Rak̕joṅ 4 - সান্তালী বাইবেল

Israelkoakʼ duk

¹ Hae! cetʼleka mạlchạ akana sona do, Cetʼ leka pherao akana nirạ sona do. Mitʼke mitʼ kulhi reakʼ dobạṭiạkore sonot ṭhạ̃i reakʼ dhiriko do cetʼ leka chirchạtur akana.

² Sionren soros soros hoponko okoe do sona tulucʼko tulnikʼ; ńitokʼ do hasa bhajan lekako lekhakʼ kana.

³ Toyoko hõ akoren hoponko nunuako kana, menkhan ińren hoṛko do hahaṅkarren ũṭ cẽṛẽ leka kurmutạhako hoyakana.

⁴ Nunu gidrạkoakʼ alaṅ do tetaṅte tạrure jalatʼakana; gidrạko do jomakʼko kokoekana, menkhan celehõ bako emakokana.

⁵ Okoe bhage bhage jomakʼko jometʼ tahẽkan ńitokʼ onko do ṭonṭa iạte kulhireko lorao akana. Okoe do jeṅgetʼ arakʼakʼko horokʼetʼ tahẽkan onko do ńitokʼ torocʼ cetanreko giticʼ baṛaekana.

⁶ Ente ińren hoṛkoren hoponerawakʼ ḍạnṭao do maraṅge tahẽkana, Sodom reakʼ kại khon do, one ona mitʼ ripitʼtege jalao maraolen; ar onare tige baṅ lagaolena.

⁷ Onkoren bachao akan mukhiyạko do him khon hõ marsal, toa khon hõ ponḍgeko tahẽkana; onkoakʼ hoṛmo do Probal dhiri khon hõ arakʼge tahẽkana ar onkoakʼ cehra do Nilkanto moni leka tahẽkana.

⁸ Menkhan ńitokʼ onko do doat kạli khon hõ ḍherko hende akana; kulhikore bako ńel oromokʼ kana. Onkoakʼ harta do jaṅkore jalatʼ caba akantakoa; ona do kaṭ leka rohoṛ akana.

⁹ Akalte gujukʼ khon tarwaṛete gujukʼge bhagea; ińren hoṛko do khet reakʼ phosol ṭonṭate reṅgecʼ jalateko ạsitʼ cabakʼkana.

¹⁰ Mãyãwan maejiuko do akoakʼ tite akoren hoponko teke isinetʼkoa. Ińren hoṛkoren hoporeawakʼ jarkharokʼre akoren hoponge onkoren jomakʼko hoylentakoa.

¹¹ Probhu Isor do purạte acʼakʼ edreye oḍok akada; uniyakʼ jolokʼkan edre doe dul buhạu akada. Uni do Sionre seṅgele jolakada; ar ona reakʼ rehetʼko hõe jomakada.

¹² Dhạrtiren rapajko do bako pạtiạukʼkan tahẽkana, Jerusalem reakʼ phaṭok duạrte jãhãe bạiriko bolo daṛeakʼa mente.

¹³ Noa do uniren nạbikoakʼ ghạṭ iạte, ar uniren naekekoakʼ bedhorom iạte hoylena, ente onḍege onko do dhorom hoṛkoakʼ mãyãmko joroyetʼtako tahẽkana.

¹⁴ Onko do kãṛãko leka kulhikoreko dãṛãnkan tahẽkana; onko do mãyãmte nonkako bhonḍ akana, celege onkoakʼ kicricʼ do bako joṭetʼetʼ tahẽkana.

¹⁵ Hoṛko do hohoateko metakokan tahẽkana, “Ocogokʼpe, ape dope bhonḍgea. Ocogokʼpe, men ocokʼpe, alope joṭetʼlea. ” Onko do uḍạcal hoṛ lekako ạcur baṛaekan tahẽkana; boṅgan hoṛ jạtrenko doko menetʼ tahẽkana, “Abo talare upriạ do bako tahẽ daṛeakʼa. ”

¹⁶ Probhu Isorge onko doe chirchạtur akatʼkoa; onko do ar bae moneyako kana. Hoṛko do naekeko bako manotetʼkoa, ar murubbiko hõ bako mãyãwako kana.

¹⁷ Ạuṛiyakʼ goṛo ńam reakʼ aste aboakʼ mẽtʼ do nijor akantabona; nonkan mitʼ jạtrenko secʼ bon koyokʼ horakatʼ tahẽkana okoe do bako rukhiyạ daṛeabon.

¹⁸ Hoṛko do abo lạgitʼ tãṛãkʼ akaeko tahenkan tahẽkana, onate abo do phaelao ṭhạ̃ikore babon taṛam daṛeakʼkan tahẽkana. Aboakʼ ses dinko do sorakan tahẽkana, ar aboakʼ dinko hõ caba akan tahẽkana, ente aboakʼ ses okte do seṭer akan tahẽkana.

¹⁹ Abo okoeko lagayetʼ bon tahẽkan onko do pajhaṛ khon hõ coṭkargeko tahẽkana; onko do burukoreko laga baṛayetʼ bon tahẽkana ar hahaṅkarre abo lạgitʼko tãṛãkʼkokʼ kan tahẽkana.

²⁰ Aboakʼ mũ reakʼ sahẽtʼ Probhuren ojokʼicʼ do, onkoakʼ khạnreye sapʼ ocolena; menkhan abo dobon hudisokʼkan tahẽkana uniyakʼ umulre jạt jạtrenko talare bon girobasokʼa.

²¹ Us disạmre berel akanicʼ E Edom hoponera am do rạskạ ar hulạsokʼme; menkhan amhõ ona bạṭi dom emocokʼa; am dom ńũ bulokʼa arem uluṅokʼa.

²² E Sion hoponera, amakʼ sạjại do cabakʼa; bondi dosare do ar bam tahena; menkhan E Edom hoponera, uni do behokakʼ reakʼ sạjạiyiń emama ar amakʼ kạiye sodortama.