Numeri 18 - সান্তালী বাইবেল

Naeke ar Liwikoakʼ dạyik

¹ Probhu Isor do Arone galmaraoadeteye metadea, “Sonot tạmbu upạrte okako behokakʼ hoyokʼ ona reakʼ dạyi do am, amren hoponko ar amakʼ bõsren hoṛko cetanre paṛaokʼa. Ona chaḍa naeke kạmire oka behokakʼ hoyokʼ ona reakʼ dạyi hõ am ar amren hoponko gogokʼ hoyokʼtakoa.

² Amren hapṛamkoren khũṭko khon eṭakʼ sanam Liwikom ạgukoa, jemon onko do am sãote goha tạmbu samaṅre sapʼdapʼ kạmire am ar amren hoponko goṛo daṛeape.

³ Onko do am tabere tahẽkate goha tạmbu reakʼ sanamakʼko kạmiya, menkhan sonot tạmbu reakʼ jãhãn jinis ṭhen se pinḍ ṭhen do bako sen daṛeakʼa. Arko senlen khan onko jotogeko gujukʼa.

⁴ Onko do kạmireko goṛowama; ar ńapamokʼ tạmbu ńel jut reakʼ bhar, metakʼme tạmbu reakʼ sanam lekan kạmi reakʼ bhar do onko cetanre tahena. Menkhan Liwiko chaḍa ar okoehõ ape ṭhen do bako hecʼdaṛeakʼa.

⁵ Israelko cetanre ińakʼ edre jemon alo sodorokʼ ona lạgitʼ sonot tạmbu ar pinḍ ńel todarot reakʼ bhar do ape cetanrege tahena.

⁶ Dan lekate apeakʼ tire jimạwape lạgitʼ iń do Israelrenko mod khon Liwikogeń bachao akawana. Ar ńapamokʼ tạmbure kạmi lạgitʼ Probhu Isor ṭhen onkogeń samaṅ akatʼkoa.

⁷ Menkhan naeke lekate eken am ar amren hoponge pinḍ ar orwal bhitri reakʼ kạmipe kạmi daṛeakʼa. Naekeakʼ hudạ do dan lekateń emape kana. Liwiko chaḍa ar jãhãege ona ńapamokʼ tạmbu reakʼ ṭhạ̃iteye hijukʼ enḍekhan uni doe gocʼ ocokʼa.”

Naeke ar Liwikoakʼ bakhra

⁸ Inạ tayom Probhu Isor do Arone metadea, “Iń ṭhen okako jinis samaṅokʼ ona reakʼ sanamakʼ dạyik ar bhar do amgeń emakawatʼmea. Iń ńutumte Israelkoakʼ samaṅokʼakʼ sanamakʼ sonot jinis do am ar amren bõskoakʼ bakhra kangea.

⁹ Sonot utạrakʼ samaṅokʼakʼ lạgitʼ, metakʼme jomakʼ samaṅokʼakʼ, kại ńutumte samaṅokʼakʼ ar dos ńutumte samaṅokʼakʼ lạgitʼ Israelko jãhãnakʼge iń ṭhenko ạgui ar okaṭakʼ hạṭiń do pinḍ reakʼ seṅgelre baṅ jeredokʼ ona do apeakʼge hoyokʼa; ona do am ar amren bõskoakʼ kana.

¹⁰ Sonotakʼ jinis cetʼleka jojom hoyokʼ onkagepe joma. Ona do aperen sanam herel hoponko jom daṛeakʼa. Ona do sonotakʼ mente bujhạu hoyokʼtapea.

¹¹ Israelkoakʼ emakʼ dolao samaṅokʼakʼ jinis hõ amakʼge hoyokʼa. Ona do am ar amren bõskoakʼ bakhra lekateń emapekana. Amakʼ gharońjren okoe saphako tahen eken onkoge onako jom daṛeakʼa.

¹² “Israelko do akoakʼ pạhil rakapʼakʼ khon bhage utạrakʼ jạitun sunum, nãwã darkha rasa ar anaj oka do Probhu Isor ńutumteko em ona jotowakʼ do amiń ematʼmea.

¹³ Probhu Isor ṭhen ạguwakʼ onkoakʼ jumi reakʼ phosol hõ apeakʼ hoyokʼa. Ar apeakʼ gharońjren okoe saphako tahen eken onkoge onako jom daṛeakʼa.

¹⁴ Israelko talare sarapakʼko tabere lại sodorokʼ mitʼke mitʼ jinisko do amakʼge hoyokʼa.

¹⁵ Probhu Isor ṭhenko samaṅokʼ mimitʼ pạhil koṛa hoponko do amrenko hoyokʼa. Baṅ doe manwakan ar baṅ doe janwarkan. Manwaren pạhil koṛa hoponko do khạṭigem chaḍaokoa ar besapha janwarren pạhil ạnḍiạ hoponko hõm chaḍaokoa.

