Rak̕joṅ 5 - সান্তালী বাইবেল

Ikạ ńam reakʼ koejoṅ

¹ E Probhu Isor, ale cetanre oka hoyakan ona baṛe disạime; ạribạndhime, ar aleakʼ henosta baṛe ńelme.

² Aleakʼ ạidạriko do bidisiạkoakʼ tire jimạ akana, ar aleakʼ oṛakʼ do eṭakʼ jạtren hoṛko em ocoakana.

³ Ale do ṭũạr amarkole hoyakana, aleren baba do bạnuitalea, aleren gogo doko rạnḍi akana.

⁴ Dakʼ do kirińkatele ńũiyeda; ar aleakʼ sahan hõ damtele kirińeda.

⁵ Tarenre arãṛko ladeakatʼlea, ãṭko kạmi ocoyetʼlea laṅga cabayenale; jirạu do bạnukʼtalea.

⁶ Ale do jomakʼko ńama iạte Misor ar Ạsurrenko gobolrenkole hoyakana.

⁷ Aleren hapṛamko doko kạileda; onko do ńitokʼ ar bạnukʼkoa, menkhan ale do onkoakʼ ghạṭkole gokʼbaṛayeda.

⁸ Golamkoge ale cetanre mạlikiko calaoeda; onkoakʼ ti khon bańcaole lạgitʼ celege bạnukʼkoa.

⁹ Hahaṅkarre ḍạkuko botorte jiwi cuputʼkate jomakʼle jogaṛetʼkana.

¹⁰ Aleakʼ harta do bhaṭa leka dhipạu akana; reṅgecʼ reakʼ jaljalao iạte.

¹¹ Maejiuko do Sionreko nosṭo ocokʼ kana; ar kũạri kuṛiko do Jihudạ ato ar nagrahakore.

¹² Cetan hudạren kạmiyạko do tire tolkateko akaketʼkoa; ar murubbiko do bako manot ocolena.

¹³ Juạn koṛako do janteko ritʼeda; ar huḍiń koṛako do sahan bojha gokʼteko keḍe keḍekʼkana.

¹⁴ Nagraha reakʼ phaṭok duạr ṭhen murubbiko do ar bako duṛupʼ kana; Juạnko hõ ar bako sereń durạṅeda.

¹⁵ Aleakʼ mon khon rạskạ do caba akana ale do enecʼ baṅkatele halaṅ homoreda.

¹⁶ Aleakʼ bohokʼ khon mukuṭ do ńur akana. Hae ale do, entele kại akada!

¹⁷ Noa iạte aleakʼ mon do nijor akana, noako iạte aleakʼ mẽtʼ do ńuṛu ńuṛu akantalea.

¹⁸ Sion buru do ujạṛakʼ hoyakana; toyoko do onareko dãṛã baṛaekana.

¹⁹ E Probhu Isor, jaejug hạbicʼ rajokʼme; amakʼ siṅghạson do piṛhike piṛhi tahenkana.

²⁰ Am do cetʼ jaejug lạgitʼem hiṛiń akatʼlea? Nunạkʼ din khon cedakʼem bạgi giḍiakatʼlea?

^21-22 E Probhu Isor, bam nihạ̃t giḍi akatʼle khan, ale cetanre bam bekusi akan khan, enḍekhan am ṭhen baṛe ruạṛ idilem adole ruạṛ hijukʼa; ar sedae leka aleakʼ dinko baṛe ruạṛ kataleme.