Numeri 17 - সান্তালী বাইবেল

Aronakʼ ṭheṅgare baha

¹ Inạ tayom Probhu Isor do Moseye galmaraoadea,

² “Israelko ṭhen senkate onkom metakoa onkoren hapṛamkoakʼ khũṭko leka mimitʼ khũṭren mukhiyạ ṭhen khon mitʼṭecʼkate jotote gelbar goṭecʼ ṭheṅga jemon amko emam. Ar am do onako ṭheṅgare onko mimitʼkoakʼ ńutumem ola.

³ Liwi khũṭ reakʼ ṭheṅgare do Aronakʼ ńutumem ola, ente hapṛamkoakʼ khũṭ lekate mimitʼ khũṭren mukhiyạko lạgitʼ mitʼṭecʼkate ṭheṅga tahena.

⁴ Ar ńapamokʼ tạmbu reakʼ goha sinduk samaṅre okare ape sãoteń ńapamokʼ onḍe ona ṭheṅgakom dohoya.

⁵ Ar ińiń bachao akatʼ hoṛkoakʼ ṭheṅgare do bhoṭokʼ sagenokʼa. Ar nonkate aben upạrte Israel hoponkoakʼ karacʼ kurujokʼ do iń samaṅ khoniń thir ocoya.”

⁶ Mose do sanam kathako Israelkoe baḍae ocoketʼkoa, ar hapṛamkoakʼ khũṭ lekate onkoren mimitʼ khũṭren mukhiyạko do mitʼṭecʼkate gelbar goṭecʼ ṭheṅgako emadea. Ona ṭheṅgako modre Aronakʼ ṭheṅga hõ tahẽkana.

⁷ Mose do onako ṭheṅga hataokate goha tạmbure Probhu Isor samaṅreye dohokeda.

⁸ Ar dosar hilokʼ Mose do goha tạmbuteye boloyen khan Liwi khũṭrenko dohoakatʼ ṭheṅgako modre eken Aronakʼ ṭheṅgare bhoṭokʼ sagen akan, baha akan ar badam jo hõ bele akane ńelkeda.

⁹ Unre Mose do Probhu Isor samaṅ khon joto ṭheṅgakoe oḍok ạgukeda ar Israelko samaṅreye dohokeda. Ar onko mukhiyạ do ona ṭheṅgako ńelkeda, ar apan ạpinakʼ ṭheṅgako halaṅkeda.

¹⁰ Inạ tayom Probhu do Moseye metadea, “Ṭhoṭhok hoṛko lạgitʼ mitʼṭecʼ cinhạ ńutumte Aronakʼ ṭheṅga do arhõ goha sinduk samaṅre dohokakʼme. Onate am do iń upạrte onkoakʼ karacʼ kurujokʼakʼem thir ocoytakoa, onate onko do ar bako gujukʼa.”

¹¹ Probhu Isor do Mose oka lekae hukumade tahẽkan onkageye kạmikeda.

¹² Noako ńelte Israelko do Moseko metadea, “Hae, ale dole gocʼena, arle maraoena, ar jotogele marao cabayena!

¹³ Jãhãege Probhu Isorakʼ sekʼwa tạmbu ṭhene sorokʼ uni doe gujukʼa; enḍekhan ale do cetʼ sanamkogele gujukʼa?”