Numeri 21 - সান্তালী বাইবেল

Arad raj

¹ Aradren Kanan raj do Negebreye girobasokʼ kan tahẽkana. Ar Israel hoponko Athrim reakʼ horteko hijukʼ kana menteye ańjomketʼ khan uni do onko tulucʼe lạṛhạiyena ar onkoren thoṛa hoṛe sapʼ idiketʼkoa.

² Unre Israelko do Probhu Isor ṭhen manotketʼteko menkeda, “Aradren noko hoṛko aleakʼ tire bam soprotko, enḍekhan ale do onkoakʼ ato ar nagrahale marao giḍikakʼa.”

³ Probhu Isor do onkoakʼ nehõre ańjomketʼtakoa ar Kananrenko do onkoakʼ tireye jimạkatʼkoa. Ar Israel hoponko do onkoakʼ atoko ar nagrahako maraoketʼtakoa. Ona iạte ona jaega reakʼ ńutum do Hormako (ona reakʼ mane do “ḍahao maraokʼ ”) dohokeda.

Rupạren biń

^4-5 Inạ tayom Israelko do Edom disạm aṛete ạcur senokʼa mente Hor buru khon arakʼ jalapuri secʼko laha idiyena. Menkhan onko do horreko edre-ạṛisente Mose ar Isor upạrte karacʼ kurujokʼko ehopʼena arko menkeda, “Niạ hahaṅkarre gujukʼ lạgitʼ do cedakʼ Misor khonem oḍok ạguketʼlea? Nonḍe do piṭhạ hõ bạnukʼa ar dakʼ hõ bạnukʼa, ar noa mitʼlekan jomakʼ iạtele ạṛis cabayena.”

⁶ Unre Probhu Isor do onko talare mitʼlekan seṅgel bińkoe kolketʼkoa. Onkoakʼ gerte ạḍi utạr Israelko gocʼena.

⁷ Unre hoṛko do senkate Moseko metadea, “Ale do Probhu Isor ar am upạrte kathale roṛ akatʼte ạḍile kại akada. Am do ńitokʼ Probhu Isor ṭhen nehõrokʼme jemon ale ṭhen khon bińkoe pharakʼko.” Unre Mose do hoṛko lạgitʼe nehõrena.

⁸ Ar Probhu Isor do Moseye galmaraoadea, “Am do mitʼṭen bińem tearea ar mitʼṭecʼ ḍaṅrem akakaea. Ar biń ṭhene ger ocoakan hoṛ do uni bińe beṅgetʼae khangeye jiwedokʼa.”

⁹ Unre Mose do pitạlren mitʼṭen biń benaokate mitʼṭecʼ ḍaṅreye akakadea. Ar jãhãe biń ger hoṛge tinre uni pitạlren biń secʼe beṅgetʼetʼ tahẽkana unrege uni doe bogekʼkan tahẽkana.

Hor buru khon Moabrenkoakʼ disạmte

¹⁰ Inạ tayom Israel hoponko do uṭhạuente Obotre senkateko ḍerayena.

¹¹ Ona tayom Obot khonko uṭhạuente Iya-Habarim reakʼ hahaṅkarre senkateko ḍerayena. Iya-Habarim do Moab purub hahaṅkar secʼre tahẽkana.

¹² Ona tayom onḍe khon uṭhạuente onko do Sered buru tala otetre senkateko ḍerayena.

¹³ Ar onḍe khon arhõ uṭhạukate onko do Arnon gaḍa paromkateko ḍerayena. Ar Amorikoakʼ disạm khon oka hahaṅkar ehopʼakan onare noa Arnon gaḍa hõ tahẽkana. Ona gaḍa reakʼ mitʼ secʼ do Moab ar eṭakʼ secʼ do Amorikoakʼ disạm tahẽkana.

^14-15 Probhu Isorakʼ lạṛhại ńutumanakʼ puthire menakʼa, “Nagraha secʼ sen akan Supha ṭoṭha reakʼ Owaheb ar Arnon ar ona reakʼ nalako ar buru nala reakʼ dhasna, noako do Moab simạnarege japakʼ akana.”

¹⁶ Onḍe khon mohnḍakate Israelko do Beyar ńutuman mitʼṭecʼ kuń ṭhenko seṭerena. Niạ kuń ṭhenge Probhu Isor do Moseye galmaraoadea, “Hoṛko mitʼ ṭhen jarwakom, onko do dakʼiń emakoa.”

¹⁷ Unre Israel hoponko noa sereńko sereńkeda: “E kuń, bhumbuk rakabokʼme. Ape do noa kuń reaṅ sereńpe.

