Numeri 31 - সান্তালী বাইবেল

Midiạnrenko upạrte dhorom lạṛhại

¹ Probhu Isor do Moseye metadea,

² “Am do Israelko ńutumte Midiạnkoakʼ behok reakʼ hala hạlime. Ar ona tayom do amren hapṛamko ṭhenem calakʼa.

³ Unre Mose do Israelkoe metatʼkoa, “Midiạnko birudre lạṛhại lạgitʼ ape mod khon thoṛa hoṛ sapṛaokope, jemon onko do Probhu Isor ńutumte Midiạnko cetanreko hala hạli daṛeakʼ.

⁴ Ape do Israelren mimitʼ gusṭi khon mitʼ hajarkate hoṛko hataokate lạṛhạipe kolkoa.”

⁵ Onate Israelren gelbar gusṭiko khon gelbar hajar hoṛ do lạṛhại lạgitʼko sapṛaoketʼkoa.

⁶ Ar Mose do mimitʼ gusṭiko khon mitʼ hajarkate hoṛ hataokate lạṛhại lạgitʼe kolketʼkoa. Onko sãote naeke Eleasarren hopon Pinhas hõ lạṛhại lạgitʼe kolkedea. Uni do thoṛa sonot jinisko ar pẽpṛẽtʼkine soṅge torakeda.

⁷ Probhu Isor Moseye hukumakawade leka onko do Midiạnrenko sãote lạṛhạikate sanam herel hoṛko gocʼketʼkoa.

⁸ Onko do Midiạnrenko sãote eṭakʼ mõṛẽ goṭen raj hõko gocʼketʼkoa. Onkoakʼ ńutum do hoyokʼ kana, Ebi, Rekom, Sur, Hur ar Reba. Israelko do Beorren hopon Biliam hõ tarwaṛeteko gocʼkedea.

⁹ Onko do Midiạnren maejiuko ar gidrạkoko bondiketʼkoa ar onkoren sanam ḍaṅgrako, meromko, bhiḍiko ar onkoakʼ jiniskoko luṭketʼtakoa.

¹⁰ Ar Midiạnrenko okako nagrahareko girobasokʼ kan tahẽkan ar nagraha bahre okoeko ḍera akan tahẽkan onkoakʼ sanamakʼ do seṅgelteko jeretʼ giḍikatʼtakoa.

^11-12 Ona tayom onko do luṭakʼ jinisko, janwarko, manwako soṅgekate Mose, naeke Eleasar ar sanam Israelko ṭhenko ruạṛ calaoena. Unre onko do Jerikho samaṅ secʼ jordan gaḍa aṛe reakʼ Moab ṭạnḍireko ḍera akan tahẽkana.

¹³ Unre ḍerareko tahẽkan Mose, naeke Eleasar ar Israelren mukhiyạko do jotoge onko sãote ńapamokʼ lạgitʼko oḍok hecʼena.

^14-15 Ar palṭonko, metatʼme okoeko do hajarko cetanren subedarko tahẽkan ar okoe do mitʼsae hoṛko cetanren subedarko tahẽkan onko lạṛhại khonko ruạṛ hecʼen khan Mose do onko cetanre ạḍiye raṅgaoena are kuliketʼkoa, “Ape do enḍekhan sanam maejiuko jiwetʼpe dohoakatʼkoa!

¹⁶ Ńelpe nokoge Biliamakʼ kathate Israel hoponkoko bulạuletʼkoa Peor babotteakʼ kathare Probhu Isor upạrteko bepạtiạr ocoletʼkoa onate Probhu Isorren hoṛko talare mahamạri do paṛaolena.

¹⁷ Ńitokʼ do noko koṛa gidrạko ar tinạkʼ do herelakʼ mẽtʼãhãko ńelakatʼ nonkan joto maejiu do gocʼ giḍikakope;

¹⁸ menkhan okoe do herel tulucʼ bako giticʼmitʼ akan arko kũạrige eken onko moto ape lạgitʼ jiwetʼ dohokope.

¹⁹ “Ar ape modre okoe do hoṛpe gocʼakatʼko se gocʼ hoṛpe joṭetʼ akatʼko khan onko eae din hạbicʼ ḍera bahrere tahen hoyokʼtapea. Ar tesar ar eae din hilokʼ do ape apnartetʼ ar bondikatepe ạguakatʼko hoṛko saphakʼ hoyokʼtapea.

²⁰ Apeakʼ sanam kicricʼ khạnḍwạkʼko ar harta reakʼ, kaṭ reakʼ ar meromakʼ upʼte benaoakʼ sanamakʼ jinisko hõ saphae hoyokʼtapea.”

²¹ Eleasar naeke do lạṛhạiko senlen palṭonkoe metatʼkoa, “Noa do hoyokʼ kana Mose hotete Probhu Isore emakan ạn-ạri.

^22-23 Sona, rupạ, pitạl, mẽṛhẽtʼ, ṭin, sisạ ar jãhãnakʼge okaṭakʼ do seṅgelte baṅ nosṭokʼ onako do seṅgel talatepe paroma ar ona tayom do saphakʼa. Menkhan enhõ onko do saphakʼ reakʼ dakʼte saphae hoyokʼa. Ar okako jinis do seṅgelte nosṭokʼ ona do saphakʼ reakʼ dakʼre topoe hoyokʼa.

²⁴ Eaeakʼ dinre ape do apeakʼ kicricʼkope saphaea arpe saphakʼa ar ḍera bhitritepe bolo daṛeakʼa.”

