Numeri 13 - সান্তালী বাইবেল

Cikʼyạ hoṛ kolko reaṅ

¹ Inạ tayom Probhu Isor do Moseye galmaraoadea,

² “Israelko okaṭakʼ disạm emakoń menetʼkan ona Kanan disạm cikʼyạ ạgui lạgitʼ am do gelbar gusṭirenko khon mitʼ hoṛkate mukhiyạko kolkom.”

³ Probhu Isorakʼ hukum ńamkate Mose do onkageye kạmikeda. Uni do Paran hahaṅkar ṭoṭha khon okoekoe kolketʼko onko sanamkoge Israelkoren mukhiyạko tahẽkana.

⁴ Onko doko hoyokʼ kana, Ruben gusṭiren Sukur hopon Samua;

⁵ Simeon gusṭiren Hori hopon Saphot;

⁶ Jihudạ gusṭiren Jephun hopon Kaleb;

⁷ Isakar gusṭiren Joseph hopon Jigal;

⁸ Ephrayim gusṭiren Nun hopon Hosea;

⁹ Benjamin gusṭiren Raphu hopon Palṭi;

¹⁰ Sebulon gusṭiren Sodi hopon Gadiel;

¹¹ Joseph gusṭiren, metakʼme Manase gusṭiren Susi hopon Gadi;

¹² Dan gusṭiren Gemal hopon Amiel;

^13-15 Aser gusṭiren Mikayel hopon Sethur; Napthali gusṭiren Bopsi hopon Nabhi ar Gad gusṭiren Maki hopon Geuel.

¹⁶ Mose do noko hoṛko Kanan disạm cikʼyạ ạgui lạgitʼe kolletʼkoa. Ar Nunren hopon Hosea do Josuại ńutumkedea.

¹⁷ Mose do Kanan disạmte kolko jokhecʼ onkoe metatʼkoa, “Dạkhin nakha secʼte senkate buru ṭoṭhatepe rakapʼ calakʼa.

¹⁸ Ar cetʼlekan disạm kana onape ńela. Arpe ńela, onḍe okoeko girobasokʼ kan onko doko nijorgea seko daṛeangea ar lekhareko komgea seko ḍhergea,

¹⁹ ar oka disạmreko girobasokʼ kan ona do bhagegea se baṅa. Okako nagrahareko tahenkan onako do pạcri esetʼgea se baṅa?

²⁰ Onḍenakʼ otre bhage phosol omon akana se baṅa? Ar dare nạ̃ṛĩko menakʼa se baṅa? Ape do onḍenakʼ joko ạgui reakʼpe kurumuṭuya.” Onako din do darkha jo belekʼ reakʼ okte tahẽkana.

²¹ Unre onko do senkate Sin hahaṅkar khon ehopʼkate Hamat secʼ Rehob hạbicʼ disạmko ńelkeda.

²² Onko do dạkhin nakha secʼte senkate Hebron nagrahateko seṭerena. Hebron nagraha do Misor reakʼ Soan nagraha khon eae bochor laha reakʼ tahẽkana. Onḍe do Ahiman, Sesae ar Thalmae ńutuman Anak bõsren pe hoṛko tahẽkana.

²³ Ar mukhiyạko do Eskol buru lodamkote senkate darkha jo reakʼ thokako getʼkeda. Onko modren bar hoṛ do ḍaṅre gutukate onakin gokʼ ạgukeda. Ona chaḍa thoṛa dạlim ar loa jo hõko ạgu torakeda.

²⁴ Israelko do thoka sudhạ darkha joko getʼletʼte ona jaega reakʼ ńutum do Eskol lodamko ńutumkeda.

²⁵ Ar pon gel din cikʼyạ tayom onko do onḍe khonko ruạṛ hecʼena.

Kanan disạm

²⁶ Onko mukhiyạ do Paran hahaṅkar reakʼ Kadeste Mose, Aron ar sanam Israel ṭhenko ruạṛ hecʼena. Ar ona disạm reakʼ jotowakʼko lạiyatʼkoa ar jo hõko udukʼatʼkoa.

²⁷ Onko do Moseko metadea, “Okaṭakʼ disạmtem kolletʼle ale do onḍele senlena. Ona disạm do sạrige toa, dumur rasa ạtukʼ disạm kana ar eṭakʼ cetʼ jãhãn reakʼ okulạnge bạnukʼa. Noako do onḍenakʼ jo kangea.

²⁸ Menkhan onḍe okoeko girobasokʼkan onko do daṛe hoṛ kanako ar onkoakʼ nagrahako do usul pạcrikote esetʼgea. Ar onḍe do Anak bõsren hoṛ hõle ńel akatʼkoa.

²⁹ Ar Amalekiko do disạm reakʼ dạkhin nakhareko tahenkana; Hittirenko, Jebusirenko ar Amorirenko do buru ṭoṭhakore ar Kananrenko do jalapuri aṛe ar Jordan gaḍa aṛeteko girobasokʼ kana.”

³⁰ Unre Mose samaṅre okoeko hoṛ onḍeko tahẽkan Kaleb do onko hape ocoketʼkoteye metatʼkoa, “Onḍe senkate disạm bon dokholgea. Ona do khạṭige bon daṛeakʼa.”

³¹ Menkhan uni sãote okoeko senlen onko doko menkeda, “Onko sãote lạṛhại do ohoge bon daṛelena; onko do abo khonko daṛegea.”

³² Oka disạmko ńel ạguketʼ onko do Israelko ṭhen ona disạm reakʼ nindạu kathako roṛkeda, “Okaṭakʼ disạmle ciyạ ạguketʼ ona disạm do hoṛ jojom mitʼṭecʼ disạm kana. Okoe hoṛko onḍele ńel akatʼko onko do darmoṭ darmoṭ hoṛ kanako.

³³ Onḍe do Nephilimkoren bõsko hõle ńel akatʼkoa. Anak bõsren hoṛ do Nephilim jạtren kanako. Ona ńelte ale do sosrocʼ lekale bujhạuena ar onko hõ onkageko hudisketʼlea.”