Numeri 10 - সান্তালী বাইবেল

Rupạ reakʼ Pepṛẽtʼ

¹ Probhu Isor do Mose galmaraoadeteye metadea,

² “Rupạ reakʼ barea pepṛẽtʼ benao ocoyme. Israelko hoho jarwako lạgitʼ ar eṭakʼ eṭakʼ dolko uṭhạu ocoko lạgitʼ am do noam oroṅa.

³ Tinre banar pepṛẽtʼ oroṅokʼa unre Israelko do jotoge ńapamokʼ tạmbu reakʼ duạr ṭhen am samaṅreko jarwakʼa.

⁴ Ar mitʼṭecʼ oroṅokʼre Israelkoren eṭakʼ eṭakʼ bõsren mukhiyạko do am samaṅreko jarwakʼa.

⁵ Pạhil dhao tinre pepṛẽtʼ oroṅokʼa unre okoe do purub secʼreko ḍera akan onkoko uṭhạukʼa.

⁶ Dosar dhao oroṅlen khan dạkhin secʼren dolko uṭhạukʼa. Noa do hoyokʼa mohnḍakʼ reakʼ saḍege.

⁷ Ar mitʼ domte hoṛkom jarwako khan banar pepṛẽtʼgem oroṅa menkhan onakin reakʼ saḍe do begar begarge tahena.

⁸ “Noa pepṛẽtʼ do Aronren hoponko, metakʼme naekekoko oroṅa. Noa do amren ar am bõsrenko lạgitʼ jaejug hạbicʼ mitʼṭecʼ niạmge hoyokʼa.

⁹ Apnarakʼ disạmre tahen jokhecʼ aperen bạiriko sãotepe lạṛhạire banar pepṛẽtʼ mitʼ dhaotepe oroṅa. Unre aperen Probhu Isor do ape lạgitʼe dạndikʼte bạirikoakʼ ti khone rukhiyạpea.

¹⁰ Apeakʼ rạskạ ar porob oktere, ape lạgitʼ niṭ akan eṭakʼ eṭakʼ porobkore ar cando reakʼ jeredokʼ samaṅokʼakʼ ar sulukren samaṅokʼakʼpe samaṅre pepṛẽtʼpe oroṅa. Onate ape do Isor samaṅrepe hạjir ocokʼa. Ar iń kangeạń aperen Probhu Isor do.”

Israel hoponko mohnḍakʼkan

¹¹ Dosar bochor reakʼ dosar cando reakʼ bargelakʼ dinre goha tạmbu cetan khon rimil do ocokʼena.

¹² Ar Israel hoponko unre sinại hahaṅkarko bạgiyatʼte onḍe khonko mohnḍayena. Ar Paran hahaṅkarre ona rimil ạuri teṅgokʼ hạbicʼ onko do calakʼtegeko tahẽyena.

¹³ Mose hotete Probhu Isor emakʼ hukum lekate onko do pạhil dhaoko mohnḍayena.

¹⁴ Pạhilre do Jihudạ nisạnren eṭakʼ eṭakʼ dolko mohnḍayena. Onkoren mukhiyạ do Aminadabren hopon Nahasone tahẽkana.

¹⁵ Isakar gusṭiren hoṛkoakʼ bhar do Juarren hopon Nethanel cetanre tahẽkana,

¹⁶ ar Sebulon gusṭiren hoṛkoakʼ bhar do Helonren hopon Eliab cetanre tahẽkana.

¹⁷ Inạ tayom do sekʼwa tạmbuko raṛa pheḍkeda ar Gersonren ar Merarirenko onako gokʼ idikeda.

¹⁸ Ona tayom do Rubenakʼ nisạnren eṭakʼ eṭakʼ dolrenko mohnḍayena. Ruben gusṭiren mukhiyạ do Sedeurren hopon Elisure tahẽkana.

