Numeri 16 - সান্তালী বাইবেল

Korah, Dathan ar Abiram

^1-2 Liwi gusṭiren Jisharen hopon Korah ar Ruben gusṭiren Eliabren hopon Dathan ar Abiram ar Peletren hopon On do Mose upạrteko teṅgoyena. Korah do Liwiren hopon Kohatren goṛomtetʼ koṛae tahẽkana. Noko sãote barsae mõṛẽgel Israelko okoe do somajre manotan hoṛko tahẽkan onko hõko tahẽkana.

³ Onko do Mose ar Aron upạrte dol pakaokate hecʼenteko menkeda, “Aben do ạḍi ben taṛam lahayeda. Goṭa Israel somajren mitʼke mitʼ hoṛ do Probhu Isor ńutumteko begar ocoakana ar Probhu Isor hõ onko sãote menaea. Menkhan Probhu Isorren hoṛko cetanre cedakʼ apnarteben usulokʼ kana?”

⁴ Niạ katha ańjomkate Mose do otreye taberena.

⁵ Uni do Korah ar uni dolren hoṛkoe metatʼkoa, “Gapage Probhu Isor doe udukʼ abona okoe do uniren kanako ar okoe do uni ńutumteko begar ocoakana. Unige acʼren hoṛko acʼ samaṅreye sen ocoakoa. Ar okoeye bachao akawan unige acʼ samaṅreye sor ocoaea.

^6-7 E Korah, am ar amakʼ dolren hoṛ do mitʼṭecʼ kạmipe. Ape do gapage Probhu Isor samaṅre dhup dạnire seṅgel ar dhuppe jereda. Ar Probhu Isor okoeye bachaoe unige acʼ ńutumte begar dohoakade hoṛe hoyokʼa. E Liwi hoponko apege ḍherpe taṛam lahayeda.”

⁸ Mose do Korah arhõe metadea, “E Liwi hoponko ńitokʼ do ińakʼ katha ańjompe.

⁹ Ape lạgitʼ do cetʼ onage baṅ ḍhera je, Israelkoren Isor do somajren eṭakʼ hoṛko khon acʼ ṭhene begar ạguakatʼpea jemon Probhu Isorakʼ sekʼwa tạmburepe kạmi ar somajren hoṛko sapʼsorako lạgitʼ onko samaṅrepe teṅgo daṛeakʼ?

¹⁰ Uni do sanam Liwiko acʼ ṭhene ạguakatʼpea, menkhan ape do ńitokʼ naeke hudạ hõ hatjoṅpe meneda.

¹¹ Am ar amren hoṛkoge Probhu Isor upạrte dolpe pakaoeda. Ar Aron doe celekante, uni upạrtepe karacʼ kurujokʼkana?”

¹² Inạ tayom Mose do Eliabren hopon Dathan ar Abirame hohoatʼkinạ menkhan unkin dokin roṛgotʼkada, “Ạliń do bạliń calakʼa.

¹³ Niạ hahaṅkarre gocʼ ocole lạgitʼge nonkan disạm khonem oḍok ạguakatʼlea onḍe do toa ar dumur rasa reakʼ jãhãn okulạnge baṅ tahẽkana. Ar niạge cetʼ baṅ ḍhera? Arhõ aleren mạlik hoyokʼem monejoṅkana.

¹⁴ Ona chaḍa toa ar dumur rasa ạtukʼkan disạmte hõ bam ạgu akatʼlea jaega-jumi ar darkha khethõ bam ạidạri ocoakatʼlea. Noko hoṛ do cetʼ kãṛãge dohokom khojkana? Baṅ, ạliń do bạliń calakʼa.”

¹⁵ Niạ katha ańjomkate Mose do ạḍiye edreyena ar Probhu Isore metadea, “Onkoakʼ samaṅokʼakʼ do alom ataṅtakoa. Onko ṭhen khon iń do mitʼṭen gadha hõ bạń hatao akadea ar onkoakʼ cetʼ hõ bạń loksan akatʼtakoa.”

