Numeri 24 - সান্তালী বাইবেল

¹ Biliam do tinreye ńelkeda, Probhu Isorakʼ sana do Israelko bhorako onate uni do eṭakʼ dhao leka gonokko reakʼ goṛo hatao do bae kurumuṭuleda. Uni do hahaṅkar secʼ mẽtʼãhãe samaṅketʼtaea.

² Uni doe ńelkeda, Israelko do akoakʼ khũṭ lekageko ḍera akana. Unre Isorren Jiu do uni cetanreye hecʼena,

³ Ar uni do Isorakʼ noa katha lạlạiye ehopʼena: “Bior hopon Biliam do noa kathae meneda, okoeyakʼ mẽtʼ do jhicʼge menakʼtae uni do noa kathae meneda,

⁴ Okoe hoṛ Isorakʼ kathae ańjometʼkan ar sanam daṛeanicʼ reakʼ dorsone ńeletʼkan, ar okoe do otreye ombakʼ hape akan ar okoe do mẽtʼ jhicʼ akantae,

⁵ uni do noa kathae meneda: E Jakob, amakʼ tạmbuko do tinạkʼ mońj! E Israel, tinạkʼ mońj amakʼ tahen jaega do!

⁶ Onako do buru tala otetko leka, gaḍa aṛe reakʼ bagwanko leka, Probhu Isore rohoe akatʼ Aguru dareko leka, dakʼ aṛe reakʼ debdạru dareko lekage.

⁷ Taren reakʼ kanḍa khon dakʼ do dul oḍokokʼa, ar uniren bõs do aema dakʼreko tahena. Onkoren raj do Ogag khon hõe usulokʼa, onkoakʼ rajosṭi do ṭhonokte arhõ maraṅokʼa.

⁸ Isor do Misor khon onkoe oḍok ạgu akatʼkoa, ar unige onkoren bir ḍaṅgrawakʼ daṛe leka do. Onko upạrte okoe jạtrenko teṅgona onko doe utʼ cabakoa, onkoakʼ jaṅ doe rạpudtakoa, ar sarte onko doe tuńkoa.

⁹ Dhạcri kul ar kul eṅgal leka onko doko burumokʼa arko kunḍlạṅ hapekokʼa, unre onko beretʼko reakʼ do okoeye dilkea? Okoe apeko bhorape onkage onkore hõ bhor paṛaokʼma; ar okoe sarapko emape, onkage onko cetanre hõ sarap paṛaokʼma.”

¹⁰ Niạ katha ańjomkate Balak do Biliam cetanre ạḍiye raṅgaoena. Ar acʼakʼ tiye ghusiketʼteye menkeda, “Ińren bạiriko sarapako lạgitʼ iń hoho ạguletʼmea menkhan am do niạ ghalokʼ pe dhaoem bhoratʼkoa.

¹¹ Am do ńitge nonḍe khon amakʼ disạmte ruạṛ calakʼme. Iń do ạḍitetʼ manotmeyiń menleda menkhan Probhu Isor do bae ńam ocowatʼmea.”

¹² Biliam do Balake roṛ ruạṛadea, “Amem kolletʼko hoṛ do cetʼ bạń metatʼko tahẽkana,

¹³ Balak do sona ar rupạte perecʼ raj oṛakʼe imạńre hõ enhõ ińakʼ sana leka bhage ar bạṛicʼ do bạń men daṛeakʼa se Probhu Isorakʼ hukum birud hõ bạń sendaṛeakʼa, menkhan Probhu Isor okae mitạń eken onageń roṛ daṛeakʼa?

¹⁴ Iń do ńitokʼ ińren hoṛko ṭheniń ruạṛ calakʼ kana, menkhan ona lahare amiń sontor oṭokam kana noko jạtrenko do tayom daram amren hoṛko cetanre cetʼko cekaea mente.”

Biliamakʼ ponakʼ nạbi katha

¹⁵ Unre Biliam do Isor emakʼ noa katha roroṛe ehopʼena: “Beor hopon Biliam do noa kathae meneda, okoeyakʼ mẽtʼ beṅgetʼge menakʼtae uni do noa kathae meneda,

¹⁶ Okoe hoṛ Isorakʼ kathae ańjometʼkan ar maraṅ Isor ṭhen khon bud ar ạkile ńametʼ, ar okoe do sanam daṛeanicʼ reakʼ dorsone ńeletʼ, okoe do otreye ombakʼ hape akan, ar okoeyakʼ mẽtʼ jhicʼ akantae, uni do noa kathae meneda:

¹⁷ ‘ńitokʼ baṅre hõ iń do uniń ńelńame kana, ar iń sorrene baṅkanre hõ enhõ uni doń ạritʼ edekana. Mitʼṭecʼ ipil doe rakapʼa Jakobakʼ bõsre, mitʼṭecʼ raj ṭheṅgage Israelko mod khon rakapʼ hijukʼa. Uni do Moab ar Setren hoponkoakʼ bohokʼe gejertakoa.

¹⁸ Bạiriko do Edom, metakʼme Seyirko dokhol joṅa, menkhan Israelko do birbanṭa hoṛ leka ektiạriko hameṭ joṅa.

¹⁹ Jakobakʼ bõs khon mitʼṭen raje rakapʼ hijukʼa, ar nagrahare sarecʼ akan Edomrenko uni doe marao utạrkoa.’ ”

Biliamakʼ ses nạbi katha

²⁰ Amalekiko ńelte Biliam do Isorakʼ noa katha roroṛe ehopʼena: “Eṭakʼ sanam jạtrenko modre Amalekiko do maraṅko tahẽkana, menkhan onkoakʼ sesokʼ do maraokʼge hoyokʼa.”

²¹ Ona tayom Biliam do Keniko ńelte Isorakʼ noa katha roroṛe ehopʼena: “Apeakʼ tahen jaega do kajakgetapea; ente apeakʼ tukạ do huṭupʼ dhirire hạmbutʼ akana.

²² Menkhan sesre E Kenirenko ape dope marao utạrokʼa; Ạsurrenko do ar tinạkʼ din bondi kateko dohokapea?”

²³ Ona tayom Biliam do Isorakʼ noa katha roroṛe ehopʼena: “Hae! Isor noakoe hoe ocoyre, unre cetʼ jãhãe jiwetʼe tahẽdaṛeakʼa?

²⁴ Kitim dip aṛe khon jahajko do hecʼkate Ạsurrenko ar Eberrenkoe copotʼkoa; menkhan Kitimren hoṛ doko marao utạrokʼa.”

²⁵ Inạ tayom Biliam do beretʼkate oṛakʼ secʼe mohnḍayena ar Balak hõ acʼakʼ horteye ruạṛ calaoena.