Numeri 29 - সান্তালী বাইবেল

Nãwã bochor hilokʼ reakʼ samaṅokʼakʼko

¹ “Eae cando reakʼ pạhil tạrikre ape do mitʼṭecʼ sonot ńapamokʼ sabhape hoeocoya. Ar enhilokʼ do jãhãn khaṭaoteakʼ kạmi do alope kạmiya. Enhilokʼ do sakwa okʼroṅ din porob hoyokʼa.

² Probhu Isor kusi ocoye reakʼ jut so menkate ape do enhilokʼ mitʼṭen ḍaṅgra, mitʼṭen bheḍa ar eae goṭen mitʼ bochor umerren bheḍa hoponpe ạgukoa ar mitʼṭecʼ jeredokʼ samaṅokʼakʼpe samaṅa. Ar noko do niphuṭ utạrko hoyokʼ jạruṛtakoa.

^3-4 Jomakʼ samaṅokʼakʼ lạgitʼ ḍaṅgra sãote sunum mesalakatʼ mõṛẽ keji pon sae gram holoṅ hõ emokʼ hoyokʼa. Ar bheḍa sãote do pe keji turui sae gram holoṅ ar mimitʼ bheḍa hoponko lạgitʼ do mitʼ keji irạl sae holoṅ emokʼ hoyokʼa.

⁵ Kại ńutumte puruchun lạgitʼ do mitʼṭen merom boda hõ samaṅe hoyokʼa.

⁶ Mimitʼ cando ar mimitʼ dinre niṭ akatʼ jeredokʼ samaṅokʼakʼ, ona sãote jomakʼ samaṅokʼakʼ ar coḍor samaṅokʼakʼ chaḍa noa samaṅokʼakʼko hõ samaṅ hoyokʼa. Noako do Probhu Isor ńutumte seṅgelteakʼ samaṅokʼakʼ kana one ona reakʼ jut so do Probhu Isore kusiyakʼkan.

Puruchun reakʼ dinre samaṅokʼakʼko

⁷ “Niạ eae cando reakʼ gel tạrikre hõ mitʼṭecʼ sonot ńapamokʼ sabhape hoeocoya. Ar niạ dinre apeakʼ ontorpe nindhạntapea ar joto lekan kạmiko khon sahaṛ akanpe tahena.

⁸ Ar Probhu Isor kusi ocoye reakʼ jut so lekate aperen mitʼṭen ḍaṅgra, mitʼṭen bheḍa ar eae goṭen mitʼ bochorren bheḍa hoponkote jeredokʼ samaṅokʼakʼ pe samaṅa. Menkhan onko mimitʼko do niphuṭ utạrko jemonko hoyokʼ.

^9-10 Jomakʼ samaṅokʼakʼ lạgitʼ ḍaṅgra sãote sunum mesalakatʼ mõṛẽ keji pon sae gram holoṅ emokʼ hoyokʼa. Ar bheḍa sãote do pe keji turui sae gram holoṅ ar eae goṭen bheḍa hopon onko mimitʼko sãote mimitʼ keji irạl sae gramkate holoṅ emokʼ hoyokʼa.

¹¹ Kại reakʼ puruchun lạgitʼ kại ńutumte samaṅokʼakʼ ar jaoge jeredokʼ samaṅokʼakʼ sãote jomakʼ samaṅokʼakʼ ar noako sãoteakʼ coḍor samaṅokʼakʼ chaḍa arhõ mitʼṭen kại ńutumte samaṅokʼakʼ lạgitʼ mitʼṭen merom boda hõ samaṅe hoyokʼa.

Chamḍa-oṛakʼ porob reakʼ

¹² “Eae cando reakʼ mõṛẽgel tạrikre hõ mitʼṭecʼ sonot ńapamokʼ sabhape hoeocoya ar enhilokʼ do jãhãnakʼ khaṭaoteakʼ kạmiko alope kạmiya. Ape do Probhu Isor ńutumte eae din hạbicʼpe porobokʼa.

¹³ Probhu Isore kusiyakʼ jut so lekate seṅgelteakʼ mitʼṭecʼ samaṅokʼakʼpe samaṅa. Ona lạgitʼ gelpe goṭen ḍaṅgra, barea bheḍa ar gelpon goṭen mitʼ bochor umerren bheḍa hoponkote mitʼṭecʼ jeredokʼ samaṅokʼakʼpe samaṅa. Ar noko joto do niphuṭ utạrkoko hoyokʼma.

^14-15 Mimitʼ ḍaṅgra sãote jomakʼ samaṅokʼakʼ lạgitʼ sunum mesalakʼ mõṛẽ keji pon sae gram holoṅ emokʼ hoyokʼa; ar barea bheḍare mimitʼ goṭen lạgitʼ pe keji turui sae gram ar mimitʼ bheḍa hoponko sãote mitʼ keji irạl sae gram holoṅ ạgui hoyokʼa.

¹⁶ Jaoge jeredokʼ samaṅokʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa kại ńutumte samaṅe lạgitʼ mitʼṭen merom boda hõ samaṅe hoyokʼa.

¹⁷ “Porob reakʼ dosar hilokʼ do barea ḍaṅgra, barea bheḍa ar gelpon goṭen mitʼ bochor umerren bheḍa hopon samaṅko hoyokʼa. Noko do niphuṭ utạr hoyokʼ jạruṛtakoa.

