Numeri 3 - সান্তালী বাইবেল

Aronren Hoponko

¹ Noa kangea Aron ar Mose bõsrenko reakʼ katha do one tinre Probhu Isor do sinại burure Moseye galmaraoade tahẽkan.

^2-3 Aronren hoponkoakʼ ńutum do hoyokʼ kana: Nadab, Abihu, Eleasar ar Ithamar. Onko modre Nadab do maraṅicʼe tahẽkana. Onko do naeke menkste sapʼdapʼ kạmi lạgitʼko ojokʼ bahal ocolena.

⁴ Menkhan Nadab ar Abihu do sinại hahaṅkarre Probhu Isor ńutumte ạuṛi seṅgelre dhupkin jeretʼletʼte Probhu Isor samaṅrekin gocʼena. Unkinren do cele hoponge bako tahẽkana, menkhan Eleasar ar Ithamar do ạkinren apat Aron sãote naeke lekatekin kạmiyetʼ tahẽkana.

Naeke kạmi lạgitʼ Liwikoko ojokʼ bahal ocokʼkan

⁵ Probhu Isor do Moseye galmaraoadea,

⁶ “Am do Liwi gusṭiren hoṛkom ạgukoa ar Aronakʼ tirem jimạkoa jemon onko do Aronko goṛowae.

⁷ Ar sanam Israelko secʼ khon ńapamokʼ tạmbure Aron tabere sekʼwa kạmi reakʼ sapʼdapʼ kạmireko goṛowaema.

⁸ Onko do ńapamokʼ tạmbu reakʼ asbab reakʼko ńel juta ar sekʼwa tạmbure Israelkoakʼ dạyik leka sapʼdapʼ reakʼko kạmi ma.

⁹ Liwiko do Aron ar uniren hoponkom emakoa. Israelko tala khon noko do Aronakʼ tirem jimạkoa.

¹⁰ Naeke lekate kạmi lạgitʼ am do Aron ar uniren hoponkom ojokʼ bahalkoa. Onko chaḍa ar jãhãege naeke reakʼe kạmi uni doe gocʼ ocokʼa.”

¹¹ Probhu Isor do Mose arhõe galmaraoadea,

¹² “Israelkoren pạhil koṛa hopon bodolte iń do Israelko tala khon Liwikogeń bachao akawana. Liwiko do ińren kanako,

¹³ ente Israelkoren sanam pạhil koṛa hopon doko ińren kana. Misor disạmre pạhil koṛa hopon gocʼko jokhecʼ Israelko talare mitʼke mitʼ pạhil koṛa hopon do iń lạgitʼgeń begar dohoakatʼkoa- ar ona do manwakoge cetʼ ar janwarkoge baṅ cetʼ. Onko do ińren kanako; ar iń doń Probhu Isor kana.”

¹⁴ Sinại reakʼ hahaṅkarre Probhu Isor do Moseye galmaroadea,

¹⁵ “Gharońj ar gusṭiko lekate am do Liwikom lekhakoa. Mitʼ cando ar ona khon ḍher umerren sanam herel hoponkom lekhakoa.”

¹⁶ Probhu Isorakʼ hukum lekage Mose do Liwikoe lekhaketʼkoa.

¹⁷ Liwiren hoponkoakʼ ńutum do Gerson, Kohat ar Merari.

¹⁸ Kohatren hopon Libni ar Simai do barea gusṭiren apatkin tahẽkana.

¹⁹ Kohatren hopon Amram ar Jishar, Hebron ar Usiel do pon gusṭiren apatko tahẽkana.

²⁰ Meraren hopon Mahli ar Musi do bar gusṭiren apatkin tahẽkana. Noa kangea gusṭikoren apat lekate Liwi gusṭiren eṭakʼ eṭakʼ bõsrenkoakʼ oprom do.

²¹ Gerson do Libni ar Simại bõsren hapṛame tahẽkana.

²² Noa bõsren mitʼ cando ar ona khon ḍher umerren sanam herel hoponko lekha ocoyen khan jotote eae hajar mõṛẽsae hoṛko hoyena.

²³ Ar Gersonrenko do pạchim aṛe sekʼwa tạmbu reakʼ tayom secʼre ḍerakʼ lạgitʼko men ocoyena.

²⁴ Gerson gusṭiren mukhiyạ do Layel hopon Eliasaphe tahẽkana.

²⁵ Ar ńapamokʼ tạmbure Gerson hoponkoakʼ dạyik do tahẽkana sekʼwa tạmbu, ar ona cetanre merom upʼ reakʼ dapalakʼ, ńapamokʼ tạmbu duạr reakʼ ekʼsetʼ orwal,

²⁶ bahre raca reakʼ orwal, sekʼwa tạmbu ar pinḍ beṛhaeteakʼ bakher raca duạr reakʼ orwal, ar ona reakʼ baberko ar onako sãoteakʼ eṭakʼ sanam kạmiko.

²⁷ Kohat do Amrami, Jishari, Hebroni ar Usiel bõsren hapṛame tahẽkana.

²⁸ Niạ bõsren mitʼ cando ar ona khon ḍher umerren sanam herel hoṛkoakʼ lekha do irạl hajar turuisae tahẽkana. Noko cetanrege sonot ṭhạ̃i ńeljut reakʼ bhar do dohoyena.

