Numeri 23 - সান্তালী বাইবেল

Biliamakʼ pạhil nạbi katha

¹ Ona tayom Biliam do Balake metadea, “Nonḍe iń lạgitʼ eae goṭecʼ pinḍ benaome ar onare samaṅko lạgitʼ eae goṭecʼ ḍaṅgra ar eae goṭecʼ bheḍa bondobosạńme.”

² Balak do Biliamakʼ katha lekageye kạmikeda ar unkin do mimitʼ pinḍre mimitʼ goṭecʼ ḍaṅgra ar mimitʼ goṭecʼ bheḍakin samaṅketʼkoa.

³ Ona tayom Biliam do Balake metadea, “Okoe janwarkoante jeredokʼ samaṅokʼakʼem samaṅketʼ am do onko ṭhenge tahẽhataṛokʼme ar iń do onteń senlenge. Pasecʼ Probhu Isor do iń sãote ńapamokʼ lạgitʼgeye hijukʼkan. Ar iń ṭhen okae sodor onage amiń lạiyama.” Niạ katha menkate Biliam do nonkan mitʼṭecʼ burureye rakapʼena one onare jãhãn dare nạ̃ṛĩge baṅ tahẽkan.

⁴ Unre Isor do uni sãoteye ńapamena. Ar Biliam doe menkeda, “Iń do eae goṭecʼ pinḍ iń benao akada ar mitʼke mitʼ pinḍ cetanre mitʼṭenkate ḍaṅgra ar mitʼṭenkate bheḍań samaṅketʼkoa.”

⁵ Unre Probhu Isor do Biliamakʼ mocare katha dohoadeteye metadea, “Am do Balak ṭhen ruạṛ senkate noako katha lạiyaeme.”

⁶ Unre Biliam do Balak ṭhene ruạṛ calaoena. Are ńelkeda, Balak do Moabren sanam mukhiyạko tulucʼ samaṅ akatʼko janwar ṭhene teṅgo akana.

⁷ Unre Biliam do Isor emakʼ noa katha roroṛe ehopʼena: “Balak do Aram disạm khon ińe ạgukedińạ, purub reakʼ buruko khon Moab raj do ińe ạgukedińạ. Uni doe menkeda, ‘iń ńutumte dela Jakob sarapaeme, Israelrenko upạrte bin bhạlạiyakʼ katha baṛe lạiyạńme.’

⁸ Isor bae sarap akatʼko hoṛ do, cekateń sarapakoa? Probhu Isor okoe upạrte bin bhạlại reakʼ katha bae roṛakatʼ, onko upạrte cekate iń do bin bhạlại reakʼ katha doń roṛa?

⁹ Iń do buru muthni khoniń ńelketʼkoa; ar buru cetan khon onkoń ạribạndhi akatʼkoa. Nonkan mitʼṭen jạtrenkoń ńelketʼkoa okoe do eṭakʼko khon pharakreko tahenkan; onko do eṭakʼ sanam jạtrenko sãote midokʼko lekako baṅkana.

¹⁰ Jakob bõsrenko do alekha dhuṛi leka onko do okoeye lekha daṛekekoa? Israelakʼ pon hạṭiń reakʼ mitʼ hạṭińhõ cetʼ jãhãeye lekha daṛekekoa? Onko dhorom hoṛko lekage ińakʼ gujukʼ hõ baṛe hoyokʼtińma; ar ińakʼ sesokʼ hõ onko lekage hoyokʼma.”

¹¹ Noa katha ańjomkate Balak do Biliame metadea, “Noa do cetʼem cekawạdińa? Iń do ińren bạiriko sarapako lạgitʼ iń ạguketʼmea ar am do onkom bhoratʼkoa.”

¹² Biliame roṛ ruạṛkeda, “Probhu Isor ińakʼ mocare okaṭakʼ kathae emadiń ona do cetʼ begor lạiyteń tahẽdaṛeakʼa?”

Biliamakʼ dosar nạbi katha

¹³ Tayomte Balak do Biliame metadea, “Dela iń sãote ar mitʼ jaegare hijukʼme. Onḍe khon am do Israelkom ńelkoa. Onkoren sanamkogem ńelńamkoa ona do baṅ, eken onkoren mitʼ mucạtʼrengem ńelńam daṛeakoa. Ar onḍe khon iń ńutumte onkom sarapakoa.”

