Numeri 32 - সান্তালী বাইবেল

Jordan gaḍa purub secʼren bõsko

¹ Ruben ar Gad gusṭiren hoṛkoren do ạḍi aema bhiḍi merom ar ḍaṅgra palko tahẽkantakoa . Onko do Jaser ar Gilead disạm do janwar ạsulko lạgitʼ ạḍi napae jaegakana menteko ńelketʼ khan,

² onko do Mose ar naeke Eleasar ar Israelren mukhiyạko ṭhen senkateko menkeda,

^3-4 “Probhu Isor do Ararot, Dibon, Jaser, Hesbon, Elale, Sebam, Nebo ar Beon ńutumanakʼ okako jaega Israelkoakʼ tabereye ạguakatʼ onako do ạsul janwarko lạgitʼ ạḍi mońj ạtiń ṭạnḍiko kana, ar aperen noko gutikoren hõ ạsul janwarko menakʼkotalea.

⁵ Ale cetanre daya hoylen khan ale amren golamko do noako jaegage sompotti lekate danaleme. Ar jordan gaḍa hanasa do alom idilea.”

⁶ Onate Mose do Gad ar Ruben gusṭiren hoṛkoe metatʼkoa, “Aperen boehako do lạṛhạiko oḍok calakʼa ar ape do nonḍe duṛupʼ hape akanpe tahena?

⁷ Probhu Isor Israelko okaṭakʼ disạme emakawatʼko onḍe calakʼ lạgitʼ nokoakʼ ahkaokʼ mon do cedakʼpe rạputʼetʼtakoa?

⁸ Disạm ciyạ ạgui lạgitʼ aperen baba-hapṛamko tinre Kades khoniń kolletʼkoa unre onko hõ ṭhik nonkageko kạmileda.

⁹ Eskol buru lodam hạbicʼ senkate disạm ciyạ baṛakate onko do Probhu Isore emakʼ disạmte calakʼ lạgitʼ hoṛkoakʼ ahkaokʼ monko rạputʼletʼtakoa.

¹⁰ Ar enhilokʼ Probhu Isor doe edre seṅgelente ar kiriạkateye menleda,

¹¹ ‘okaṭakʼ disạm emokʼ reakʼ katha Abraham, Isahak ar Jakob ṭhen kiriạkateń gokʼletʼ ona disạm do Misor disạm khon oḍok hecʼ akan bargel se ona khon ḍher umerren okoe hõ bako ńela, ente onko do ińakʼ katha purạte bako manaoleda.

¹² Eken Kenisi Jephunren hopon Kaleb ar Nunren hopon Josuạ do ona disomkin ńela, ente unkin do ińakʼ katha purạtekin manao akada.’

¹³ Israelko cetanre Probhu Isorakʼ edre do rakapʼena ar uni samaṅre bạṛicʼko kạmikan sanam hoṛko ạuriko marao cabakʼ hạbicʼ pongel bochor hạbicʼ uni do hahaṅkarreye ạcur baṛaletʼkoa.

¹⁴ “Ape kạiyanko do, aperen baba hapṛamko bodoltepe upel akana ar Probhu Isorakʼ edre seṅgel do Israelko cetanre arhõpe sarsao ocoakatʼtaea.

¹⁵ Ar uniyakʼ katha leka jodi bape calakʼ, enḍekhan niạ dhao hõ hahaṅkarre uni do noko hoṛkoe doho giḍikakoa, ar ape iạtege onkoakʼ maraokʼ do hoyokʼtakoa.”

¹⁶ Unre onko do Mose ṭhen senkateko menkeda, “Ale do eken aleren ạsul janwarko ar aleakʼ gharońjko lạgitʼ nagraha benaole menjoṅkana.

¹⁷ Menkhan Israelko akoakʼ jaegare ạurile idi seṭerko hạbicʼ ale hõ lạṛhại reakʼ khanḍabhanḍa horokʼkate onko lahate calakʼle sapṛaogea. Ar inạko dinre aleakʼ gharońjkoren do pạcri esetʼ nagrahareko tahẽ hataṛokʼa jemon niạ disạmren hoṛkoakʼ ti khon rukhiyạko ńam.

¹⁸ Ar ale do Israelko akoakʼ sompotti ạuriko ńam hạbicʼ aleakʼ oṛakʼte bale ruạṛ hijukʼa.

¹⁹ Ale do Israelko sãote jordan gaḍa hanasa reakʼ sompottiko hõ bale hataoa, ente gaḍa purub secʼ reakʼge coṅ ale male ńametʼkan.”