¹⁶ Mitʼ cando umerrenko hoylen tayom onkoakʼ chaḍaokʼ reakʼ dam lekate, metakʼme gel gram ojon reakʼ dhorom sekel reakʼ mõṛẽ sekel rupạte, manwaren pạhil hoponem chaḍaokoa.

¹⁷ Menkhan pạhile janam akan nonkan ạnḍiạ ḍaṅgra se bheḍa se merom boda hopon chaḍaoko do baṅ ganokʼa. Noko doko sonotgea. Am do pinḍ cetanre onkoakʼ mãyãmem irciya ar seṅgelre samaṅokʼakʼ lekate onkoakʼ itilem jereda. Noa reakʼ jut so Probhu Isor doe kusiyakʼa.

¹⁸ Dolao samaṅokʼakʼ reakʼ koṛam reakʼ jel ar jojomsa bulu reakʼ jel leka noako jel hõ amakʼge hoyokʼa.

¹⁹ Probhu Isor ńutumte Israelkoakʼ samaṅokʼakʼ sanam sonotakʼ jinis do am ar amren hoponkoakʼ jao okte reakʼ bakhra kana. Noa do Probhu Isorakʼ mẽtʼre am ar am bõsren sanamko lạgitʼ mitʼṭecʼ jaejug reakʼ bondobos kana.”

²⁰ Inạ tayom Probhu Isor do Arone metadea, “Israelkoakʼ disạmre am do okaṭakʼ sompotti hõ bam ạidạrijoṅa ar jumi reakʼ oka hạṭiń hõ bam ńama. Israelko talare iń kangeạń amren hạṭiń do, ar iń kangeạń amren sompotti do.

²¹ “Israelkoakʼ gel hạṭiń reakʼ mitʼ hạṭiń okaṭakʼ do ińko imạń onage iń do Liwikoń ematʼkoa. Ńapamokʼ tạmbure sapʼdapʼ kạmi bodolte onko do onako ńama.

²² Ńit khon eṭakʼ Israelko do ńapamokʼ tạmbu ṭhen bako sen daṛeakʼa. Arko senlen khan akoakʼ kại reakʼ kuṛại iạteko gujukʼa.

²³ Liwikoge ńapamokʼ tạmbu reakʼ kạmiko kạmiya ar ona reakʼ behokakʼ lạgitʼ onkoge dạyiko tahena. Piṛhike piṛhi niạ niạmge tahena. Eṭakʼ Israelko talare Liwiko do sompotti reakʼ ạidạri bako ńama.

²⁴ Israelkoakʼ rojgarakʼ khon gel hạṭiń reakʼ mitʼ hạṭiń okaṭakʼ do Probhu ńutumteko ạgui onage onkoń ematʼkoa. Ar onatege iń Probhu Isor do onko reaṅ iń menakada, Liwiko do Israelko talare sompottiren ạidạri bako hoyokʼa.”

^25-26 Inạ tayom Probhu Isor do Mose Liwiko noa katha galmaraoakoe metadea, “Israelkoakʼ gel hạṭiń reakʼ mitʼ hạṭińpe ńam tayom ape hõ ona khon gel hạṭiń reakʼ mitʼ hạṭiń do Probhu Isor ńutumte samaṅ hoyokʼtapea.

²⁷ Noa samaṅokʼakʼge apeakʼ khạrại reakʼ phosol ar apeakʼ darkha lelen kunḍ reakʼ darkha rasa mente lekhakʼtapea.

²⁸ Ar eṭakʼ Israelko ṭhen khon onkoakʼ gel hạṭiń reakʼ mitʼ hạṭiń okape ńam ona khon ape hõ Probhu Isor ńutumte nonkage samaṅ hoyokʼtapea. Niạ gel hạṭiń reakʼ mitʼ hạṭiń khon Probhu Isorakʼ hĩs lekate naeke Aronpe emaea.

²⁹ Jãhãnakʼgepe emocokʼ ona khon bhage utạrakʼ hĩs, okaṭakʼ do Probhu Isor ńutumte begar dohoakan, ona reakʼ jotowakʼge Probhu Isor ńutumtepe ema.

³⁰ “Bhage utạrakʼ hạṭińko Probhu Isorpe emae tayom okaṭakʼ sarecʼ tahen ona do apeakʼ oṛakʼ reakʼ phosol ar apeakʼ lelen kunḍ reakʼ darkha rasa lekate lekhakʼtapea.

³¹ Ar apeakʼ gharońj reakʼ jãhã ṭhạ̃irege onape jom daṛeakʼa ente ona do ńapamokʼ tạmbure apeakʼ kạmi reakʼ kuṛại kana.

³² Onate apeakʼ jãhãn dosge baṅ hoyokʼtapea, ente bhage utạrakʼ hĩsge Probhu Isorpe emakawadea. Enḍekhan Israelko emakʼ sonotakʼ jinisko besonot reakʼ dusite bape dusi ocokʼa ar bape gujukʼa.”