Numeri 35 - সান্তালী বাইবেল

Liwikoakʼ ato ar nagrahako

^1-2 Jerikho samna sạmni jordan gaḍa aṛe Moab otetre Probhu Isor do Mose hotete Israelkoe hukumatʼkoa, “Sompotti ńam tayom ape do ona khon Liwiko tahen lạgitʼ thoṛa ato ar nagrahape emakoa, ar ona sãote onkoren ạsul janwarko ạtiń lạgitʼ jaegahõpe emakoa.

³ Onate Liwiko do tahen lạgitʼ nagrahako ńama ar onkoren ḍaṅgrako, bhiḍiko, meromko ar judạ judạ ạsul janwarko lạgitʼ ạtiń ṭạnḍi hõko ńama.

⁴ “Okako ato ar nagrahako Liwipe emako ona khon ạsul janwar ạtińko lạgitʼ ạtiń ṭạnḍi do ato se nagraha reakʼ pạcri khon beṛhaete mitʼ hajar moka hạbicʼ jemon tahen.

⁵ Mimitʼ ato se nagraha do talare dohokate ona bahre utạr ar dạkhin secʼ bar hajar moka, purub ar pạchim secʼ bar hajar mokape soṅakoa. Noage onko do ato se nagraharen ạsul janwarko lạgitʼ ạtiń ṭạnḍi lekako ńama.

⁶ “Okako ato ar nagrahako Liwikope emako ona modre turui goṭecʼ do asrayokʼ nagrahape benaoakoa. Ar jãhãe hoṛ jãhãegeye gocʼ emanle khan enḍekhan uni do onako asrayokʼ nagraha reakʼ mitʼṭecʼte senkateye dạṛ bańcao daṛeakʼa. Onako chaḍa onko do arhõ pongel bar goṭecʼ atope emakoa.

⁷ Ape do jotote pongel irạl ato ar nagrahako Liwikope emakoa ar onako reakʼ beṛhaete mĩhũ-merom ạtiń ṭạnḍiko hõ jemon tahen.

⁸ Israelkoakʼ sompotti khon okako ato ar nagrahako Liwikope emako ona do mimitʼ gusṭirenkolekate sompottipe bujhạuakoa. Ar okoe gusṭirenkoakʼ hạṭińre ḍher ato se nagraha paṛaokʼ ona gusṭirenko do ḍher ar oka gusṭirenkoakʼ hạṭińre thoṛa ato ar nagrahako paṛaokʼ ona gusṭirenko khon do kompe hataotakoa.”

Asrayokʼ nagrahako

^9-11 Inạ tayom Probhu Isor do Mose Israelko galmaraoakoe metadea, “Jordan gaḍa paromkate Kanan disạmte senkate ape apnar lạgitʼ asrayokʼ nagrahape bachao joṅa jemon jãhãe hoṛ ackage jãhãeye gocʼ lekhan uni do onḍeye dạṛ bańcao daṛeakʼa.

¹² Noako nagraha do hakʼla ruạṛicʼakʼ ti khon rukhiyạ ńam lạgitʼ hoyokʼa, jemon uni do khũn iạte Israelkoakʼ bicạrre teṅgokʼ lahare aloe gujukʼ.

¹³ Nõkʼõe turui goṭecʼ okako nagraha Liwikope emako ona do ape lạgitʼ asrayokʼ nagraha hoyokʼa.

¹⁴ Noako reakʼ pea do jordan gaḍa purub aṛere tahena ar pea do tahena Kanan disạm talare.

¹⁵ Niạ turui goṭecʼ nagraha do Israel hoponko lạgitʼ ar upriạko lạgitʼ okoe do ape talareko berelakan hoṛko lạgitʼ asrayokʼ nagraha hoyokʼa. Jãhãe hoṛ ackage jãhãeye gocʼle khan uni do onḍeye ńir bańcao daṛeakʼa.

¹⁶ “Jãhãe hoṛ mẽṛhẽtʼ reakʼ jãhãnakʼ jiniste jãhãeye mage ar onate uniye gujukʼ tobe uni doe khũniạhi kana. Ar uni khũniạhi hoṛ do goje hoyokʼa.

¹⁷ Okaṭakʼte manwae gujukʼ nonkan jãhãn dhiri jãhãeakʼ tire tahen ar onate jãhãeye tińe ar onate uniye gujukʼ enḍekhan teteńicʼ hoṛ doe khũniạhi kana. Ar uni khũniạhi hoṛ do goje hoyokʼa.

