Numeri 26 - সান্তালী বাইবেল

Dosar dhao hoṛ lekha

¹ Mahamạri thiren tayom Probhu Isor do Mose ar naeke Aronren hopon Eleasare metatʼkinạ,

² “Israelko modre okoekoakʼ umer do bargel se ona khon ḍher, metakʼme okoe do lạṛhạite oḍok calakʼ lekako hoyakan, onko do gharońj gharońj lekate ben lekhakoa.”

³ Onate Mose ar naeke Eleasar do Jerikho mohnḍa mohonḍi jordan gaḍa aṛe Moab reakʼ otet ṭhạ̃ire mukhiyạko kin metatʼkoa,

⁴ “Probhu Isor Mose okae hukum akawade ona lekate ape do bargel ar ona khon ḍher umeran herel hoṛpe lekhakoa.” Ar okoeko Israel hopon do Misor disạm khonko oḍok hecʼlen hoṛ lekha jokhecʼ onkoakʼ ńutum hõ ol caṛhaoen takoa.

⁵ Israelren pạhilicʼ hopon Rubenakʼ bõsko: noko doko hoyokʼ kana Hanok khon Hanoren bõsko, Palu khon Pạlui bõsko,

⁶ Hesron khon Hesroni bõsko ar Kormi khon Kormiạ bõsko.

⁷ Nokoko do Ruben gusṭiren eṭakʼ eṭakʼ bõsko. Noko mod khon hoṛkoakʼ lekha do hoyokʼ kana pongel pe hajar eae sae pegel.

⁸ Pạluren hoponakʼ ńutum do Eliab tahẽkana,

⁹ ar Eliabren hoponkoakʼ ńutum do hoyokʼ kana Nemuel, Dathan ar Abiram. Dathan ar Abiram do Israelkoren mukhiyạkin tahẽkana okoe do Mose ar Aron upạrtekin teṅgolen. Arhõ Korah dolrenko Probhu Isor upạrte tinreko teṅgolena unre nukinhõ ona dolrenkin tahẽkana.

¹⁰ Korah sãote nukin banahoṛge ot doe utʼletʼkina; ar Korah dolren barsae mõṛẽgel hoṛ do seṅgelreko atar gocʼena. Noako do Israelko lạgitʼ sontorokʼ reakʼ cinhạ lekako tahẽyena.

¹¹ Menkhan Korahren hoponko do un jokhecʼ bako gocʼlena.

¹² Simeon bõsrenko: noko doko hoyokʼ kana Nemuel khon Nemueli bõsko, Jamin khon Jamini bõsko, Jakin khon Jakini bõsko,

¹³ Serah khon Serahi bõsko ar Sạul khon Sạuli bõsko.

¹⁴ Noko do Simeon gusṭiren judạ judạ bõsren kanako. Ar noko modkhon hoṛkoakʼ lekha do hoyokʼ kana bargel bar hajar barsae.

¹⁵ Gadren bõsko: noko doko hoyokʼ kana Sephon khon Sephoni bõsko, Hagi khon Hagi bõsko, Suni khon Suni bõsko,

¹⁶ Osni khon Osni bõsko, Eri khon Eri bõsko,

¹⁷ Arod khon Arodren bõsko ar Areli khon Areli bõsko.

¹⁸ Noko do Gad gusṭiren eṭakʼ eṭakʼ bõsko. Noko modkhon hoṛkoakʼ lekha do pongel hajar mõṛẽ sae tahẽkana.

^19-20 Jihudạren bõsko: noko doko hoyokʼ kana Sela khon Sela bõsko, Peres khon Peres bõsko ar Serah khon Serah bõsko. Jihudạren do Er ar Onan ńutuman arhõ barea hoponkin tahẽkana. Nukin do laharege Kanan disạmrekin gocʼena.

²¹ Peresren bõskoakʼ bõs do hoyokʼ kana Hesron khon Hesroni bõsko ar Hamul khon Hamuli bõsko.

