Numeri 36 - সান্তালী বাইবেল

Selophadren hoponerakoakʼ sompotti ạidạri joṅ reakʼ

¹ Joseph bõsrenkoakʼ bõs khon Gileadren judạ judạ bõsren mukhiyạko do hecʼkate Mose ar Israelren judạ judạ bõsren mukhiyạko sãote kathako roṛkeda. Gilead do Makirren hopon ar Manaseren goṛomtetʼ koṛae tahẽkana.

² Onkoko menkeda, “Israelko modre disạm reakʼ jaega jumi gulibãṭkate ṭhik reakʼ hukum emokʼ jokhecʼ Probhu Isor do aleren mạlike metade tahẽkana aleren boeha Selophadakʼ sompotti do jemon uniren hoponerako ńam.

³ Menkhan Israelkoren judạ gusṭiren hoṛko sãote noko kuṛiyakʼ bapla hoyokʼ enḍekhan aleren hapṛamkoakʼ sompotti khon onkoakʼ sompotti oḍokkate onkoren jãwãekoakʼ sompotti sãote midokʼtakoa, ar onate abo gusṭirenkoakʼ sompotti khon thoṛa hĩs do oḍokokʼa.

⁴ Israelkoakʼ ruạṛ ńam bochorre onkoakʼ sompotti do sesre akoren jãwãekoakʼ gusṭi reakʼ sompotti sãote midokʼa. Ar nonkate aboren hapṛamkoakʼ gusṭi reakʼ sompotti khon onkoakʼ sompotti do oḍok hoyokʼa.”

⁵ Unre Probhu Isorakʼ hukum leka Mose do Israelkoe metatʼkoa, “Josephren hoponkoakʼ noa gusṭiren hoṛko okako menakatʼ ona do ṭhikgea.

⁶ Onate Selophadren hoponerako reaṅ Probhu Isor do noae hukumeda, onko do akoakʼ kusi leka jãhãegeko bapla daṛeakoa, menkhan onko do akoren apattetʼakʼ gusṭiren hoṛ hoyokʼ jạruṛtakoa.

⁷ Israelkoakʼ sompotti do mitʼ gusṭi khon eṭakʼ gusṭite baṅ calakʼa. Mimitʼ Israelko do hapṛamko ṭhen khonko ńamakatʼ gusṭi reakʼ sompotti sapʼ dohoy hoyokʼtakoa.

⁸ Israelko jemon akoren hapṛam ṭhen khonko ńamakatʼ sompottiren mạlikko tahẽdaṛeakʼ onate Israel gusṭiren mimitʼ kuṛi owarisko do akoren apattetʼakʼ gusṭiren jãhãege baplako hoyokʼtakoa.

⁹ Oka sompottige mitʼ gusṭi khon eṭakʼ gusṭite do baṅ calakʼa. Israelren mitʼke mitʼ gusṭi do ńamakʼ sompotti sapʼ dohoy hoyokʼtakoa.”

^10-11 Unre Mahala, Thirsa, Hogla, Milkạ ar Noateko ńutuman Selophadren hoponerako do Mose hotete emakʼ Probhu Isorakʼ hukum lekageko kạmikeda.

¹² Onko do Josephren hopon Manase bõsregeko baplayena. Onate onkoakʼ sompotti do akoren apattetʼakʼ bõs ar gusṭirege tahẽyena.

¹³ Jerikho samna sạmni jordan gaḍa aṛe Moab reakʼ otetre Probhu Isor do Mose hotete Israelko noa hukum ar niạme ematʼko tahẽkana.