Numeri 5 - সান্তালী বাইবেল

Ḍeraren besapha hoṛko

¹ Probhu Isor do Moseye galmaraoadea,

² “Israelkom hukumakoa ḍeraren okoeko hoṛ do murhucʼ jom rog menakʼtako se okoeyakʼ hoṛmo khon besaphawakʼ oḍokokʼkan se mạ̃ṛĩ iạteko besaphage onkan hoṛ jemon ḍera khonko oḍok ocokʼ.

³ Baṅ doe maejiukan ar baṅ doe herel hoṛkan uni do oḍok giḍikae hoyokʼa. Nonkan hoṛ iạte ḍera jemon alo besaphakʼ onate onko do bahrete oḍok giḍikako hoyokʼa, ente iń do onḍe Israelko sãoteń tahenkana.”

⁴ Ar Israel hoponko doko onkakeda. Onko do ḍera khon onkan hoṛko oḍokketʼkoa. Probhu Isor Mose okalekae hukumade tahẽkan onkage Israelko doko kạmikeda.

Bepạtiạr reaṅ

⁵ Probhu Isor do Moseye galmaraoadea,

⁶ “Israel hoponkom metakoa, manwa okako kại ona reakʼ mitʼṭecʼ kạmikate jãhãe herel se maejiu Probhu Isorre bepạtiạre hoylen khan uni doe dusi ocokʼa.

⁷ Uni okae kại akatʼ ona do aṅgoc hoyokʼtaea. Ar okoe cetanreye behok akatʼ uni do khuti purun emkatae hoyokʼtaea. Okaṭakʼ jinis reaṅe behok akatʼ ona jinis reakʼ dam sãote arhõ mõṛẽ hĩs reakʼ mitʼ hĩs dam ḍher emokʼ hoyokʼtaea.

⁸ Khuti purun hatao lạgitʼ uni hoṛren jãhãe sor peṛa bae tahen khan ona do Probhu Isorakʼge hoyokʼa. Ona khuti purun ar uniyakʼ kại reakʼ puruchunren bheḍa do naekege emae hoyokʼa.

⁹ Israel hoponko okaṭakʼ sonotakʼ jinis naeke ṭhenko ạgui ona do jotoge uniyakʼ hoyokʼa.

¹⁰ Mitʼke mitʼ samaṅakʼ jinis do naekeakʼ hoyokʼtaea. Naekeakʼ tire jimạwakʼ jinis hõ uniyakʼge hoyokʼa.”

^11-13 Inạ tayom Probhu Isor do Moseye galmaraoadea, “Israel hoponkom baḍae ocokoa, jãhãeren rinicʼtetʼ bạṛicʼakʼ horteye taṛam ar jãwãetetʼ cetanre bepạtiạr iạte eṭakʼ herel sãoteye laṭghaṭ, ar acʼren jãwãe bae baḍae ar danaṅge tahen- ente uni upạrte jãhãn goha emokʼko bako tahen ar ona kạmire bae sapʼ ocoakan-

^14-15 ar rinicʼtetʼ cetanre inditʼ iạte jãwãetetʼ do monre jolon hecʼae enḍekhan uni do acʼren oṛakʼ hoṛ naeke ṭhene idiyea; ar rinicʼtetʼ bae bhõnḍ akanre hõ hereltetʼe inditʼae enḍekhan uni hõ naeke ṭhene idiyea. Ona sãote acʼren rinicʼtetʼ ńutumte samaṅokʼakʼ lạgitʼ mitʼ keji irạlsae gram jao reakʼ holoṅ idi torae hoyokʼtaea. Uni do noare jãhãn sunum se kunduru bae mesalakʼa ente noa do indidokʼ reakʼ jomakʼ samaṅokʼakʼ kana, metakʼme Probhu Isor ṭhen behokakʼ reakʼ samaṅokʼakʼ kana.

¹⁶ “Ar naeke do uni maejiu Probhu Isor samaṅreye teṅgoyea.