²² Noko do Jihudạ gusṭiren judạ judạ bõsko kanako. Noko mod khon hoṛkoakʼ lekha do tahẽkana eaegel turui hajar mõṛẽsae.

²³ Isakarren bõsko: noko doko hoyokʼ kana Tolai khon Tolai bõsko, Pua khon Puni bõsko,

²⁴ Jasub khon Jasubi bõsko ar Simron khon Simroni bõsko.

²⁵ Noko doko hoyokʼ khan Isakar gusṭiren judạ judạ bõsko. Noko mod khon hoṛkoakʼ lekha do hoyokʼ kana turui gel pon hajar pesae.

²⁶ Sebulonren bõsko: noko doko hoyokʼ kana Sered khon Seredi bõsko, Elon khon Eloni bõsko ar Jahleyel khon Jahleyeli bõsko.

²⁷ Noko doko hoyokʼ kana Sebulon gusṭiren judạ judạ bõsko. Noko mod khon lekhare turui gel hajar mõṛẽsae hoṛko tahẽkana.

²⁸ Manase ar Ephrayem khon Josephren bõsko:

²⁹ Manase bõsren bõs doko hoyokʼ kana Makir khon Makiri bõsko ar Gilead khon Gilead bõsko. Gilead do Makirren hopone tahẽkana.

³⁰ Gileadren bõskoakʼ bõs do hoyokʼ kana Leser khon Leseri bõsko, Helok khon Helok bõsko,

³¹ Asriel khon Asrieli bõsko, Sikem khon Sikemi bõsko,

³² Semida khon Semidayi bõsko ar Hepher khon Hepheri bõsko.

³³ Hepherren hopon Selophadren do cele hoponge bako tahẽkana. Menkhan eken kuṛi hoponko tahẽkana. Onko kuṛikoakʼ ńutum do hoyokʼ kana, Mahla, Moa, Hogla, Milkạ ar Thirsa.

³⁴ Noko doko hoyokʼ kana Manase gusṭiren judạ judạ bõsko. Noko mod khon lekhare mõṛẽgel bar hajar eae sae.

³⁵ Ephrayem bõsren bõs doko hoyokʼ kana Suthel khon Suthela bõsko, Bekhor khon Bekhori bõsko ar Tahan khon Tahani bõsko.

³⁶ Suthela bõskoren bõs doko hoyokʼ kana Eren khon Ereni bõsko.

³⁷ Noko do Ephrayim gusṭiren judạ judạ bõsren hoṛ kanako. Ar noko mod khon lekhare pegel bar hajar mõṛẽsae hoṛko tahẽkana. Bõs lekate nokoge Josephren bõsko tahẽkana.

³⁸ Benjạminren bõsko: noko doko hoyokʼ kana Bela khon Belayi bõsko, Asbel khon Asbeli bõsko, Ahiram khon Ahirami bõsko,

³⁹ Sephum khon Sephumi bõsko ar Hupham khon Huphami bõsko.

⁴⁰ Ardo ar Naman hotete Belaren bõskoakʼ bõs do hoyokʼ kana Ardo khon Ardi bõsko ar Naman khon Namani bõsko.

⁴¹ Noko do Benjamin gusṭiren judạ judạ bõsren hoṛko tahẽkana. Noko mod khon lekhare pongel mõṛẽ hajar turui sae.

⁴² Dan bõsrenko: noko doko hoyokʼ kana Suham khon Suhami bõsko. Noko doko tahẽkana Dan gusṭiren hoṛko.

⁴³ Noko modkhon hoṛkoakʼ lekha do tahẽkana turui gel pon hajar ponsae.

⁴⁴ Aserren bõsko: noko doko hoyokʼ kana Imna khon Imnayi bõsko, Iswi khon Iswiyi bõsko ar Beria khon Beriyi bõsko.

⁴⁵ Beriaren bõskoakʼ bõs do hoyokʼ kana Heber khon Heberi bõsko ar Malkiel khon Malkieli bõsko.

⁴⁶ Aserren hoponerawakʼ ńutum do Seraha tahẽkana.