¹⁴ Niạ menkate Balak do Pisga buru muthnire okare Sophim ṭạnḍi menakʼ onḍe uniye idikedea. Onḍe uni do eae goṭecʼ pinḍ benaokate mimitʼ goṭecʼ cetanre mitʼṭenkate ḍaṅgra ar mitʼṭenkate bheḍae samaṅketʼkoa.

¹⁵ Ona tayom Biliam do Balake metadea, “Am do jeredokʼ samaṅokʼ lạgitʼ janwarko sorrege tahẽhataṛokʼme, ar iń do Probhu Isor sãoteń ńapam hecʼlenge.”

¹⁶ Probhu Isor do Biliam sãoteye ńapamente uniyakʼ mocare kathae dohoadea, “Am do Balak ṭhen ruạṛ senkate noa katham lạiyaea.”

¹⁷ Khan Biliam do Balak ṭhene ruạṛ senena. Uni doe ńelkeda Balak do Moabren mukhiyạkoante samaṅakatʼko janwar ṭhengeye teṅgo akana. Balak do uniye kulikedea, “Probhu Isor do cetʼe metatʼmea?”

¹⁸ Biliam do unre Isor emakʼ niạ katha lạlạiye ehopʼkeda: “E Balak raj ma beretʼme, ar ańjomme; E Sipor hopon, ińakʼ katha baṛe luturakʼme.

¹⁹ Isor do manwae baṅkana onate uni do eṛe kathae roṛa; uni do manwa khon hõ bae janam akana, onate moneye bodoltaea. Uni okae men ona do hoyokʼgea, ar acʼakʼ gokʼakʼ do jaogeye purạueda.

²⁰ Iń do onko ạsirbadako lạgitʼ hukum iń ńam akada. Uni do Israelkoe bhor akawatʼkoa, iń do bạń bodol daṛeakʼa.

²¹ Uni do Jakobre cetʼ ghạṭge bae ńel akada, ar Israelkoakʼ bhạgre jãhãn dukge bae dohoakada. Onkoren Probhu Isor do onko sãorege menaea, ar onkoren rajakʼ sạhnạs do onko ṭhenge menakʼa.

²² Uni do Misor khon onkoe oḍok ạgu akatʼkoa, bir ḍaṅgrawakʼ daṛe leka onkoakʼ daṛe do.

²³ Jakob cetanre jãhãn gonokko do ohoge cahṭao daṛelena; Israelko cetanre jãhãn mantar hõ ohoge cahṭaolena. Jakob, metakʼme Israel reaṅ do ńitokʼ noa katha menogokʼa, ‘Isor okae ceka akatʼ ona ńelme.’

²⁴ Noko hoṛko do kul eṅga lekako teṅgo rakapʼa, ar dhạcri kul lekage onko doko beretʼa. Sendra gocʼko reakʼ mãyãm ar jel ạuriko jom hạbicʼ onko do bako jirạukʼa.”

²⁵ Niạ katha ańjomkate Balak doe menkeda, “Thirokʼme, onko do sarap hõ alom sarapakoa ar bhor hõ alom bhorakoa.”

²⁶ Biliame roṛ ruạṛkeda, “Iń do cetʼ bạń lạiyatʼmea, Probhu Isor okae mitạń onage roroṛ hoyokʼtińạ mente?”

Biliamakʼ tesar nạbi katha

²⁷ Tayomte Balak do Biliame metadea, “Dela, ar mitʼ jaegateń idimea. Pasecʼ Isor do kusite onḍe khon iń ńutumte onkoe sarapako.”

²⁸ Niạ menkate Balak do Piạr burute one onḍe khon hahaṅkar reakʼ Jisimon ńel ńamokʼ onḍe Biliame idikedea.

²⁹ Unre Biliame menkeda, “Nonḍe iń lạgitʼ eae goṭecʼ pinḍ benaome ar eae goṭen ḍaṅgra ar eae goṭen bheḍa samaṅko lạgitʼ bondobosạńme.”

³⁰ Biliamakʼ katha lekage Balak doe onkakeda. Uni do mimitʼ pinḍre mimitʼ goṭen ḍaṅgra ar mitʼṭenkate bheḍae samaṅketʼkoa.