Numeri 34 - সান্তালী বাইবেল

Kanan disạm reakʼ simạnako

^1-2 Probhu Isor do Mose Israelko noa hukumakoe metadea, “Kanante bolokate sompotti mente oka disạmpe emocokʼ ona reakʼ simạna do nonka hoyokʼa:

^3-4 “Edom disạm reakʼ simạna aṛe reakʼ oka Sin hahaṅkar menakʼ ona reakʼ thoṛa hĩs do apeakʼ disạm reakʼ dạkhin secʼ hoyokʼtapea. Ar Purub secʼ apeakʼ noa dạkhin simạna do buluṅ doreão reakʼ mucạtʼ hạṭiń khon ehopʼkate Akrabim buru horte paromkate Sin buluṅ doreão secʼ ucuń bolokate Kades reakʼ dạkhin hạbicʼ calakʼa. Ar ona tayom do Hasor Adar secʼ hecʼkate Asmon hạbicʼ calakʼa.

⁵ Ona tayom onḍe khon ạcurkate Misor ńutuman okaṭakʼ rohoṛ gaḍa menakʼ ona secʼte jalapurire senkate mucạdokʼa.

⁶ “Apeakʼ disạm reakʼ pạchim secʼ simạnako do jalapuri hạbicʼ hoyokʼa. Noage apeakʼ pạchim senakʼ mucạtʼ simạ do tahena.

^7-9 “Utạr secʼakʼ simạ lạgitʼ do jalapuri khon Hor buru ar Hor buru khon Hamat hạbicʼ mitʼṭecʼ simạna dagpe ṭhika dohokakʼa. Ar onḍe khon ona simạna dag do Sedad secʼte Siphron hạbicʼ parom calakʼa ar Hasar Enante senkate mucạdokʼa. Ar noage hoyokʼa apeakʼ utạr secʼ reakʼ mucạtʼ simạna do.

¹⁰ “Purub secʼ reakʼ simạna lạgitʼ do Hasar Enan khon Sepham hạbicʼ mitʼṭecʼ simạna dagpe ṭhik dohokakʼa.

¹¹ Noa simạna dag do Sepham khon Enan secʼte Ribla hạbicʼ pheḍ hijukʼa ar Kenerot doreão reakʼ jaegako secʼte calao idikʼa.

¹² Ona tayom niạ simạna dag do jordan reakʼ buluṅ doreãote senkate mucạdokʼa. “Beṛhaetaeakʼ niạko simạna dag bhitrire noage hoyokʼa apeakʼ disạm do.”

¹³ Inạ tayom Mose do Israelko hukumatʼkoteye metatʼkoa, “Ape do gulibãṭ hotete Probhu Isorakʼ hukum leka disạm do aperen are gusṭi ar Manasekoren adha gusṭi talarepe hạṭińakoa ar apeakʼ sompottipe hoeocoya.

¹⁴ Ente Ruben gusṭirenko, Gad gusṭirenko ar Manaseren adha gusṭiren bõsko do laharege akoakʼ sompottiko ńamakatʼ tahẽkana.

¹⁵ Onko do Jerikho samaṅ secʼ jordan purub aṛere sompottiko ńamkeda.”

Disạm hạṭiń lạgitʼ mukhiyạkoko bhar ocokʼkan

¹⁶ Probhu Isor do Moseye metadea,

¹⁷ “Sompotti lekate okoe disạmko hạṭińape unkin dokin hoyokʼkana naeke Eleasar ar Nunren hopon Josuạ.

¹⁸ Ar sompotti hạṭińape reakʼ kạmire goṛo emakin lạgitʼ mimitʼ gusṭiko khon mitʼṭen mukhiyạ do hataoe hoyokʼa.

¹⁹ Onko mukhiyạko doko hoyokʼ kana: Jihudạ gusṭiren Jephun hopon Kaleb:

²⁰ Simeon gusṭiren do Amihud hopon Samuel;

²¹ Benjạminren gusṭiren do Kision hopon Elidad;

²² Dan gusṭiren do Jogli hopon Buki;

²³ Josephren hopon Manase gusṭiren mukhiyạ Ephodren hopon Haniel;

²⁴ Josephren hopon Ephrayem gusṭiren mukhiyạ Siphtanren hopon Kemuel;

²⁵ Sebulon gusṭiren mukhiyạ Parnak hopon Elisaphan;

²⁶ Isakar gusṭiren mukhiyạ Asanren hopon Paltiel;

²⁷ Aser gusṭiren mukhiyạ Selomi hopon Ahihud;

²⁸ Napthali gusṭiren mukhiyạ Amihud hopon Pedahel.”

²⁹ Kanan disạmre Israelko talare sompotti lekate jaega hạṭińako lạgitʼ Probhu Isor do noko hoṛkoe doholetʼkoa.