^20-21 Niạ katha ańjomkate Mose do onkoe metatʼkoa, “Ape onape onkae khan, ar Probhu Isor samaṅre lạṛhại reakʼ khanḍa bhanḍawante bạiriko ạuribo laga ńirko hạbicʼ ape sanamko lạṛhại reakʼ sajte Probhu Isor samaṅte gaḍa hanasape calakʼ,

²² enḍekhan Probhu Isor gobolre disạm hecʼlen tayom ape dope ruạṛ calao daṛeakʼa ar unre Probhu Isor ar Israel jạtrenko cetan reakʼ dạyik khon rehaepe ńama; ar unre Probhu Isor samaṅre niạ jaega do apeakʼ sompottige hoyokʼa.

²³ Menkhan bape onkae enḍekhan ape do Probhu Isor upạrtepe kạiya. Ar noa baḍaekakʼpe, ona iạte apeakʼ kại khon rehae do bape ńama.

²⁴ Ape do aperen hoponko lạgitʼ nagrahape benao daṛeakʼa ar merom bhiḍikoakʼ tahen oṛakʼko hõpe benao daṛeakʼa, menkhan okaṭakʼpe gokʼketʼ ona do kạmi purạutege hoyokʼtapea.”

²⁵ Unre Gad ar Ruben gusṭirenko do Moseko metadea, “Am do aleren mạlik kanam, am okaṭakʼem hukum ale, amren golamko do onagele kạmiya.

²⁶ Aleren hoponko, bạhuko, meromko, bhiḍiko ar ḍaṅgrako do Gilead reakʼ ona nagraharegeko tahena.

²⁷ Menkhan ale do aleren mạlikakʼ katha leka lạṛhại reakʼ khanḍa bhanḍawante Probhu Isor samaṅte gaḍale paromokʼa.”

²⁸ Unre Mose do noko hoṛko reaṅ naeke Eleasar, Nunren hopon Josuạ ar Israel gusṭiren judạ judạ bõsren mukhiyạkoe hukumatʼkoa.

²⁹ Uni doe metatʼkoa, “Gad ar Ruben gusṭiren herel hoponko lạṛhại reakʼ khanḍa bhanḍawante Probhu Isor samaṅte lạṛhại lạgitʼ ape sãote jordan gaḍako parom calakʼa, ar disạm do ape gobolre hecʼlenre Gilead do sompotti lekate onkope emakoa.

³⁰ Menkhan onko bako onkae enḍekhan Kanan disạmrege ape sãote onko hõ sompottipe hạṭińakoa.”

³¹ Niạ katha ańjomkate Gad ar Ruben gusṭiren hoṛko menkeda, “Probhu Isor okae menakatʼ amren golamko do onagele onkaea.

³² Ale do Probhu Isor samaṅre lạṛhại reakʼ khanḍa bhanḍawante gaḍa paromkate Kanan disạmtele calakʼa, menkhan aleakʼ sompotti do gaḍa niạ sa aṛerege tahentalea.”

³³ Unre Mose do Amorikoren Sihon rajakʼ rajosṭi ar Basonren Og rajakʼ rajosṭi do Gad ar Ruben gusṭiren hoṛko ar Manasi adha gusṭiren hoṛkoe hạṭińatʼkoa. Nui Manasi do Josephren hopone tahẽkana. Ato ar nagraha ar onako beṛhaeteakʼ jaega goṭage onko lạgitʼe dohokeda.

³⁴ Gad gusṭiren hoṛko do Dibon, Atarot, Aroer.

³⁵ Atrot Saphan, Jaser, Jogbeha,

³⁶ Bet-Nimra ar Bet-Haran ńutumanakʼ atoko ar nagrahako do pạcriteko esetʼ ạcurkeda ar akoren ḍaṅgrako ar bhiḍiko lạgitʼ hõ oṛakʼko benaokeda.

^37-38 Ruben gusṭiren hoṛko do Hesbon, Elale, Kirjathayim nagraha ar Nebo, Bakʼal Meon ar Sibma ńutumanakʼ atoko benaokeda. Ar okako atoko benaoketʼ onako do nãwãteko ńutum arokeda. Nebo Bakʼal Meon ato reakʼ ńutum doko bodol akatʼtahẽkana.

³⁹ Manasi hopon Makirren bõsko do Gilead disạmte senkate laharege disạmko dokhol akatʼ tahẽkana ar onḍe okoe Amoriko tahẽkan onkoko laga ńirketʼkoa.

⁴⁰ Onate Mose do Manase bõsren Makeriko lạgitʼ do Gileade ematʼkoa. Ar onko do onḍe tahenko ehopʼena.

⁴¹ Jayer ńutuman Manaseren mitʼ bõsren hoṛ do senkate Amorikoakʼ atoko dokhol akatʼ tahẽkana ar onako reakʼ ńutum do Habot Jayerko dohokeda.

⁴² Ar Noba do senkate Kenat ar ona aḍepase reakʼ atoko dokholkate acʼakʼ ńutum lekate ona jaega reakʼ ńutum do Nobae dohokeda.