⁴⁷ Noako do Aser gusṭiren judạ judạ bõsren hoṛko tahẽkana. Noko mod khon hoṛkoakʼ lekha do mõṛẽgel pe hajar ponsae tahẽkana.

⁴⁸ Napthaliren bõsko: noko doko hoyokʼ kana Jahseyel khon Jahseyeli bõsko, Guni khon Guni bõsko,

⁴⁹ Jeser khon Jeseri bõsko ar Silem khon Selemi bõsko.

⁵⁰ Noako do Napthali gusṭiren judạ judạ bõs kana. Noko mod khon hoṛkoakʼ lekha do pongel mõṛẽ hajar ponsae.

⁵¹ Lekhayen Israelkoakʼ lekha do jotote turui lakh mitʼ hajar eae sae pegelko tahẽkana.

⁵² Probhu Isor do Moseye metadea,

⁵³ “Am do hoṛkoakʼ lekha lekate disạmem hạṭińakoa jemon onaren ạidạriko hoedaṛeakʼ.

⁵⁴ Okaṭakʼ gusṭiren hoṛko saṅgege ona gusṭiren do ḍher ar okaṭakʼ gusṭiren hoṛko thoṛage ona gusṭiren lạgitʼ do thoṛa jaegam emakoa. Mimitʼ gusṭiren hoṛ do akoakʼ lekha lekage jaegako ạidạri joṅa.

⁵⁵ Okoe gusṭirenko okare jaegako ńama ona do loṭarikatem emakoa. Mimitʼ bõsrenkoakʼ hạṭiń do uniyakʼ gusṭi ńutumte emakʼ ṭoṭharege tahentaea.

⁵⁶ Gusṭiren hoṛkoakʼ lekha do thoṛa hoyokʼ ar baṅ do ḍher hoyokʼ loṭarikatege jaega dom ṭhik akoa.”

⁵⁷ Bõs lekate lekha akatʼko Liwi do Gerson khon Gersoni bõs, Kohat khon Kohati bõs ar Merari khon Merari bõs kanako.

⁵⁸ Gerson, Kohat ar Merari bõskoakʼ bõs do hoyokʼ kana Libni bõsko, Hebroni bõsko, Mahli bõsko, Musi bõsko ar Korah bõsko. Kohatren ar mitʼ bõsrenkoakʼ ńutum do Amram tahẽkana.

⁵⁹ Amramren oṛakʼ hoṛakʼ ńutum do Jokebed tahekana. Misor disạmre Liwi gusṭiko talare uniyakʼ janam do hoylena. Uniyakʼ kukhire Amramren hopon Aron, Mose, ar unkinren misera Mạriạmakʼ janam hoylena.

⁶⁰ Aronren hoponkoakʼ ńutum do tahẽkana Nadab, Abihu, Eleasar ar Ithamar.

⁶¹ Nadab ar Abihu do Probhu Isor samaṅre niạm bahre seṅgelre dhupkin samaṅletʼte unkin dokin gocʼena.

⁶² Mitʼ cando se ona khon ḍher umerren Liwi herel hoponkoakʼ lekha do bargel pe hajar tahẽkana. Israelko modre noko do eṭakʼ jãhãn jaega bako ạidạri ocolente ar eṭakʼ Israelko sãote hõ nokoakʼ lekha do baṅ hoylena.

⁶³ Jerikho mohnḍa mohnḍi jordan gaḍa aṛe Moab reakʼ otetre lekhako jokhecʼ Mose ar naeke Eleasar do noko hoṛkin lekhaketʼkoa.

⁶⁴ Menkhan Mose ar naeke Aron do tinre sinại hahaṅkarre Israelkokin lekhaletʼkoa unre noko do okoehõ bako tahẽkana.

⁶⁵ Probhu Isor do noko Israeko reaṅgeye menleda, onko do khạṭige hahaṅkarreko gujukʼa. Onko modre Jephunren hopon Kaleb ar Nunren hopon Josuạ chaḍa ar okoe hõ jiwetʼ do bako tahẽkana.