Numeri 22 - সান্তালী বাইবেল

Balak raj do Biliame hohoaekan

¹ Inạ tayom Israel hoponko do Moab reakʼ buru otet jaegare senkate Jerikho nagraha samaṅ secʼ jordan gaḍa hanasareko ḍerayena.

² Ar Israel hoponko Amoriko cetanre okako cekaketʼ ona joto do Sipor hopon Moabren Balak raje ńelkeda.

³ Ar nunạkʼ saṅge hoṛ ńelkate Moabren hoṛ do botor caṛhaoatʼkoa. Israelko ńelte onko do sạrige ạḍitetʼko botorena.

^4-5 Onko do Midiạnren murubbikoko lạiyatʼkoa, “Ḍaṅgrako ṭạnḍireko ạtiń leka noko dolrenko do abo beṛhaeteakʼ sanamakʼko siṭhạ cabaea.” Onate Moabren raj Sipor hopon Balak do Beor hopon Biliam hoho ạguiye lạgitʼ hoṛkoe kolketʼkoa. Unre Biliam do Uphreṭis gaḍa aṛe reakʼ acʼren hoṛkoakʼ disạmre Pethor nagrahareye tahẽkana. Balak doe roṛgotʼkada, “Misor disạm khon mitʼ dol hoṛko oḍok hecʼakana. Ar goṭa disạmko chạplạu ạcur akana ar iń samaṅreko girobasokʼ kana.

⁶ Noko hoṛ do iń khon hõko daṛegea; onate dela hijukʼme ar onko sarapakome. Ar onka khan pasecʼ onko doń bhagaokoa ar ińakʼ disạm khoniń laga ńir daṛeakoa. Iń do noa kathań baḍaegea, am okoeyem bhorako onko do sạrige bhorko ńama ar okoeyem sarapako onkore sarap do paṛaokʼgea.”

⁷ Unre bhạg ńel ocoy lạgitʼ Moab ar Midiạnren mukhiyạko do ṭaka-poesa soṅgekateko mohnḍayena. Ar Balak okae metatʼko tahẽkan onkage senkate Biliamko metadea.

⁸ Unre Biliam do onkoe metatʼkoa, “Ńindạ do nonḍege tahẽ aṅgakʼpe. Ar Probhu Isor okaṭakʼe roṛ ruạṛạń onageń baḍae ocopea.” Onate Moabren onko mukhiyạ do uni sãoteko tahẽyena.

⁹ Isor do hecʼkate Biliame kulikedea, “Am sãoten noko hoṛ doko okoe kana?”

¹⁰ Biliam do Isore roṛ ruạṛadea, “Moabren raj Siporren hopon Balak do iń ṭhen kathae roṛgotʼ akada,

¹¹ ‘ńelme Misor disạm khon mitʼ dol hoṛko oḍokʼ hecʼakana ar disạmko chạplạu ạcur akada. Onate ńitokʼ hecʼkate am do iń secʼte onko hoṛko sarapakome. Enḍekhan pasecʼ onko do lạṛhạiteń bhagaokoa ar nonḍe khoniń laga ńir daṛeakoa.’ ”

¹² Menkhan Isor do Biliame metadea, “Noko hoṛ sãote alom calakʼa ar onko hoṛ hõ jãhãnakʼ alom sarapakoa, ente onko do ińren bhoran hoṛ kanako.”

¹³ Dosar hilokʼ Biliam do setakʼ jạpitʼ khon beretʼkate Balake kolakatʼko mukhiyạkoe metatʼkoa, “Ape do apeakʼ disạmte ruạṛ calakʼpe. Ente Probhu Isor do ape sãote sen ocoạń do bae rebenkana.”

¹⁴ Moabren mukhiyạko do ruạṛ calaoente Balakko lạiyadea, “Biliam do ale sãote hijukʼ bae rebenlena.”

¹⁵ Unre Balak do arhõ eṭakʼ mukhiyạkoe kolketʼkoa. Onko do lahaten mukhiyạko khon lekhate jemon ḍher onkage manotan hoṛko tahẽkana.

¹⁶ Onko do Biliam ṭhen senkateko menkeda, “Sipor hopon Balak do noa kathae meneda, uni ṭhen calakʼ jãhãnakʼge jemon aloe tạkicʼme.

¹⁷ Uni do ạḍiye manotmea ar okam khoj onageye onkawama. Uni doe khojkana jemon senkate uni secʼ khon onko hoṛkom sarapako.”

¹⁸ Biliame roṛ ruạṛatʼkoa, “Balak do sona rupạte perecʼ acʼakʼ raj oṛakʼe imạńre hõ iń do ińren Probhu Isorakʼ hukum bahre senkate jãhãnakʼ ohogeń cekalea- baṅ do huḍińakʼkan ar baṅ do maraṅakʼ kạmikan.

¹⁹ Tobe ape hõ ńindạ do nonḍege tahẽ aṅgakʼpe; ente Probhu Isor okae mitạń onage apeń baḍae ocopea.”

²⁰ Ona ńindạ Isor do hecʼkate Biliame galmaraoadea, “Noko hoṛ hõ hohoam lạgitʼko hecʼakana onate onko sãote calakʼme, menkhan iń okań metam eken onagem kạmiya.”

