Rak̕joṅ 3 - সান্তালী বাইবেল

Isorren hoṛakʼ duk ar nehõr

¹ Iń doń uni hoṛ kana, okoe do Probhu Isorakʼ edre reakʼ sạjạiye ńamakatʼ.

² Uni doe laga ńir akadińạ; marsalre do baṅ, menkhan ńutreye taṛam ocoakadińạ;

³ sạrige goṭa din iń upạrte uni do ghane ghane acʼakʼ tiye tuletʼtaea.

⁴ Ińakʼ harta ar jel doe rohoṛ ocoakatʼtińạ ar jaṅko doe rạputʼ giḍiakatʼtińa.

⁵ Uni do haṛhatʼ sisir ar harkhette ińe esetʼ ạcur akadińạ.

⁶ Okoe ḍher din lahareko gocʼakan onko leka uni do ńutreye berel ocoakadińạ.

⁷ Alo jemoniń dạṛ daṛeakʼ onate beṛhaeteye esetʼ ạcurakadińạ; ar hamal sikṛiteye tol akadińạ.

⁸ Goṛo ńam lạgitʼ iń hohoyetʼre ariń rakʼetʼre, uni do ińakʼ koejoṅ bae ańjometʼtińạ.

⁹ Hamal hamal dhirite ińakʼ hore esetʼ akatʼtińạ; ar ińakʼ horkoe konḍea akada.

¹⁰ Iń ṭhen uni do tãṛãkʼ akan bana leka ar danaṅre menae dhạcri kul lekanae;

¹¹ Hor khon or ghec ghece ạgukateye khanḍa khunḍi akadińạ ar eskargeye giḍi oṭoakadińạ.

¹² Uni do acʼakʼ akʼ reakʼ sare or akada ar acʼakʼ bheja khunṭigeye hoyocoakadińạ.

¹³ Acʼakʼ khap khon sar bocʼkate ińakʼ ontoreye tuń bitʼ akada.

¹⁴ Ińren sanam hoṛko lạgitʼ do landawakʼgeń hoyakana; onko do goṭa dinge sereńateko landa-dhutʼạń kana.

¹⁵ Haṛhatʼakʼkote uni doe perecʼ akadińạ, ar bisteye bi ocoakadińạ.

¹⁶ Dhirite ińakʼ ḍaṭae koṭecʼ rạputʼ akatʼtińạ ar torocʼreye ota kacakucạ akadińạ

¹⁷ Suluk do iń ṭhen khon sạṅgiń akana; ar bhạlại doń hiṛiń akada.

¹⁸ Onateń meneda, “Ińakʼ daṛe do caba akantińạ. Probhu Isor ṭhen okań aslen ona hõ ar do bạnukʼa. ”

¹⁹ Ińakʼ kosṭo ar ạcur baṛae reakʼ katha disạime; disạime ińakʼ haṛhatʼ ar biste perecʼ jion reakʼ katha.

²⁰ Jao okte ona do disạ menakʼtińgea, ińakʼ jiwi do iń bhitrire dukokʼ kantińạ.

²¹ Enhõ as do menakʼtińgea, ente iń do noa kathageń hudisetʼkana;

²² Probhu Isorakʼ asambheṛ dulạṛ iạte bale marao akana, ente uniyakʼ daya do tishõ baṅ cabakʼtaea;

²³ Din hilokʼ setakʼ jokhecʼ ona do nãwã arokʼkana; uniyakʼ pạtiạr do maraṅgetaea.

²⁴ Mon monteń mena, “Probhu Isor kangeae ińren sompotti, onate unirege asiń dohoytińa. ”

²⁵ Probhu Isor cetanre okoe asko dohoy ar okoe unireko bhorsakʼ uni do onkoe bhạlạikoa.

²⁶ Probhu Isor khon bańcao ạuri hoyokʼ hạbicʼ jiwi hataṛkate koyokʼ horge bhagea.

²⁷ Juạn oktere arãṛ gog manwa lạgitʼ do bhagegea.

²⁸ Probhu Isorge ona arãṛ do uniye gokʼ akawadea, onate uni do hape akane tahenma.

²⁹ Uni do dhuṛireye ombagokʼma, pasere pase as menakʼtaege.

³⁰ Uni do thapakạnicʼ acʼakʼ johae ạcuraema ar henostateye tuhedokʼma.

³¹ Probhu Isor do jaejug lạgitʼ manwa bae sạṅgiń giḍikoa.

³² Uni do duke emokʼrehõ enhõ uniyakʼ asambheṛ daya iạteye mãyãkʼgea,

³³ ente acʼakʼ kusi monte manwa do bae haraonkoa ar bae dukkoa.

