Numeri 25 - সান্তালী বাইবেল

Israelkoakʼ bạṛicʼ horte calakʼ

¹ Israel hoponko tinre Siṭim nagraha ṭhenko tahẽkana unre onko do Moabren maejiuko sãoteko laṭghaṭkeda.

² Noko maejiuko do akoren debotako ńutumte janwar dãṛẽko reakʼ porobre Israelkoko neotaketʼkoa, ar Israelko hõ onko sãote jom-ńũkate onkoren debotakoko ḍobokʼatʼkoa.

³ Nonkate Israelko do Pior burure Bakʼal debota sewawaere seledokʼko ehopʼena. Onate Probhu Isor do onko cetanre ạḍiye edreyena.

⁴ Probhu Isor do Moseye metadea, “Israelkoren sanam mukhiyạkom sapʼkoa arem gocʼkoa ar onkoakʼ mạ̃ṛĩ do siń reakʼ marsalre iń samaṅrem giḍikakʼa. Tobe anecʼ Israel hoponko cetan khon ińakʼ edre do ocogokʼtińạ.”

⁵ Unre Mose do Israelren bikʼcạrkoe metatʼkoa, “Ape talaren tinạkʼ hoṛ do Piorre Bakʼal debotawakʼ pujạreko seledokʼkan onko jotogepe gocʼkoa.”

⁶ Onate Mose ar Israelren sanamko ńapamokʼ tạmbu reakʼ duạr ṭhen tinreko rakʼjoṅkan tahẽkana unre mitʼṭen Israel hoṛ do onko samaṅrege mitʼṭen Midiạnren kuṛi do acʼakʼ gharońj lạgitʼe idikedea.

^7-8 Noa ńelketʼ khan naeke Aronren goṛomtetʼ koṛa Eleasarren hopon Pinehas do manḍerrenko ṭhen khon beretʼkate borlome hataokeda ar uni Israel hoṛ tayom tayomte uniyakʼ tạmbu bhitriteye boloyena ar borlomte bana hoṛe gathao mitʼketʼkinạ. Ar ona tayom Israelko mod khon mahamạri do thirena.

⁹ Menkhan okoe ona mahamạriteko gocʼen onkoakʼ lekha do bargel pon hajar tahẽkana.

¹⁰ Unre Probhu Isor do Moseye metadea,

¹¹ “Naeke Aronren goṛomtetʼ koṛa, metakʼme Eleasarren hopon Pinehas do Israelko cetan khon ińakʼ edreye sạṅgińketʼtińạ. Israelko modre uni do ińakʼ bakhra babotre iń lekageye ahkaokʼ kana. Onate ińakʼ bakhra reakʼ ạḍi ahkaoteakʼ tahẽkanre hõ iń do bạń marao utạrletʼkoa.

¹² Ona iạte unim metaea, iń do uni lạgitʼ mitʼṭecʼ bhạlại reakʼ iń bondobos akada.

¹³ Uni do acʼren Isorakʼ bakhra reakʼe ahkaokʼkante ar Israelkoakʼ kại reakʼ puruchune kạmi akatʼte uni lạgitʼ nonkan mitʼṭecʼ bondobosiń bandhao akada jemon naeke hudạ do uni ar uni bõsrenko talare jaejug hạbicʼ tahẽakan tahen.”

¹⁴ Ar okoeṭakʼ Israel hoṛ do Midiạnren kuṛi sãoteye gocʼ ocoyen uniyakʼ ńutum do Simerai tahẽkana. Uni do Sạluren hopon ar Simeon gusṭikoren mitʼṭen mukhiyạ hoṛe tahẽkana.

¹⁵ Ar okoeṭakʼ Midiạnren kuṛiye gocʼ ocolen uniyakʼ ńutum do Kosbi tahẽkana. Uni do Midiạn disạmren Sur ńutuman mitʼṭecʼ bõskoren mukhiyạren hoponerae tahẽkana.

¹⁶ Tayomte Probhu Isor do Moseye metadea,

¹⁷ “Midiạniko do bạiri mente hudiskope ar gocʼ giḍikakope,

¹⁸ ente Piorren debota sewawae ar Kosbiyakʼ katha iạte bhul horteko idiketʼpete onko do bạiriko hoyakana. Am dom baḍaegea, nui Kosbige onkoren peṛa ar mitʼṭen Midiạn sordarren hoponerae tahẽkana. Piorren Bakʼal debota sewawae iạte tinre ape talare mahamạri ńelena unre uni maejiugeye gocʼ ocolena.”