Biliam ar uniren gadha

²¹ Dosar hilokʼ setakʼre Biliam do jạpitʼ khone beretʼente acʼren gadha eṅgare decʼkate Moabren mukhiyạko sãoteye mohnḍayena,

²² menkhan uni calakʼe ńelkede khan Isor do uni cetanreye edreyena. Ar uni tạkicʼ darame lạgitʼ Probhu Isorren goḍet do horreye teṅgoyena. Biliam do gadha eṅgare decʼkateye calakʼkan tahẽkana. Ar acʼren barea gutikin hõ acʼ sãotekin tahẽkana.

²³ Gadha eṅga do Probhu Isorren goḍet tarwaṛe sapʼkate teṅgo akane ńelkede khan hor bạgikate eṭakʼ secʼe pheḍena. Ar Biliam do gadha eṅga arhõ horte calakʼ lạgitʼe dalkedea.

²⁴ Probhu Isorren goḍet do ona tayom barea darkha khet reakʼ nanha hor talareye teṅgoyena. Ar ona hor reakʼ banarsa aṛe do pạcri tahẽkana.

²⁵ Gadha eṅga do Probhu Isorren goḍete ńelkede khan pạcri aṛe ńokʼte calakʼe ehopʼena. Onate Biliam do mitʼ jaṅga gasaoentaea. Unre Biliam do arhõ gadha eṅgae dalkedea.

²⁶ Inạ tayom Probhu Isorren goḍet doe sen lahayente nonkan mitʼṭecʼ nanha horreye teṅgoyena onḍe do leṅgasa se jojomsa ạcurokʼ reakʼ jãhãn jaegage baṅ tahẽkana.

²⁷ Unre gadha eṅga do Probhu Isorren goḍet ńelte Biliam sudhại burumena. Onate Biliam doe raṅgaoena ar ṭheṅgate gadha eṅga arhõe dalkedea.

²⁸ Probhu Isor do gadha eṅgawakʼ mocae jhicʼketʼtaea. Uni do Biliame metadea, “Cetʼ iń cekaketʼmete am do pepe dhaoem dalkedińa?”

²⁹ Biliam do gadha eṅgae roṛ ruạṛadea, “Am do bokam ńam akadińạ. Ińakʼ tire tarwaṛe tahẽlen khan enḍekhan ńitge amiń samakʼ gocʼkema.”

³⁰ Gadha eṅga do Biliame metadea, “Iń do cetʼ amren uni gadha doń baṅkana one iń cetanre jonom bhorem dejokʼkan? Am sãote cetʼ jãhãtisiń nonka akatʼa?” Biliame menkeda, “Baṅ, onka do bam onka akada.”

³¹ Inạ tayom Probhu Isor do Biliamakʼ mẽtʼe jhicʼketʼtaea ar Probhu Isorren goḍet do tire tarwaṛeante horre teṅgo akane ńelkedea. Ar onate uni doe ombakʼena ar otreye taberena.

³² Probhu Isorren goḍet do uniye kulikedea, “Amren gadha eṅga do pe dhao cedakʼem dalkedea? Am do iń samaṅrege iń upạrtem calakʼkante am tạkicʼ darame lạgitʼ iń hecʼakana.

³³ Gadha eṅga do iń ńelte pepe dhaoge iń samaṅ khone sahaṛ akana. Uni bae ocokʼlen khan, khạṭige am doń gocʼkema ar gadha do jiwetʼiń dohokea.”

³⁴ Unre Biliam do Probhu Isorren goḍete metadea, “Iń doń kại akada. Bạń bujhạu daṛeada, am dom tạkicʼ daram edeńkana mente. Ińre kusi bạnum khan enḍekhan iń doń ruạṛ calakʼa.”

³⁵ Probhu Isorren goḍet do Biliame metadea, “Am do onko hoṛko sãote calakʼme, menkhan iń okaṭakʼ iń metam eken onagem roṛa.” Unre Biliam do Balake kolletʼko mukhiyạko sãoteye calaoena.

³⁶ Biliamakʼ hijukʼ reakʼ kathae ańjomketʼ khan Balak do daram ạguiye lạgitʼ Arnon gaḍa aṛere Moabrenkoakʼ nagrahateye oḍokʼ senena. Noa nagraha do acʼakʼ rajosṭi reakʼ ses simạna tahẽkana.

³⁷ Balak do Biliame metadea, “Iń do cetʼ usạra bạń tolob akatʼmea? Tobe cedakʼ iń ṭhen do bam hecʼlena? Am puruskarme reakʼ daṛe do cetʼ bạnukʼtińạ?”

³⁸ Biliame roṛ ruạṛkeda, “Iń do ńitokʼ am ṭheniń hecʼakana. Menkhan iń apnarakʼ jãhãnakʼ roroṛ reakʼ daṛe do bạnukʼtińạ. Isor okaṭakʼe baḍae ocoyiń eken onageń roṛa.”

³⁹ Inạ tayom Biliam do Balak sãote Kiriat Husot atoteye calaoena.

⁴⁰ Balak do ḍaṅgra ar bheḍae dãṛẽketʼkoa ar thoṛa jel do Biliam ar uni sãote okoeko mukhiyạko tahekan onkoe ematʼkoa.

⁴¹ Ar dosar hilokʼ setakʼ jokhecʼ Balak do Biliame soṅgekedete Bamot Bakʼal buruteye rakapʼena. Ar Biliam do onḍe khon Israelkoren eken mitʼ hĩs hoṛgeye ńelketʼkoa.