Numeri 2 - সান্তালী বাইবেল

Ḍerakʼ tạmbu bered reakʼ

¹ Inạ tayom Probhu Isor do Mose ar Arone galmaraoatʼkinạ,

² “Israel hoponko do ńapamokʼ tạmbu reakʼ beṛhaeteko ḍerakʼma. Ar apan ạpin nisạn ar gusṭi reakʼ cinhạ ṭhenko tahenma.

^3-4 “Jihudạ dol reakʼ nisạnren hoṛ do ńapamokʼ tạmbu reakʼ purub secʼreko ḍerakʼma. Jihudạ gusṭiren mukhiyạ doe hoyokʼkana: Aminadab hopon Nahason ar uniren hoṛ doko hoyokʼ kana eaegel pon hajar turuisae hoṛ.

^5-8 Jihudạ gusṭi reakʼ mitʼ aṛere do Isakar gusṭirenko ar eṭakʼ aṛere do Sebulon gusṭiren hoṛko ḍerakʼma. Isakar gusṭiren mukhiyạ do Juar hopon Nethanel ar uniren hoṛ doko hoyokʼ kana mõṛẽgel pon hajar ponsae. Sebulon gusṭiren mukhiyạ doe hoyokʼ kana Helonren hopon Eliab ar uniren hoṛ doko hoyokʼ kana mõṛẽgel eae hajar ponsae.

⁹ Jihudạ dol reakʼ nisạnren hoṛkoakʼ lekha do jotote mitʼ lakh irạlgel turui hajar ponsae. Noko do pạhilre mohnḍakʼ hoyokʼtakoa.

^10-11 “Ar dạkhin secʼ do Ruben dol reakʼ nisạnren hoṛko ḍerakʼa. Ruben gusṭiren mukhiyạ doe hoyokʼ kana Sedeurren hopon Elisur ar uniren hoṛ doko hoyokʼkana pongel turui hajar mõṛẽsae.

^12-15 Ruben gusṭirenko reakʼ mitʼ aṛere Simeon gusṭirenko ar eṭakʼ aṛere do Gad gusṭiren hoṛko ḍerakʼa. Simeon gusṭiren mukhiyạ doe hoyokʼ kana Surisadaeren hopon Selumiel ar uniren hoṛkoakʼ lekha do mõṛẽgel are hajar pesae. Gad gusṭiren mukhiyạ doe hoyokʼ kana Duel hopon Eliasaph ar uniren hoṛkoakʼ lekha do hoyokʼ kana pongel mõṛẽ hajar turuisae mõṛẽgel.

¹⁶ Ruben dol reakʼ nisạnren hoṛkoakʼ lekha do jotote mitʼ lakh mõṛẽgel mitʼ hajar ponsae mõṛẽgel. Noko do dosar dol lekate mohnḍakʼ hoyokʼtakoa.

¹⁷ “Ona tayom Liwi gusṭirenko do ńapamokʼ tạmbu uṭhạukateko mohnḍakʼa. Noko do joto dol reakʼ nisạnrenko talareko tahena. Onko do cetʼleka ḍerareko tahẽkan onkage uṭhạukʼ hoyokʼtakoa. Ar mimitʼko do akoakʼ dol reakʼ nisạn sãote tahen hoyokʼtakoa.

^18-19 “Pạchim secʼre do Ephrayem dol reakʼ nisạnren hoṛko ḍerakʼa. Ephrayem gusṭiren mukhiyạ doe hoyokʼkana Ahimudren hopon Elisama ar uniren hoṛkoakʼ lekha do pongel hajar mõṛẽsae.

^20-23 Ephrayem gusṭirenkoakʼ mitʼ aṛere do Manase gusṭirenko ar eṭakʼ aṛere do Benjạmin gusṭiren hoṛko ḍerakʼa. Manase gusṭiren mukhiyạ doe hoyokʼ kana Pedasur hopon Gamaliel ar uniren hoṛkoakʼ lekha do pegel bar hajar barsae. Benjạmin gusṭiren mukhiyạ doe hoyokʼ kana Gideonren hopon Abidan ar uniren hoṛkoakʼ lekha do pegel mõṛẽ hajar ponsae.

²⁴ Ephrayem dol reakʼ nisạnren hoṛkoakʼ lekha do jotote mitʼ lakh irạl hajar mitʼsae. Noko do tesar dol lekateko mohnḍakʼa.

^25-26 “Dan dol reakʼ nisạnren hoṛko do utạr secʼreko ḍerakʼa. Ar Dan gusṭiren mukhiyạ doe hoyokʼ kana Amisadaeren hopon Ahieser ar uniren hoṛkoakʼ lekha do turuigel bar hajar eae sae.

^27-30 Dan gusṭirenkoakʼ mitʼ aṛere do Aser gusṭiren ar eṭakʼ aṛere do Napthali gusṭiren hoṛko ḍerakʼa. Aser gusṭiren mukhiyạ doe hoyokʼ kana Okranren hopon Pagiyel ar uniren hoṛkoakʼ lekha do hoyokʼ kana pongel mitʼ hajar mõṛẽsae. Napthali gusṭiren mukhiyạ doe hoyokʼkana Enanren hopon Ahira ar uniren hoṛkoakʼ lekha do mõṛẽgel pe hajar ponsae.

³¹ Dan dol reakʼ nisạnren hoṛkoakʼ lekha do jotote mitʼ lakh mõṛẽgel eae hajar turuisae. Noko do joto khon tayomte apnarakʼ dol reakʼ nisạnren hoṛ sãoteko mohnḍakʼa.”

³² Noko joto do Israelkoakʼ bõs menteko lekha ocolena. Ar eṭakʼ eṭakʼ dol reakʼ nisạnren hoṛkoakʼ lekha do jotote turui lakh pe hajar mõṛẽsae mõṛẽgel tahẽkana.

³³ Probhu Isor do Mose okalekae hukumade tahẽkan onkage Israelkoakʼ lekha jokhecʼ Liwiko doko bad ocolena.

³⁴ Probhu Isorakʼ hukum lekage Israelko do jotowakʼko cekayetʼ tahẽkana. Ar uniyakʼ hukum lekage onko do apan ạpin dolreko ḍerakʼkan tahẽkana ar uniyakʼ hukum lekage apan ạpin gusṭi ar gharońj lekateko mohnḍakʼkan tahẽkana.