Luṭakʼ jinisko hạṭiń reaṅ

²⁵ Inạ tayom Probhu Isor do Moseye metadea,

²⁶ “Naeke Eleasar, am ar Israelkoren mukhiyạko ape do luṭkateko ạgu ocoakan joto manwa ar janwarkope lekhakoa.

²⁷ Ar luṭ ạguakʼ jotowakʼ dope bar hạṭińa ar mitʼ hạṭiń do palṭonko ar sarecʼ hạṭiń do somajren hoṛpe hạṭińakoa.

²⁸ Palṭonkoakʼ hạṭińre tinạkʼ paṛaokʼ baṅ do manwa, baṅ do ḍaṅgra, baṅ do gadha, baṅ do bheḍa ar meromko onko reakʼ mimitʼ mõṛẽsae khon mitʼṭenkate do Probhu Isor ńutumte bheja menkatepe begarkoa.

²⁹ Palṭonkoakʼ hạṭiń reakʼ noko bheja do Probhu Isor ńutumte tulokʼ samaṅokʼakʼ lekate naeke Eleasar ṭhenpe jimạkoa.

³⁰ Israelkoakʼ hạṭiń reakʼakʼko baṅ do manwa, baṅ do ḍaṅgra, baṅ do gadha, baṅ do bhiḍi, merom se eṭakʼ jãhãn janwarko onko reakʼ mimitʼ mõṛẽgelko khon mitʼṭenkatepe begarkoa. Ar onko do Liwikope emakoa okoe cetanre sekʼwa tạmbu reakʼ ńeljut lạgitʼ bhar emakan.”

³¹ Probhu Isor Mose okakoe hukumade tahẽkan onkage uni ar naeke Eleasar do jotowakʼkin kạmikeda.

³² Palṭonko luṭ ạgu akatʼko khon tinạkʼko sarecʼen onko modre turui lak eaegel mõṛẽ hajar bhiḍi ar meromko,

^33-35 ar eaegel bar hajar ḍaṅgrako, turuigel mitʼ hajar gadhako ar pegel bar hajar kũạri kuṛiko tahẽkana.

^36-40 Ar okoe doko lạṛhạilen onkoakʼ hạṭiń reakʼ hĩs do hoyokʼ kana, pe lakh pegel eae hajar mõṛẽ sae bhiḍi ar meromko, pegel turui hajar ḍaṅgrako, pegel hajar mõṛẽ sae gadhako ar gel turui hajar kũạri kuṛiko. Noko modre tinạkʼ do Probhu Isorakʼ bheja menteko hoyen onkoakʼ lekha do turui sae eaegel mõṛẽ goṭen bhiḍi ar meromko, eaegel bar goṭen ḍaṅgra, turui gel mitʼ goṭen gadha ar pegel bar goṭen kũạri kuṛiko.

⁴¹ Probhu Isor do Mose okae hukumade tahẽkan onkage uni do Probhu Isor ńutumte noko do bheja lekate tulokʼ samaṅokʼ lạgitʼ naeke Eleasarakʼ tireye jimạketʼkoa.

^42-43 Ar okaṭakʼ adha hạṭiń Mose do Israelren sarecʼ hoṛko lạgitʼ, metakʼme palṭonakʼ hạṭiń khone begarletʼko onkoakʼ hạṭiń do pe lakh pegel eae hajar mõṛẽsae bhiḍi ar meromko,

^44-46 pegel turui hajar ḍaṅgrako, pegel hajar mõṛẽsae gadhako, ar gel turui hajar kũạri kuṛiko tahẽkana.

⁴⁷ Ar onko Israelko oka adha hạṭińko ńamketʼ onako khon Mose do mimitʼ mõṛẽgel kũạri kuṛiko khon mimitʼ hoṛkate ar mimitʼ mõṛẽgel janwarko khon mitʼṭecʼkate Probhu Isorakʼ hukum lekate Liwikoe ematʼkoa, okoe do sekʼwa tạmbu ńeljut reakʼ bharko em ocolen.

^48-49 Niạ tayom palṭonren judạ judạ dolkoren subedarko, metakʼme hajarko cetanren mitʼhoṛ ar saeko cetanren mitʼhoṛ do Mose ṭhen senkateko menkeda, “Amren golamko, metakʼme ale do ale taberen palṭonkole lekhaketʼkoa onko modren mitʼ hoṛ hõ bale ạdhi akana.

⁵⁰ Onate ale mimitʼko do oka sona reakʼ bạjuko, balako, chapakʼ mundạmko, lutur reakʼ pagrako ar hoṭokʼ reakʼ malakole ńamakatʼ, ona do aleakʼ kại reakʼ puruchun lạgitʼte Probhu Isor ṭhen samaṅ lạgitʼle ạgu akada.”

⁵¹ Unre Mose ar naeke Eleasar do onko ṭhen khon onako sona reakʼ jinisko kin hataokeda.

⁵² Mose ar naeke Eleasar do hajar goṭen cetanren ar mitʼsae goṭen cetanrenkoakʼ okako sona do Probhu Isor ńutumtekin samaṅketʼ ona reakʼ ojon do mitʼsae turuigel irạl keji tahẽkana.

⁵³ Ona chaḍa palṭonko do jotoge apan ạpin lạgitʼ jiniskoko luṭ ạguan tahẽkana.

⁵⁴ Probhu Isor jemon Israelko secʼ beṅgetʼ akaeye tahen onate Mose ar naeke Eleasar do hajarko cetanren ar saeko cetanrenko khon ạguwakʼ sona reakʼ jinisko hataokate ńapamokʼ tạmbu ṭhenkin dohokeda.