¹⁶ Ona tayom Mose do Korahe metadea, “Gapa amakʼ dolren sanamko Probhu Isor samaṅrem hạjirkoa. Ona sãote am ar amakʼ dolrenko ar Aron hõm hạjir ocoya.

¹⁷ Mitʼke mitʼ hoṛ do acʼakʼ dhup dạnire dhupe jereda; ar jotote barsae mõṛẽgel dhup dạnire dhup jeretʼkate Probhu Isor samaṅre samaṅ hoyokʼa. Am ar Aron hõ dhup dạnire dhup jeretʼkate samaṅ hoyokʼtabena.”

¹⁸ Moseyakʼ katha leka mimitʼ hoṛ apan ạpin dhup dạnire seṅgel ar dhupante ńapamokʼ tạmbu reakʼ duạr samaṅre Mose ar Aron sãote senkateko teṅgoyena.

¹⁹ Korah do tinre Mose ar Aron upạrte somajren sanam hoṛko jarwakate ńapamokʼ tạmbu reakʼ duạr ṭhene teṅgoyena unre Probhu Isorakʼ ṭhonok do onko samaṅre sodorena.

²⁰ Probhu Isor do Mose ar Arone metatʼkinạ,

²¹ “Aben do eṭakʼ sanam hoṛko khon begarokʼ ben, jemon ńitge onkoń maraoko.”

²² Menkhan Mose ar Aron do otre ombakʼ hapeyentekin menkeda, “E Isor, am do sanam manwakoren babańcaoicʼ kanam. Eken mitʼ hoṛe kại akatʼte cetʼ goṭa Israel somaj cetanre amakʼ edrem sodortama?”

²³ Unre Probhu Isor do Moseye metadea,

²⁴ “Israelkom metakoa jemon onko do Korah, Dathan ar Abiramakʼ tạmbu ṭhen khonko ocogokʼ.”

²⁵ Niạ katha ańjomkate Mose do beretʼente Dathan ar Abiram ṭhene senena ar Israelren murubbiko hõ uniko pańjakedea.

²⁶ Mose do Israelkoe metatʼkoa, “Noko bạṛicʼ ar ṭhok hoṛkoakʼ tạmbu ṭhen khon ocogokʼpe. Onkoakʼ jãhãnakʼ jinisge alope joṭeda; arpe onkae khan onkoakʼ kại iạte ape hõpe marao ocokʼa.”

²⁷ Niạ katha ańjomkate hoṛko do Korah, Dathan ar Abiramakʼ tạmbu ṭhen khonko ocokʼena. Unre Dathan ar Abiram do ạkinren bạhu ar gidrạkowante tạmbu reakʼ duạr ṭhen oḍok hecʼentekin teṅgo akan tahẽkana.

²⁸ Mose do unre Israelkoe metatʼkoa, “Niạtepe bujhạu daṛeakʼa, iń okań cekayetʼ ona lạgitʼge Probhu Isor do nonḍeye kol akadińạ; noa do ińakʼ cetʼge baṅkana.

²⁹ Manwakoakʼ gujukʼ leka nokoakʼ gujukʼ hoylen khan manwako paṛaoako leka noko hõ paṛaoako khan enḍekhan bujhạu hoyokʼa Probhu Isor do bae kol akadińạ.

³⁰ Menkhan Probhu Isor do jãhãnakʼe cekae ar ot do mocae cahabte onko sanamkoe utʼgotʼkako ar jiwetʼtege patalpuriteko calakʼ enḍekhanpe bujhạu daṛeakʼa, noko hoṛko do Probhu Isorko nihạ̃t akadea.”

³¹ Moseyakʼ noa katha ạuri mucạdokʼrege onko hoṛkoakʼ jaṅga latar reakʼ ot do bar hạṭińena,

³² ar ot reakʼ moca do cahapʼente Korah gharońjren sanam hoṛe utʼgotʼkatʼkoa.

³³ Onkoakʼ oka tahẽkan onako sudhạ onko do jiwetʼtege patalpuriteko ńurena. Ar ona tayom paṛakʼ do bondena. Ar Israelko tala khonko marao utạrena.