³⁴ Dhạrtiren sanam bondiko doko jaṅga latar ocokʼkana,

³⁵ maraṅ Isor samaṅre manwakoakʼ ạidạri baṅ aṅgockan,

³⁶ ar dhoromte baṅ bicạrokʼkan Probhu Isor do cetʼ noako bae ńeleda?

³⁷ Probhu Isor hukum bae emokʼ khan moca roṛte jãhãe jãhãnakʼe hoyoco daṛekea?

³⁸ Maraṅ Isorakʼ moca khonge cetʼ bhalạiyanakʼ ar bin bhạlạiyanakʼ cetʼ baṅ oḍokokʼ kana?

³⁹ Mitʼṭen manwa do acʼakʼ kạiko reakʼ sạjại iạte cedakʼ ona iạte doe lạlisa?

⁴⁰ Dela, abo do jion reakʼ hor bon biḍạu aṭkarma ar Probhu Isor ṭhen bon ruạṛ hijukʼma.

⁴¹ Dela, aboakʼ mon ar ti do sermaren Isor secʼ rakapʼkate bon menma,

⁴² “Ale dole kại akada, arle hul akada; ar am do bam ikạ akatʼlea.

⁴³ Edretem oyoakana arem khudạuakatʼlea; ar mãyã baṅkate alem gocʼ akatʼlea.

⁴⁴ Am do rimiltem danaṅ akana jemon aleakʼ koejoṅ ona talate bae parom daṛeakʼ.

⁴⁵ Jạt jạtrenko talare ale do mạilạ ar jobra lekam hoyocoakatʼlea.

⁴⁶ Aleren sanam bạiriko do ale upạrte mocako cahapʼ akatʼtakoa.

⁴⁷ Ale do toras, jhãmpa, dhaṅdhaser ar jarkharge hecʼ akatʼlea. ”

⁴⁸ Ińren hoṛ doko marao idikʼkana, onate ińakʼ mẽtʼdakʼ do gaḍa dakʼ leka ạtukʼ kantińạ.

⁴⁹ Ińakʼ mẽtʼ dakʼ do ạtukʼtege tahena, ar baṅ thirokʼa,

⁵⁰ Probhu Isor coṭ serma khon latarte ạuriye oyoṅ hạbicʼ.

⁵¹ Ińakʼ nagraharen sanam maejiuko reaṅ okań ńeletʼkan, onate ińakʼ jiwi do ragokʼ kantińạ.

⁵² Ạuṛiyakʼte okoe ińren bạiriko hoyakan onko do cẽṛẽ leka laga lagate ińko ṭuṭi akadińạ.

⁵³ Onko do maraoiń lạgitʼ khandṛaṅreko khańjo akadińa, ar cetan khon dhiriteko tińeń kana.

⁵⁴ Ińakʼ bohokʼ cetante dakʼ do ạtu paromena, hudisokʼkan tahẽkạnạń iń doń gujukʼkana.

⁵⁵ E Probhu Isor, ona khạndri khandṛaṅ khon amiń hohowatʼmea.

⁵⁶ Ar ińakʼ nehõr joṅakʼem ańjomketʼtińạ, “Goṛo ńam lạgitʼ iń rakʼamre lutur do alom bond esetʼkatama. ”

⁵⁷ Amiń hohoatʼme tahẽkanre am do sorregem ńamena, Arem metadińạ, “Alom botorokʼa. ”

⁵⁸ E Probhu Isor, am do iń secʼem hoyakana, ar ińakʼ jiwim chaḍaoketʼtińạ

⁵⁹ E Probhu Isor, ińre oka behokakʼ hoyakan ona dom ńel akatʼgea. Dhoromte baṛe bicạrkạtińme.

⁶⁰ Onkoakʼ sanam hala hạli dom ńelakatʼgea, iń upạrte joto soṛojontro reakʼ hõm ńelakada.

⁶¹ E Probhu Isor, onkoakʼ landa-dhutʼ reakʼ, ar iń upạrte soṛojontro reakʼ kathako hõm ańjomakatʼgea.

⁶² Ińren bạiriko do goṭa dinge iń upạrteko phasar phusuretʼ kana ar ạḍi lekan kathako roṛeda,

⁶³ Ńelme, onkoakʼ sanam kạmiko talate sereńate ińko landa-dhutʼạń kana.

⁶⁴ E Probhu Isor, onkoakʼ kạmi leka baṛe kuṛại emakom.

⁶⁵ Onkoakʼ mon baṛe keṭecʼ ocoytakome, ar amakʼ sarap do onkorege paṛao ocoyme.

⁶⁶ E Probhu Isor onko do edretem laga ńirkoa, ar amakʼ serma latar khonem maraokoa.