²⁹ Sekʼwa tạmbu reakʼ dạkhin secʼ do Kohat gusṭirenko ḍerakʼ reakʼe metatʼko tahẽkana.

³⁰ Kohat bõskoren mukhiyạ do Usielren hopon Elsaphane tahẽkana.

³¹ Kohatrenkoakʼ dạyik do tahẽkana goha sinduk, ṭebil, diuhe dohowakʼ, pinḍkin, sonot ṭhạ̃i reakʼ asbabko ar sonot utạr ṭhạ̃i reakʼ orwal ńel jut ar onako sãoteakʼ eṭakʼ jotowakʼ kạmiko.

³² Liwikoren maraṅ mukhiyạ do Aronren hopon Eleasere tahẽkana. Sonot ṭhạ̃i ńel jut reakʼ bhar okoeko cetanre tahẽkan onko ńel todarotko lạgitʼ do Eleasere bachao ocolena.

³³ Merari do Mahli ar Musi bõsren hapṛame tahẽkana.

³⁴ Niạ bõsren do mitʼ cando ar ona khon ḍher umerren sanam herelko lekha ocoyen khan, onkoakʼ lekha do turui hajar barsae hoyena.

³⁵ Merari bõsren mukhiyạ do Abihayelren hopon Suriele tahẽkana. Onko do sekʼwa tạmbu reakʼ utạr secʼre ḍerakʼ lạgitʼko men ocolena.

³⁶ Merarikoakʼ dạyik do tahẽkana sekʼwa tạmbu reakʼ paṭako, hurkạṛko, khunṭiko ar ona reakʼ ganḍoko ar ona reakʼ joto jinisko,

³⁷ bakher raca reakʼ berhaeteakʼ khunṭiko ar ganḍoko, onako reakʼ gońjko ar onako reakʼ baberko ar onako sãoteakʼ eṭakʼ sanam kạmi reakʼ bhar hõ onkore tahẽkana.

³⁸ Ńapamokʼ tạmbu samaṅre, metakʼme sekʼwa tạmbu reakʼ purub secʼre do Mose, Aron ar uniren hoponko ḍerakʼ lạgitʼ metatʼko tahẽkana. Onkoakʼ dạyik do tahẽkana Israelko lekate sonot ṭhạ̃i reakʼ sanamʼ kạmiko jemonko kạmi. Onko chaḍa ar jãhãege sekʼwa tạmbu reakʼ ṭhonok ṭhạ̃iteye bolokʼ uni doe gocʼ ocokʼa.

³⁹ Probhu Isorakʼ hukum leka Mose ar Aronakʼ lekhare bõs lekate Liwi gusṭiren herel hoponkoakʼ lekha do bargel bar hajar tahẽkana. Noko samankoge mitʼ cando ar ona khon ḍher umerrenko tahẽkana.

⁴⁰ Inạ tayom Probhu Isor do Moseye galmaraoadea, “Am do Israelko talare pạhil janam akan mitʼ cando ar ona khon ḍher umerren sanam herel hoponkom lekhakoa arem ol caṛhaokoa.

⁴¹ Israelkoren sanam pạhil herel hoponko bodolte Liwiko ar Israelkoren mĩhũ-merom hoponko bodolte Liwikoren pạhil mĩhũ-merom hoponko do ińren menteko lekhakʼa. Ar iń kangeạń Probhu Isor do.”

⁴² Probhu Isorakʼ hukum leka Mose do Israelko talare pạhil janam akan nonkan sanam herel hoponkoe lekhaketʼkoa.

⁴³ Pạhilko janam akan nonkan sanam mitʼ cando ar ona khon ḍher umerren herel hoponkoakʼ ńutum ol rakapʼen khan, onkoakʼ lekha do jotote bargel bar hajar barsae eaegel pe hoyena.

⁴⁴ Probhu Isor do Mose arhõ galmaraoadeteye metadea,

⁴⁵ “Am do Israelkoren sanam pạhil herel hoponko bodolte Liwiko ar Israelkoren pạhil mĩhũ-merom hopon bodolte Liwikoren pạhil mĩhũ-merom hopon mente lekhako hoyokʼa. Liwiko do ińren kanako; ar iń kangeạń Probhu Isor do.

^46-47 Liwikoakʼ joto lekha khon Israelkoren pạhil herel hoponkoakʼ lekha do barsae eaegel pe hoṛ ḍherko tahẽkante onko mimitʼko chaḍaoko lạgitʼ am do gel gram ojon reakʼ dhorom sekel reakʼ mõṛẽ sekelkate rupạm ạdạikoa.

⁴⁸ Onko chaḍaoko reakʼ noa rupạ do Aron ar uniren hoponkom emakoa.”

⁴⁹ Liwiko bodolte Israelko chaḍaoko tayom Israelkoakʼ oka lekha bạ̃ṛti tahẽkan Mose do onko chaḍaoko reakʼ rupại hataokeda.

⁵⁰ Ar Israelkoren pạhil herel hoponko ṭhen khon dhorom reakʼ sekel lekate gelpe keji turui sae mõṛẽgel gram rupại hataokeda.

⁵¹ Mose do Probhu Isorakʼ hukum leka ona chaḍaoakʼ reakʼ rupạ do Aron ar uniren hoponkoe ematʼkoa.