Numeri 27 - সান্তালী বাইবেল

Selophadren hoponerako

¹ Selophadren hoponerako do Josephren hopon Manase bõsrenko tahẽkana. Manaseren hopon Makir, Makirren hopon Gilead, Gileadren hopon Hephor ar Hephorren hopon Selophad. Selophadren hoponerakoakʼ ńutum do hoyokʼ kana, Mahla, Noa, Hogla, Milkạ ar Thirsa.

² Noko kuṛiko do ńapamokʼ tạmbu reakʼ bolokʼ horre senkate Mose ar naeke Eleasar ar sanam mukhiyạko ar Israelko samaṅre teṅgoyenteko menkeda,

³ “Aleren baba do hahaṅkarreye gocʼena. Ar Korahren okoeko hoṛ do Probhu Isor upạrte dolko pakaoletʼ onko dolrehõ uni do bae tahẽkana; uni do acʼ apnarakʼ kạitegeye gocʼena. Ar uniren do cele hoponge bạnukʼkotaea.

⁴ Menkhan aleren babawakʼ ńutum do acʼakʼ bõs khon cedakʼ maraokʼtaea? Onate aleren babaren bõsren hoṛko sãote ale hõ sompotti reakʼ ạidạri emaleme baṛe.”

⁵ Unre Mose do onko babotre Probhu Isor ṭhene kuliyana.

⁶ Ar Probhu Isor do uniye roṛ ruạṛadea,

⁷ “Selophadren hoponera do ṭhik kathageko meneda. Onkoren babawakʼ bõsren hoṛko sãote khạṭige sompotti reakʼ ạidạrim emakoa. Ar onko jemon akoren babawakʼ sompottiko ńam onam ńeltakoa.

⁸ Israelkom metakoa jãhãege hopon begorteye gocʼlen khan tobe uniyakʼ sompotti reakʼ ạidạri do uniren hoponerae ńama.

⁹ Ar uniren hoponera hõ bae tahen khan tobe do uniren boehako uniyakʼ sompottiren ạidạrikoko hoyokʼa.

¹⁰ Ar uniren boeha hõ bako tahen tobe sompotti reakʼ ạidạri do uniren apattetʼren boehako ńama.

¹¹ Ar apattetʼren jãhãe boeha hõ bako tahen tobe khan uni bõsren joto khon sorren peṛa do uniyakʼ sompottiren ạidạriye hoyokʼa. Ona sompotti do unigeye ńama. Mose emakʼ Probhu Isorakʼ hukum lekate noage Israelkoakʼ ạn reakʼ mitʼṭecʼ dhara do hoyokʼa.”

Mose tayom Josuại bachao ocokʼkan.

¹² Inạ tayom Probhu Isor do Moseye metadea, “Am do Abarim burute decʼkate oka disạm Israelkoń ematʼko ona baṛe beṅgetʼakʼme.

¹³ Amren boeha Aron cetʼleka hapṛamko ṭhene senakan onkage amhõ amren hapṛamko ṭhen calakʼ hoyokʼtama.

¹⁴ Ente Sin hahaṅkarre Israelko tinre dakʼ lạgitʼ kạphạriạukʼko ehopʼletʼa unre Israelko samaṅre iń sonotiń reakʼ hukum do baben bataoleda.” Ona do Sin hahaṅkarre Kades ṭhenakʼ Meribah reakʼ dakʼge.

^15-17 Noa katha ańjomkate Mose do Probhu Isore metadea, “E Probhu Isor, okoe doe manwakoren jiwi emokʼicʼ Isorkan, unige Israelko cetanre nonkan mitʼṭen hoṛe teṅgoyema, jemon mukhiyạ lekate sanamakʼre hoṛkoe ạyur daṛeako. Onate Probhu Isorren hoṛko bin gupiyicʼ leka ar bako tahena.”

¹⁸ Probhu Isor do Moseye roṛ ruạṛadea, “Nunren hopon Josuạre Isorren Jiu menaea. Am do ạguyem ar uni cetanre amakʼ ti capoetam.

¹⁹ Ar naeke Eleasar ar Israelko samaṅre unim ạguiyea ar onko samaṅrege kạmi reakʼ bharem emaea.

²⁰ Ar okaṭakʼ ektiạrim em ocoakan ona reakʼ hõ thoṛam emaea jemon sanam Israelko uniyakʼko ańjomtae.

²¹ Uni do naeke Eleasar ṭhen senokʼ hoyokʼtaea, ar Eleasar do uni ńutumte Urim ar Thumim reakʼ daṛete Probhu Isorakʼ hukume baḍaejoṅa. Eleasarakʼ hukum lekage uni ar Israelren eṭakʼko do calakʼ hoyokʼtakoa.”

²² Mose do Isorakʼ hukum lekageye kạmikeda. Ar Josuạ do naeke Eleasar ar Israelko samaṅreye hạjirkedea.

²³ Ona tayom Probhu Isorakʼ hukum leka uni cetanre ti capokateye bhoradea.