¹⁸ Noko ḍaṅgra, bheḍa ar bheḍa hoponko lekhare tinạkʼko hoyokʼ unạkʼge onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ hoyokʼ jạruṛa; ar ona do lahateakʼ niạm lekage.

¹⁹ Jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa ar noako sãote coḍor samaṅokʼakʼ hõ emokʼ hoyokʼtapea.

²⁰ “Porob reakʼ tesar hilokʼ do gelmitʼ goṭen ḍaṅgra, barea bheḍa ar gelpon goṭen mitʼ bochor umerren bheḍa hopon samaṅko hoyokʼa. Ar onko jotoge jemon niphuṭ utạrko hoyokʼ.

²¹ Noko ḍaṅgra, bheḍa ar bheḍa hoponkoakʼ lekha tinạkʼ hoyokʼ unạkʼge onko sãoteakʼ jomakʼ samaṅokʼakʼ ar coḍor samaṅokʼakʼ reakʼ lekha hõ hoyokʼ jạruṛa; ar ona do lahateakʼ niạm lekage.

²² Jaoge jeredokʼ samaṅokʼakʼ ar ona sãoteakʼ jomakʼ samaṅokʼ ar coḍor samaṅokʼakʼ chaḍa mitʼṭen merom boda hõ kại ńutumte samaṅe hoyokʼa.

²³ “Porob reakʼ ponakʼ dinre gel goṭen ḍaṅgra, barea bheḍa ar gelpon goṭen mitʼ bochor umerren bheḍa hopon samaṅko hoyokʼa. Noko do jotoge jemon niphuṭ utạrko hoyokʼ.

²⁴ Noko ḍaṅgra, bheḍa ar bheḍa hoponkoakʼ lekha tinạkʼ hoyokʼa onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ unạkʼge hoyokʼa; ar ona do hoyokʼa lahateakʼ niạm lekage.

²⁵ Jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa.

²⁶ “Porob reakʼ mõṛẽakʼ dinre are goṭen ḍaṅgra, barea bheḍa ar gelpon goṭen mitʼ bochor umerren bheḍa hoponko samaṅko hoyokʼa. Ar noko do jemon niphuṭ utạrko hoyokʼ.

²⁷ Noko ḍaṅgra, bheḍa ar bheḍa hoponkoakʼ lekha tinạkʼ hoyokʼa onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ unạkʼge jạruṛa; ar ona do lahateakʼ niạm lekage hoyokʼa.

²⁸ Jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa.

²⁹ “Porob reakʼ turuiyakʼ dinre do irạl goṭen ḍaṅgra, barea bheḍa ar gelpon goṭen mitʼ bochor umerren bheḍa hopon samaṅko hoyokʼa. Noko do jemon niphuṭ utạrko hoyokʼ.

³⁰ Noko ḍaṅgra, bheḍa ar bheḍa hoponkoakʼ lekha tinạkʼ hoyokʼa onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ unạkʼge hoyokʼa; ar ona do hoyokʼa lahateakʼ niạm lekage.

³¹ Jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa.

³² “Porob reakʼ eaeyakʼ dinre do eae goṭen ḍaṅgra, barea bheḍa ar gelpon goṭen mitʼ bochor umerren bheḍa hopon samaṅko hoyokʼa. Noko do jemon niphuṭ utạrko hoyokʼ.

³³ Noko ḍaṅgra, bheḍa ar bheḍa hoponkoakʼ lekha tinạkʼ hoyokʼa onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ unạkʼge jạruṛa; ar ona do hoyokʼa lahateakʼ niạm leka.

³⁴ Jaoge jeredokʼ samaṅokʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa.

³⁵ “Irạl din reakʼ mucạtʼ hilokʼ do bises sabhape hoeocoya ar enhilokʼ do jãhãnakʼ khaṭaoteakʼ alope kạmiya.

³⁶ Probhu Isor kusi ocoye reakʼ jut so menkate uni ńutumte mitʼṭen seṅgelteakʼ samaṅokʼakʼpe samaṅa. Ona lạgitʼ mitʼṭen ḍaṅgra, mitʼṭen bheḍa ar eae goṭen mitʼ bochor umerren bheḍa hoponkote jeredokʼ samaṅokʼakʼpe samaṅa. Noko do jemon niphuṭ utạrko hoyokʼ.

³⁷ Ḍaṅgra, bheḍa ar bheḍa hoponkoakʼ lekha tinạkʼ hoyokʼa onko sãoteakʼ jomakʼ samaṅokʼakʼ ar coḍor samaṅokʼakʼ lekha hõ unạkʼge hoyokʼa; noa do lahateakʼ niạm lekage hoyokʼa.

³⁸ Jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ ar coḍor samaṅokʼakʼ chaḍa mitʼṭen merom bodate kại ńutumte samaṅokʼakʼpe samaṅa.

³⁹ “Manot akatʼakʼ purạu ar apnarakʼ sanateakʼ samaṅokʼakʼ lekate okako jeredokʼ samaṅokʼakʼ, jomakʼ samaṅokʼakʼ, coḍor samaṅokʼakʼ ar sulukren samaṅokʼakʼpe samaṅ onako chaḍa hõ mimitʼ niṭakan porobre ona reakʼ lek lekan samaṅokʼakʼko Probhu Isor ńutumte samaṅ hoyokʼtapea.”

⁴⁰ Probhu Isor okako hukum Moseye emade tahẽkan uni do ona Israelkoe baḍae ocoketʼkoa.