³⁴ Onkoakʼ rakʼ ańjomte beṛhaeten Israelko do ãṭ aṛaṅte noa katha roroṛ tulucʼko dạṛkeda, “Ot do ape hõe utʼpea.”

³⁵ Ar barsae mõṛẽgel hoṛ okoe do dhupko samaṅetʼ tahẽkan onko do Probhu ṭhen khon seṅgel oḍokente sanamkoe atar cabaketʼkoa.

³⁶ Probhu Isor do Moseye galmaraoadea,

³⁷ “Naeke Aronren hopon Eliasar metaeme jemon uni ona atar akan ṭhạ̃i khon dhup dạniko oḍok ạgukate torocʼko thoṛa sạṅgińreye uḍiạugotʼkakʼ, ente dhup dạniko do iń ńutumte begar dohoakana.

³⁸ Kại gunạkʼte tinạkʼ hoṛko gocʼen dhup dạniko do onko hoṛkoakʼ kangea. Menkhan Probhu Isor samaṅre hạjirletʼ iạte onako do uni ńutumte begar dohoakana. Onate am do onakom kuṭạm capṛa ocoya ar pinḍrem bạisạukakʼa. Jemon Israelko ṭhen mitʼṭecʼ cinhạ leka tahen.”

³⁹ Ar naeke Eliasar do onkoko atar gocʼ ocoyen hoṛkoko ạguletʼakʼ pitạl reakʼ dhup dạnikoe jarwakeda. Ar ona tayom doe kuṭạm capṛa ocoketʼte pinḍreye bạisạukada.

⁴⁰ Mose hotete Probhu Isor oka lekae hukumletʼ onkage uni do sanamakʼe kạmikeda. Noa do Israel hoponko ṭhen mitʼṭecʼ dikʼsạwakʼ leka hoyena, Aron bõsrenko chaḍa ar okoehõ dhup jered lạgitʼ Probhu Isor samaṅre bako sen daṛeakʼa; ar jãhãegeye calakʼ enḍekhan uni hõ Korah ar uniyakʼ dolrenko leka hoyokʼtaea.

⁴¹ Inạ dosar hilokʼ Israel somajren sanamkoge Mose ar Aron upạrte karacʼ kurujokʼko ehopʼena arko menkeda, “Probhu Isorren hoṛ do abenge ben gocʼketʼkoa.”

⁴² Menkhan somajren sanam hoṛko tinre Mose ar Aron upạrte jarwakate ńapamokʼ tạmbu secʼko samaṅkeda unre ackage ńapamokʼ tạmbu do ona rimilte danaṅena ar Probhu Isorakʼ ṭhonok sodorena.

⁴³ Unre Mose ar Aron do ńapamokʼ tạmbu samaṅrekin hecʼena,

⁴⁴ ar Probhu Isor do Moseye galmaraoadea,

⁴⁵ “Aben do noko hoṛko khon pharakokʼ ben; ńitge onko doń marao cabakoa.” Noa katha ańjomkate unkin do otre kin ombakʼena.

⁴⁶ Ona tayom Mose do Arone metadea, “Amakʼ dhup dạni hataome ar pinḍ reakʼ seṅgel ecʼkate onare dhup emakʼme ar usạra onko hoṛko ṭhen senkate kại ńutumte puruchunme. Probhu Isorakʼ edre do sodor akana, mahamạri ehopʼakana.”

⁴⁷ Unre Aron do Moseyakʼ katha leka dhup dạnire seṅgel ar dhup hataokate onko hoṛko ṭhene ńir calaoena. Menkhan hoṛkore mahamạri do ehopʼakan tahẽkana, ar Aron do dhupe samaṅketʼte onkoakʼ kại ńutumteye puruchunkeda.

⁴⁸ Uni do jiwetʼko ar gocʼko talare senkateye teṅgoyena ar mahamạri do thirena.

⁴⁹ Korah iạte okoeko gocʼen onko chaḍa arhõ gelpon hajar eaesae hoṛ do mahamạriteko gocʼena.

⁵⁰ Mahamạri thiren khan Aron do ńapamokʼ tạmbu reakʼ duạrre Mose ṭhene ruạṛ calaoena.