Numeri 20 - সান্তালী বাইবেল

Dhiri khon dakʼ oḍokokʼkan

¹ Bochor reakʼ pạhilakʼ candore Israelko do Sin hahaṅkar ṭoṭha reakʼ Kades ṭhen senkateko ḍerayena. Ar unre Mạriạm do onḍeye gocʼena arko topakadea.

² Ar onḍe dakʼ baṅ tahẽkante Israelko do Mose ar Aron upạrte dolko pakaokeda.

³ Onko do Mose sãoteko jhogṛayena arko menkeda, “Probhu Isor samaṅre aleren boehako tinreko gocʼena unre ale hõle gocʼlen khan bhage hoekokʼa.

⁴ Aben do Probhu Isorren hoṛko noa hahaṅkarte ben ạguakatʼlea jemon aleren janwarko sudhạ nonḍele gujukʼ.

⁵ Misor disạm khon cedakʼ noa khaṅgoṭ jaegate doben ạguketʼlea? Niạ jaegare baṅ do jomakʼ menakʼ, baṅ do loa jo menakʼ, baṅ do darkha nạ̃ṛĩ ar ḍạlim menakʼ; nonḍe do dakʼ hõ bạnukʼa.”

⁶ Noa iạte Mose ar Aron do onko ṭhen khon senkate ńapamokʼ tạmbu reakʼ duạr ṭhenkin ombakʼ hapeyena. Unre Probhu Isorakʼ ṭhonok do unkin samaṅre sodorena.

⁷ Probhu Isor do Moseye galmaraoadea,

⁸ “Am do ona ṭheṅga hataome ar dadam Aron taben Israel hoponko mitʼ ṭhen jarwakʼ lạgitʼ metakoben. Ar am do Israelko samaṅre menakʼ maraṅ dhirim metawakʼa ar ona do dakʼe emokʼa. Israel hoponko ar onkoren janwarko jemon dakʼko ńũ daṛeakʼ ona iạte am do dhiri khon dakʼem oḍok akoa.”

⁹ Probhu Isorakʼ hukum lekage Mose do uni samaṅ khon ona ṭheṅgae hataokeda.

¹⁰ Ar unkin do ona maraṅ dhiri ṭhen hoṛkin jarwaketʼkoa. Ona tayom Mose do onkoe metatʼkoa, “E ṭhoṭhok hoṛko, noa dhiri khon cetʼ dakʼ liń oḍokapea?”

¹¹ Niạ katha menkate Mose do tiye tulketʼte acʼakʼ ṭheṅgate ona dhirire bar dhaoe dalkeda; ar onate dhiri khon dakʼ do oḍokokʼ ehopʼena ar Israel hoponko ar onkoren janwarko ona dakʼko ńũkeda.

¹² Menkhan Probhu Isor do Mose ar Arone galmaroatʼkinạ, “Aben do iń cetanre baben bhorsalena ar Israelko samaṅre sonot mente baben manaoledińa. Onate Israelko okaṭakʼ disạmiń emako ona disạmte onko do baben idi daṛeakoa.”

¹³ Ar ona dakʼ do Meribako metatʼa (metakʼme, “Jhogṛa”). Nonḍe Israelko do Probhu Isor tulucʼko jhogṛayena ar Probhu Isor do nonḍege onko talare apnarakʼ sonottetʼe sodorkeda.

Edom disạm talate calakʼ horre tạkijokʼ reakʼ

¹⁴ Tayomte Mose do Kades khon hoṛe kolketʼkote Edom disạmren raj ṭhene roṛgotʼkada, “Amren Israel boehako kanale, ale do mitʼṭecʼ katha lạiyamle meneda. Am do aleakʼ duk reakʼ katha dom baḍaegea.

^15-16 Aleren hapṛamko do Misor disạmteko senlena ar onḍe do ḍher bochor girobas akanle tahẽkana. Menkhan Misorren hoṛ do ale ar aleren hapṛamko cetanre bebạṛicʼko beoharetʼ tahẽkana ar onate ale do Probhu Isor ṭhenle rakʼkeda. Ar uni do aleakʼ rakʼe ańjomketʼtalete acʼren dutko kolkate Misor disạm khone oḍok ạguketʼlea. “Ar ńitokʼ ale do amakʼ rajosṭi reakʼ simạ ṭhen Kadesre menakʼlea.

¹⁷ Am do amakʼ disạm talate baṛe sen ocoaleme. Ale do amakʼ jãhãn phosol se darkha khet talate do bale calakʼa, se kuń reakʼ dakʼ hõ bale ńũiya. Ale do ḍahartegele parom calakʼa ar amakʼ rajosṭi ạurile taṛam parom hạbicʼ etom se końe secʼ hõ bale ạcurokʼa.”

¹⁸ Menkhan Edomren raj doe roṛ ruạṛkeda, “Baṅa, noa talate do bale parom calao ocoapea. Arpe parom calakʼ khan ale do lạṛhại lạgitʼle oḍok hijukʼa ar ape cetanre jhaple ema.”

¹⁹ Israelko do uniko roṛ ruạṛadea, “Ale do sodor ḍahartegele parom calakʼa. Ale ar aleren janwarko amakʼ disạm reakʼ dakʼle ńũ emanle khan enḍekhan ona reakʼ dam hõle em oṭokakʼa. Ale do ekenle parom calakʼa, ar jãhãnakʼ do baṅa.”

²⁰ Edomrenko do arhõko roṛgotʼkada, “Baṅa, nonkate do bale parom ocoapea.” Inạ tayom Edomrenko do lạṛhại phạdante akoakʼ daṛe udug lạgitʼ Israel hoponko upạrteko oḍok hecʼena.

²¹ Ar Edomrenko akoakʼ disạm talate parom ocoako bako rebenlente Israelko do onko ṭhen khonko ruạṛ calaoena.

Aronakʼ gujukʼ

²² Inạ tayom Israelko do Kades khonko uṭhạuente Hor buruko seṭerena.

²³ Onḍe Edom reakʼ simạna ṭhen Probhu Isor do Mose ar Arone galmaraoatʼkinạ,

²⁴ “Aron do acʼren hapṛamko ṭhen calakʼ hoyokʼtaea. Okaṭakʼ disạm Israel hoponkoń emako onḍe uni do bae bolo daṛeakʼa ente aben do Meribare dakʼ iạte ińakʼ hukum birudben kạmileda.

²⁵ Am do Aron ar uniren hopon Eleasar Hor burute rakapʼ ạgukinme.

²⁶ Ar onḍe Aronakʼ hoṛmo khon naeke kicricʼem bojtaea ar uniren hopon Eleasarem horokʼaea, ente Aron do acʼren hapṛamko ṭhene calakʼa; ar onḍegeye gujukʼa.”

²⁷ Mose do Probhu Isorakʼ hukum lekae kạmikeda. Onko do sanam Israelko samaṅre Hor buruteko rakapʼena.

²⁸ Ona tayom Mose do Aronakʼ hoṛmo khon naeke kicricʼe bocʼketʼte uniren hopon Eleasare horokʼadea. Ar Aron do ona buru muthniregeye gocʼena. Ona tayom Mose ar Eleaser do buru khonkin pheḍ hecʼena.

²⁹ Ar Israel hoponko do tinreko baḍaekeda, Aron doe gocʼena unre goṭa Israel jạtrenko pegel din hạbicʼ uni lạgitʼko homor halaṅkeda.