¹⁹ Simeon gusṭiren hoṛkoakʼ bhar do Surisadaeren hopon Selumiel cetanre tahẽkana.

²⁰ Ar Gad gusṭiren hoṛkoakʼ bhar do tahẽkana Duel hopon Eliasaph cetanre.

²¹ Noko tayom Kohatkoren do sekʼwa tạmbu reakʼ sonot jiniskoanteko mohnḍayena. Onko seṭerokʼ laharege sekʼwa tạmbu do umul reakʼ katha tahẽkana.

²² Noko tayom do Ephrayim nisạnren eṭakʼ eṭakʼ dolko mohnḍayena. Ephrayim gusṭiren mukhiyạ do Amihudren hopon Elisamae tahẽkana.

²³ Manase gusṭiren hoṛkoakʼ bhar do Pedasur hopon Gamaliel cetanre tahẽkana,

²⁴ ar Benjạmin gusṭiren hoṛkoakʼ bhar do Gideon hopon Abidan cetanre tahẽkana.

²⁵ Jotoko khon tayom do Dan nisạnren eṭakʼ eṭakʼ dolren hoṛko mohnḍayena. Noko do rurukhiyạ dol lekate sanam dolko khon tayomteko mohnḍayena. Dan gusṭiren mukhiyạ do Amisadae hopon Ahiesere tahẽkana.

²⁶ Aser gusṭiren hoṛkoakʼ bhar do Okran hopon Pagiel cetanre tahẽkana,

²⁷ ar Napthali gusṭiren hoṛkoakʼ bhar do Enan hopon Ahira cetanre tahẽkana.

²⁸ Israelren eṭakʼ eṭakʼ dolko do nonkageko mohnḍalena.

²⁹ Inạ tayom Mose do acʼren hońhartetʼ Reuelren hopon Hobabe metadea, “Probhu Isor okaṭakʼ disạm emale lạgitʼe gokʼ akawatʼle ale do ona disạm secʼle mohnḍakʼkana. Onate abenhõ ale sãote dela hijukʼ ben. Ale do abenle bhạlại bena, ente Probhu Isor do Israelrenkoe bhạlạikoa menteye gokʼakada.”

³⁰ Hobabe roṛ ruạṛkeda, “Ạliń do bạliń calakʼa. Ạliń do aleakʼ disạm ar ạlińren hoṛko ṭhengeliń ruạṛ calakʼa.”

³¹ Menkhan Moseye menkeda, “Baṅ, baṅ, alo ben bạgiyalea. Aben doben baḍaea hahaṅkarre okare ḍerakʼ hoyokʼtalea mente, ar abenge aleren mẽtʼ lutur ben hoyokʼtalea.

³² Ale sãote ben hijukʼ khan enḍekhan Probhu Isor do ale oka bhạlại lạgitʼe gokʼ akawatʼle ona reaṅ bhag hõle emabena.”

³³ Nonkate Israelko do Probhu Isorakʼ buru khonko mohnḍayente pe din reakʼ horko sen idiyena. Ar jirạukʼ lạgitʼ mitʼṭecʼ jaega sendra ńam lạgitʼ Probhu Isorakʼ bondobos sinduk do pe din hạbicʼ onko laha lahate sen idiyena.

³⁴ Ḍera khonko uṭhạukʼre Probhu Isorakʼ rimil do siń bhor Israelko cetanre tahenkan tahẽkana.

³⁵ Goha sinduk tinre mohnḍakʼkan tahẽkana unre Moseye menetʼ tahẽkana, “E Probhu Isor de beretʼme. Amren bạiri doko chirchạtur cabakʼma ar okoe amko kurudamkan onko do am samaṅ khonko ńir pharakokʼ ma.”

³⁶ Ar ona rimil tinre teṅgo thirokʼkan tahẽkana unre Moseye menetʼ tahẽkana, “E Probhu Isor, ojut ojut Israelko ṭhen hecʼ ruạṛokʼme baṛe.”