¹⁷ Ona tayom mitʼṭecʼ hasa reakʼ bhajanre thoṛa dakʼ ar sekʼwa tạmbu pinḍạ reakʼ thoṛa dhuṛi hataokate ona dakʼreye curuja.

¹⁸ Ar Probhu Isor samaṅre maejiue teṅgoyea ar uni maejiuakʼ bohokʼ upʼe raṛaetaea ar behokakʼ sodor lạgitʼe ạguakatʼ samaṅokʼakʼ jinis, metakʼme indidokʼ reakʼ jomakʼ samaṅokʼakʼ jinis uniyakʼ ańjlereye dohoaea. Ar naeke do acʼakʼ tire sarapakʼ haṛhatʼ dakʼe dohoya.

¹⁹ Ar ona tayom do maejiu kiriạ ocokateye metaea, “Bapla tayom jãhãe hoṛ am sãote bae laṭghaṭ akatʼ khan ar bạṛicʼ horte taṛamkate bam bhõnḍ akan khan noa sarapakʼ haṛhatʼ dakʼ do jãhãnakʼ alo baṛeye khutiytam ma.

²⁰ Menkhan bapla tayom bạṛicʼ horte senkate jãhãe tulucʼ loṭghoṭi reakʼem kạmi akatʼ arem bhõnḍ akan khan-

²¹ ar inạ hạbicʼ menkate naeke do uni maejiu cetanre sarap paṛaokʼ reakʼ mitʼṭecʼe kiriạ ocoyea are mena, ‘Probhu Isor do ḍanḍae borocʼ ocoytam ma ar lacʼe puṭritʼ ocoytam ma onate amren hoṛ sarap arko kiriạkʼre amakʼ ńutumko ńuma.

²² Ar niạ sarapakʼ dakʼ do amakʼ lacʼre bolokʼte amakʼ lacʼ phulạkʼa ar ḍanḍa do borojokʼtama.’ “Ar uni maejiu doe mena, ‘onage hoyokʼma.’

²³ “Naeke do onako sarap hartareye ola ar ona cetanre dakʼ dulkate ona ol do haṛhatʼ dakʼreye giḍikakʼa.

²⁴ Ar sarap reakʼ ona haṛhatʼ dakʼ do uni maejiue ńũ ocoyea ar uniyakʼ lacʼre bhijạukʼte ạḍitetʼ haṛhadea.

²⁵ Naeke do maejiuakʼ ti khon indidokʼ reakʼ jomakʼ samaṅokʼakʼ hataokate Probhu Isor samaṅreye dolaoa ar pinḍ ṭhene ạguiya.

²⁶ Ona tayom naeke do samaṅokʼakʼ khon mitʼ cuputʼ hataokate pinḍreye jereda. Ar ona tayom do maejiu ona dakʼe ńũ ocoyea.

²⁷ Maejiu do bhonḍkate jãwãe cetanre bepạtiạre tahen enḍekhan uni do sarapakʼ ona dakʼe ńũiy tayom ạḍitetʼ lacʼ hasoyea. Uniyakʼ lacʼ do phulạukʼtaea ar ḍanḍa hõ borojokʼtaea ar uni do acʼ jạtrenko talare mitʼṭen sarapanicʼe hoyokʼa.

²⁸ Menkhan maejiu do bhõnḍ baṅkateye saphage khan tobe do uni okaṭakʼteye dusi ocolen ona khon doe khalasokʼa ar gidrạ eṅgatokʼ reakʼ daṛe hõ tahentaea.

^29-30 “Jãhãe maejiu bapla tayom bạṛicʼ horte senkateye bhõnḍlen khan se jãhãe herel hoṛ indidokʼ iạte rinicʼtetʼ cetanreye jolonokʼ enḍekhan uni do niạ niạmtege kạmikatae hoyokʼa. Uni do Probhu Isor samaṅre acʼren rinicʼtetʼe idiyea ar naeke do ona niạm lekageye kạmikataea.

³¹ Nonkate jãwãetetʼakʼ behokakʼ lạlis khon chaḍaoe ńama, menkhan maejiue behok lekhan ona reakʼ kuṛại doe ńamgea.”