Numeri 30 - সান্তালী বাইবেল

Manot akatʼakʼko purạu reakʼ ạn-ạri

^1-2 Mose do Israel gusṭiren mukhiyạkoe galmaraoatʼkoa, “Probhu Isore hukum akada jãhãe hoṛ Probhu Isor ṭhen jãhãnakʼ manotakʼ lạgitʼe dohoakatʼ khan se kiriạkate jãhãnakʼe gokʼakatʼ khan, enḍekhan uni do onae purạuma; ente uni okae menakatʼ ona do purạutege hoyokʼtaea.

^3-4 “Jãhãe bin baplayicʼ kuṛi do acʼren apatakʼ oṛakʼre tahen jokhecʼ Probhu ṭhen jãhãnakʼe manot akatʼ khan se jãhãnakʼe gokʼ akatʼ khan ar acʼren apattetʼ ona baḍaekate jãhãnakʼ bae metae, enḍekhan uniyakʼ manotteakʼ se okaṭakʼe gokʼ akatʼ ona do puruạutege hoyokʼtaea.

⁵ Menkhan ona katha ańjomkate acʼren apattetʼ uniye barone enḍekhan oneye manotakatʼ seye gokʼ akatʼ ona do bạtilokʼtaea. Acʼren apattetʼe baron akade iạte Probhu Isor do uniyakʼ manotteakʼ se gokʼakʼe rạputʼ akatʼre hõe ikạyea.

^6-7 “Jãhãnakʼ manot akatʼakʼ doho tayom se begor hudiste kiriạkate gokʼ tayom uni kuṛiyakʼ bapla hoyokʼ ar uniren jãwãetetʼ ona katha ańjomkate hõ uni jãhãnakʼ bae metae, enḍekhan uniyakʼ manotteakʼ se okae gokʼ akatʼ ona do purạutege hoyokʼtaea.

⁸ Menkhan ona katha ańjomkate uniren jãwãetetʼ uniye barone enḍekhan uniyakʼ ona manot akatʼakʼ se begor hudisteye gokʼ akatʼ ona do mạutạkʼtaea ar Probhu Isor hõ uniyakʼ manotakʼ se gokʼakʼ rạputʼ iạteye ikạyea.

⁹ “Rạnḍi se jãwãe okoeye bạgi akade nonkan jãhãe maejiu jãhãnakʼ manot lạgitʼe dohoy se jãhãn gokʼakʼe dohoy enḍekhan uni do ona purạu hoyokʼtaea.

^10-11 “Jãwãe sãoteye tahen kan nonkan jãhãe maejiu jãhãn manotteakʼ menakʼtae khan se kiriạkate jãhãnakʼe gokʼakatʼ khan ar acʼren jãwãetetʼ ona ańjomkate hõ jãhãnakʼ bae metae se bae barone, enḍekhan uni do manotteakʼ se joto gokʼakʼge purạu hoyokʼtaea.

¹² Menkhan acʼren jãwãetetʼ ona katha ańjomkate onae mạutạ ocoye menetʼkhan uniyakʼ ona manotteakʼ se gokʼakʼ do mạutạkʼtaea. Ar uniren jãwãetetʼe baron akadete Probhu Isor hõ uniyakʼ manotteakʼ se gokʼakʼ rạputʼ iạteye ikạyea.

¹³ Bạhuttetʼakʼ manotteakʼ se jãhãn gokʼakʼ mạutạkʼ reakʼ ạidạri do jãwãetetʼakʼ tahena.

¹⁴ Menkhan acʼren jãwãetetʼ dinke din ona reaṅ baḍaekate hõ hapegeye tahen enḍekhan uniren bạhuttetʼakʼ ona manot se gokʼakʼ do keṭejokʼtaea. Ar onako ańjomkate hõ thir hape akane tahen khan uni do bạhuttetʼakʼ manotteakʼ se gokʼakʼe keṭecʼ ocoytaea.

¹⁵ Menkhan jotowakʼ ańjom tayom jãwãetetʼ uniyakʼe mạutạitae khan enḍekhan bạhuttetʼ ona bae purạu akatʼ reakʼ dos do acʼren jãwãetetʼ cetanre paṛaokʼa.”

¹⁶ Niạ babotre jãwãetetʼ ar bạhuttetʼ tala ar apat ar apatakʼ oṛakʼreko tahenkan hoponerako tala reakʼ Probhu Isor do Mose niạko ạn ạrigeye emade tahekana.