¹⁸ Noa kuń do rapajkoakʼ cakʼlao ṭheṅga jorteko lakeda, noa do mukhiyạkoakʼ ṭheṅga jorteko kholao akada.” Ona tayom Israelko do ona hahaṅkar ṭoṭha khon Mathante,

^19-20 Ar Mathan khon Nahalielte, ar Nahaliel khon Bamotte, ar Bamot khon Moab reakʼ bilạn ṭạnḍiteko calaoena. Ona otet Pisga reakʼ usul utạrakʼ buru khon hahaṅkar reakʼ Jisimon ńutumanakʼ jaega do ńel ńamokʼkan tahẽkana.

Amori ar Basonren rajkin bhagao ocokʼkan

²¹ Israel hoponko do Amorikoren raj Sihon ṭhen hoṛ kolkateko nehõradea,

²² “Amakʼ rajosṭi talate parom calao ocoaleme baṛe. Ale do hor bạgikate jãhãn jumi se darkha khet talate bale calakʼa, se kuń reakʼ dakʼ hõ bale ńũiya. Amakʼ rajosṭi ạurile parom calakʼ hạbicʼ ḍahartegele calao idikʼa.”

²³ Menkhan Sihon raj do acʼakʼ rajosṭi talate Israelko bae parom ocowatʼkoa. Uni do acʼren lạṛhại phạdante hahaṅkarre Israelko upạrte lạṛhại lạgitʼe oḍok hecʼena. Uni do Jahas nagrahare seṭerkate Israelko sãoteye lạṛhạiyena.

²⁴ Niạ lạṛhạire Israelko do uniko gocʼkedea ar Arnon khon Jabok gaḍa hạbicʼ uniyakʼ disạmko ạidạriyana. Onko do eken Amonrenkoakʼ simạ hạbicʼko ạidạriyana, ente Amonrenkoakʼ disạm reakʼ simạna do usạrateko parom hotʼ daṛeakʼ onka do baṅ tahẽkana.

²⁵ Israelko do Hesbon ar ona aḍepase reakʼ atoko sudhạ Amorikoakʼ sanam nagrahako dokholana ar onḍe girạbasokʼko ehopʼena.

²⁶ Hesbon do Amorikoren Sihon rajakʼ nagraha tahẽkana. Uni do Moab disạmren lahaten raj sãote lạṛhạikate Arnon gaḍa hạbicʼ sanam disạmkoe dokhol akatʼ tahẽkana.

²⁷ Ona iạte kạhtuk jokʼṛaoko doko menakada: “Ape do Hesbon nagrahate hecʼkate arhõ benao doṛhaepe. Sihon reakʼ nagraha hõ arhõ benao rakabpe.

²⁸ Hesbon nagraha khonakʼ seṅgel do oḍok hecʼente Moab ar nagrahakoe jarkharkeda ar Arnon gaḍa aṛe girobasokʼkanko do ona seṅgelteye atarketʼkoa.

²⁹ Hae hae E am Moab! E Kemos debotaren hoṛko, ape dope dhaṅdhaser ocoakana. Kemosren hoponko doko dạṛkeda ar uniren hoponerako do Amorikoren Sihon raj ṭhenko bondi ocoakana.

³⁰ Menkhan ale do onko upạrtele lạṛhại akana. Hesbon khon Dibon hạbicʼle dhaṅdhaser akada. Ar Medeba do Noph reakʼ ona jaega hạbicʼ calao akana, ale do onale dhaṅdhaser akada.”

³¹ Inạ tayom Israelko do Amorikoakʼ disạmre girạbasokʼko ehopʼena.

³² Mose do Jaser nagrahate cikʼyạkoe kolkatʼko tayom Israelko do ona nagraha reakʼ aḍepase atokoko dokholana ar Amorikoko laga ńirketʼkoa.

³³ Ona tayom onko doko ạcurente Bason disạm reakʼ ḍaharteko laha idiyena. Unre Basonren raj Og ar uniren lạṛhại phạdko oḍok hecʼente onko sãote lạṛhại lạgitʼ Edrei nagrahareko seṭerena.

³⁴ Unre Probhu Isor do Moseye galmaraoadea, “Og raj do alom botoraea, ente uniyakʼ disạm uni ar uniren lạṛhại phạdko do amakʼ tireń jimạ akatʼkoa. Amorikoren Sihon raj, okoe do Hesbonreye rajokʼkan tahẽkan, uniyakʼ oka dosań hoyocoletʼtae onkage nuiyakʼ hõ hoyokʼtaea.”

³⁵ Unre onko do Og ar uniren hoponko ar sanam lạṛhại phạdko gocʼketʼkoa. Ar celehõ jiwetʼ bako doholetʼkoa. Ar uniyakʼ disạm hõko dokholkeda.