¹⁸ Manwae gujukʼ nonkan jãhãn kaṭ reakʼ jinis jãhãeakʼ tire tahen ar jãhãe dale ar onate uniye gujukʼ enḍekhan uni dadalicʼ hoṛ doe khũniạhi kana. Ar uni khũniạhi hoṛ do goje hoyokʼa.

¹⁹ Khũn akan hoṛakʼ mãyãm reakʼ hala hạli okoeye hatao unige uni khũniạhi do goje hoyokʼtaea; are ńamle khan jemon uni doe gocʼ giḍikae.

^20-21 Jãhãege kurud iạte jãhãe hoṛe kuhạue se tãṛãkʼaeteye capade ar uniye gujukʼ enḍekhan uni gogocʼicʼ doe khũniạhi kana; uni do gocʼ giḍikae hoyokʼa. Ar khũn akan hoṛakʼ mãyãm reakʼ hala hạli okoeye hatao uni do khũniạhiye ńamle khan jemone goje.

^22-24 “Menkhan begor bene bạirite jãhãe bhulte jãhãeye kuhạue se jãhãnakʼteye capade se begor ńelte jãhãn dhiri uni cetanreye giḍiyae ar onate uniye gujukʼ, enḍekhan uni hoṛren bạiriye baṅkanre hõ ar uni hạne reakʼ monsubạ baṅ tahẽkantaere hõ noako niạm lekate Israelkoakʼ mãyãm reakʼ hala hạli okoe hataoe menetʼkan uni ar khũniạhĩ talare bicạr hoyokʼa.

²⁵ Bicạrre manḍerren hoṛko do unre mãyãm reakʼ haha hạli okoe hataoe menetʼ uniyakʼ ti khon khũn iạte dạyi akade hoṛ do rukhiyạkate ona asrayokʼ nagrahate kolkae hoyokʼa okare uni do dạdạṛe menletʼ tahẽkan. Ar sonot sunumte ojokʼakade maraṅ naekeakʼ gujukʼ ạuri hoyokʼ hạbicʼ uni hoṛ do onḍege tahen hoyokʼtaea.

^26-27 Menkhan uni hoṛ do jãhãtisokʼ ona asrayokʼ nagraha khon bahreteye oḍok hijukʼ ar mãyãm reakʼ haha hạli okoe hataoe menetʼkan uni do nagraha bahrereye uni khũniạhi hoṛe gocʼ daṛeaea, ar ona khũn iạte uni do jãhãn dạyire bae paṛaokʼa.

²⁸ Ar maraṅ naeke ạuriye gujukʼ hạbicʼ uni hoṛ do asrayokʼ nagraha bhitrirege tahen hoyokʼtaea. Eken maraṅ naekeye gocʼlen khan uni do acʼakʼ jaegateye ruạṛ hecʼ daṛeakʼa.

²⁹ Disạm bhitrire jãhãregepe girobasokʼ, onḍe piṛhike piṛhi ape lạgitʼ noakoge ạn reakʼ dhara lekate tahena.

³⁰ “Gohayicʼakʼ goha cetanre ṭehãḍkate khũniạhi do goje hoyokʼa. Tobe eken mitʼ hoṛakʼ goha cetanre ṭehãḍkate okoehõ alope gocʼkoa.

³¹ Okoe khuniạhĩ do gujukʼ sạjại ńam lek kane, uni do ṭakate hõ alope chaḍaoea. Uni do gojetege hoyokʼa.

³² Asrayokʼ nagrahateye dạṛ akatʼ jãhãe hoṛge ṭaka bodolte maraṅ naekeakʼ gujukʼ lahare acʼakʼ ḍinḍạre senkate bae girobas daṛeakʼa.

³³ Apeakʼ disạm do alope besapha ocoya, ente mãyãmpe joro oco lekhan disạm do besaphakʼa. Ar oka disạmre mãyãm jorokʼ onḍe do mãyãm joro ocoyicʼakʼ mãyãm chaḍa ar okalekate hõ ona reakʼ chut do baṅ dapalokʼa.

³⁴ Ente ape oka disạmrepe tahen ińhõ onḍegeń tahena ar ona iạte disạm do alope besapha ocoya. Ar iń Probhu Isorge Israelko talareń girobasokʼ kana.”