Numeri 33 - সান্তালী বাইবেল

Daṛan horre Israelkoakʼ jirạukʼ

¹ Mose ar Aronakʼ ạyurte Israelko do palṭonko leka Misor disạm khon oḍok tayom judạ judạ jaegare ḍera ḍerateko calakʼkan tahẽkana.

² Ar daṛan horre okako jaegareko ḍeralen Probhu Isorakʼ hukumte Mose do onae ol dohokeda. Ar okako jaegareko ḍeralen ona do hoyokʼkana:

³ Bańcaokʼ porob reakʼ dosar hilokʼ bochor reakʼ pạhil cando reakʼ gelmõṛẽ tạrikre Israelko do Ramases khonko mohnḍalena. Onko do sanam Misrikoakʼ mẽtʼãhã samaṅ khonko oḍok hecʼlena.

⁴ Ar misriko do unre akoren pạhil hoponkoko topayetʼko tahẽkana. Probhu Isor do onkoren pạhil hoponkoe gocʼletʼkoa ar onkoren debotakoe sạjạiletʼkoa.

⁵ Israelko do Ramases bạgi oṭowatʼte Sukotre hecʼkateko ḍerayena.

⁶ Ona tayom onko do Sukot bạgiyatʼte hahaṅkar aṛe reakʼ Ethamreko ḍerayena.

⁷ Etham bạgikate onko do Bakʼal Sephon samaṅ reakʼ Pi-Hakirotte ruạṛ hecʼkate Migdol ṭhenko ḍerayena.

⁸ Onko do Pi-Hakirot bạgiyatʼte jalapuriko paromkeda ar Etham hahaṅkar ṭoṭhateko rakapʼena ar ona talate pe din reakʼ horte senkate Marareko ḍerayena.

⁹ Marako bạgiyatʼte Elimreko ḍerayena. Onḍe do gelbar goṭecʼ dakʼ jharna ar eaegel khijur dare tahẽkan.

¹⁰ Tayomte onko do Elim bạgiyatʼte arakʼ jalapuri aṛere senkateko ḍerayena.

¹¹ Ona tayom onko do arakʼ jalapuri khon uṭhạuente Sin hahaṅkarreko ḍerayena.

¹² Sin hahaṅkar bạgikate onko do Dophkare senkateko ḍerayena.

¹³ Dophka bạgikate Alusreko ḍerayena.

¹⁴ Alus khon uṭhạukate Rephidimre senkateko ḍerayena. Noḍe do hoṛko lạgitʼ jãhãn dakʼ baṅ tahẽkana.

^15-35 Rephidim bạgiyatʼte onko do Sinại hahaṅkarre senkateko ḍerayena. Inạ tayom onko do por por okako jaegareko ḍerayena ona do hoyokʼ kana, Kibrot-hatwa, Haserot, Rithma, Rimon-Peres, Libna, Risa, Kehelatha, Sepher buru, Harada, Makhelot, Tahat, Tarah, Mithka, Hasmon, Moserat, Bene-jakan, Hor-hagidgag, Jotbatha, Aorona ar E Sion-geber.

³⁶ Inạ tayom onko do Sin hahaṅkar talate Kadeste senkateko ḍerayena.

³⁷ Kades bạgikate onko do Edom reakʼ simạna ṭhen Hor burureko ḍerayena.

³⁸ Israelko Misor disạm khonko oḍok hecʼen tayom pongel bochor reakʼ mõṛẽ cando reakʼ pạhil dinre Probhu Isorakʼ hukumte naeke Aron do Hor buru coṭteye rakapʼ calaoena ar onḍegeye gocʼena.

³⁹ Hor buru cetanre Aronakʼ gujukʼre uniyakʼ umer do mitʼsae bargel pe bochor tahẽkantaea.

⁴⁰ Inạko dinre Aradren Kanani raj do Israelkoakʼ hijukʼ reakʼ khobore ańjom ńamletʼa. Uni do Kanan disạm reakʼ Negebreye tahenkan tahẽkana.

^41-47 Inạ tayom Israelko do Hor buruko bạgiyatʼte okakoreko ḍera idilena ona do hoyokʼkana, Salmona, Punon, Obot, Moab simạ reakʼ Iye-ebarim, Dibon-gad ar Almon-diblathaimre. Ona tayom onko do Ebarim buru ṭhenko seṭeren khan Nebo buru ṭhenko ḍerayena.

⁴⁸ Ona tayom onko do Ebarim buru bạgikate Jerikho samaṅ senakʼ jordan gaḍa aṛe reakʼ Moab otetre senkateko ḍerayena.

⁴⁹ Nonḍe doko ḍeralena jordan gaḍa aṛe reakʼ Moab otet reakʼ Beth-jesimot khon Abel Siṭim nagraha hạbicʼ.

Jordan gaḍa paromokʼ lahareye galmarao akokan

^50-52 Jerikho samaṅ secʼ jordan gaḍa aṛe reakʼ Moab otetre Probhu Isor do Mose Israelko noa katha lạiyakoe metade tahẽkana, “Ape do jordan gaḍa paromkate Kanan disạmte senkate apeakʼ hor khon disạmren sanam hoṛpe laga oḍokkoa. Onkoren dhiriren boṅga ar dul bekʼnao boṅgako reakʼ joto muṭhạnko ar buru coṭ reakʼ joto pinḍkope rạputʼ giḍikatakoa.

⁵³ “Ar inạ tayom do ona disạmpe dokhol joṅa arpe girobasokʼa ente ona dokhol lạgitʼgepe em ocoakana.

⁵⁴ Ape do loṭarikate judạ judạ bõsrenkoakʼ jaegape ṭhik dohoakoa. Ar bõsren hoṛkoakʼ lekha ḍher hoylen khan ḍher jaega ar kom hoylen khan do kom jaegape emakoa. Loṭarikate oka bõsrenko lạgitʼ jaega okare rakabokʼ ona bõsrenko do ona jaegage emako hoyokʼa. Gusṭiren judạ judạ bõsko do gusṭiko talarege jaegako ńama.

⁵⁵ “Menkhan ona disạmren hoṛko bape laga ńirko enḍekhan okoepe tahẽocoako onko do apeakʼ mẽtʼre bạ̃ṛsi leka ar pańjra reakʼ jạnum lekako hoyokʼa. Ar ona disạmrepe girobasokʼre onko do apeko cipạpea.

⁵⁶ Ar iń do onageń onkaea one okaṭakʼ onko lạgitʼ iń ṭhik dohoakatʼ.”