebataokoko hoyakana jemonko mãyã ocokʼ.

³² Isor jemon sanamkoe mãyãwako onate uni do sanamkoge bebataoreye aṭok dohoakatʼkoa.

³³ Isorakʼ dhon do asambheṛgea. Uniyakʼ bud ar akel hõ khạndrińgea. Uniyakʼ bicạr ar sanam kạmiko do oho ḍunḍhạulena.

³⁴ Probhu Isorakʼ mon do okoe haleye baḍaeakada? Ar okoe baṅ uniren sosolhayicʼe hoyakan?

³⁵ Isor upạrte okoeyakʼ baṅ dạbiteakʼ menakʼtae, onate uniyakʼ dạbi do manao hoyokʼtaea mente?

³⁶ Ente jotowakʼge coṅ uni khon ar uni hotetege hijukʼkan ar sanamakʼ do uni lạgitʼ kangea. Uniyakʼge jaejug ṭhonok hoyokʼtae ma. Amen.