Nehemiạ 9 - সান্তালী বাইবেল

Israelkoakʼ kại aṅgoc

¹ Inạ cando reakʼ bargel ponakʼ dinre Israelko do mitʼ ṭhenko jarwayena ar gõṛẽ kicricʼko horokʼketʼte, bohokʼre dhuṛiko ojokʼana arko upạskeda,

² Israel jạtren hoṛko do eṭakʼ sanam jạtrenko khon apnartetʼko begarena. Onko doko teṅgoyente akoakʼ kại ar akoren hapṛamkoakʼ bedhoromakʼko aṅgockeda.

³ Ona tayom teṅgokate adha bela onko do akoren Probhu Isor ńutumte ạn-ạri reakʼ puthi khon paṛhaokateko ańjomkeda ar adha bela do kạiko aṅgocketʼa ar akoren Probhu Isor sewawae tulucʼ dinko khemaokeda.

⁴ Jesua, Bani, Kadmiyel, sebania, Buni, Serebia, Bani ar Kenani ńutuman Liwiko do macanre teṅgokate ãṭ aṛaṅte Probhu Isorko hohoadea.

⁵ Tayomte Liwiko mod khon Jesua, Kadmiyel, Bani, Hasabneya, Serebia, Hodia, Sebania, ar Petahia tekoko menkeda, “Ape do teṅgokate aboren Probhu Isor sarhaoepe, okoe do jug khon jaejug hạbicʼ menae.” Ona tayom onko do niạ menkate koejoṅko ehopʼena, “E Probhu Isor, amakʼ ńutum do sarhao ar ṭhonokte perejokʼma; ale emakʼ sanamakʼ sarhao khon hõ am dom maraṅgea.

⁶ Eken amkangeam aleren Probhu Isor do. Amge serma, maraṅ serma ar onare menakʼ jotowakʼko, dhạrti ar ona cetanre menakʼ jotowakʼko, jalapuri ar onare menakʼ jotowakʼkom sirjạu akada. Amge sanamko jiwim emakawatʼkoa ar sermaren sanamkoge amko sewawam kana.

⁷ “Am kangeam Probhu Isor do. Abram do amgem bachaoledea ar Kạldikoakʼ disạm Tur khonem oḍok ạguledea ar amge uniyakʼ ńutum do Abrahamem doholetʼtaea.

⁸ Am do uniyakʼ pạtiạrtetʼem ńelketʼte Kananiko, Hittiko, Amoriko, Perisiko, Jebusiko ar Gergasikoakʼ disạm do uniren bõsko emako lạgitʼ mitʼṭecʼ bondobosem dohowada. Ar am dom dhoromgete amakʼ gokʼakʼem rukhiyạ dohoketʼtama.

⁹ “Misor disạmre amge aleren hapṛamkoakʼ dukem ńelletʼtakoa; ar arakʼ doreão aṛere onkoakʼ rakʼem ańjomletʼtakoa.

¹⁰ Amge Pharao ar uniren sanam kạmiyạko ar uniyakʼ disạmren sanam hoṛko ạḍi utạr cinhạ ar hahaṛa kạmikom udukʼatʼkoa, ente am dom baḍaekan tahẽkana aleren hapṛamko tulucʼ Misrikoakʼ beohar do bạḍạite perecʼ tahẽkana. Ar niạko kạmite am do amakʼ ńutumem rukhiyạleda, ona do teheń hạbicʼ hõ menakʼgea.

¹¹ Amge onko samaṅre jalapurim bar hạṭiń ocoleda, onate kuṭhạ̃ṛgeko paromlena; menkhan okoe onkoko khudạuletʼko onko do athantar dakʼre dhiri giḍikakʼ lekam khadlekatʼkoa.

¹² Siń do rimil reakʼ khunṭite ar ńindạ do seṅgel reakʼ khunṭitem ạyurletʼkoa.

¹³ “Am do Sinại buru cetanrem pheḍ hecʼlena ar serma khon onko sãote katham roṛleda. Ona jokhecʼ am do dhorom reakʼ hukum, ṭhikakʼ ạn-ạriko, bhage niạmko ar hukumkom ematʼko tahẽkana.

¹⁴ Amge amakʼ sonot jirạukʼ mãhã reaṅem baḍae ocoletʼkoa ar amren guti Mose hotete hukum ar ạn-ạrikom ematʼkoa.

¹⁵ Lacʼ bi ocoytako lạgitʼ amge serma khon jomakʼem ematʼko tahẽkana ar tetaṅ marao ocoytako lạgitʼ do dhiri khon dakʼem oḍok ocoleda. Ar okaṭakʼ disạm emako reakʼem gokʼletʼ tahẽkan onḍe senkate am do ona ạidạri lạgitʼem hukumatʼko tahẽkana.

¹⁶ “Enhõ aleren hapṛamko do bạḍạiteko perecʼlena; onko do hoṭokʼko keṭecʼletʼ takoa ar amakʼ hukumko bebataoleda.

¹⁷ Onko do am tabere tahen do bako aṅgocleda, ar okako hahaṛa kạmi onko talarem kạmiletʼ ona hõ bako disạ doholeda. Onko do hoṭokʼko keṭecʼketʼtakoa ar golam leka Misorte arhõ ruạṛ calakʼ lạgitʼ mitʼṭen mukhiyạko bahalkedea. Menkhan am do ikạyicʼ Isor kanam, am do daya ar mãyãtem perecʼgea; am do thoṛategem tirpitokʼ kana ar amakʼ dulạṛ do asambheṛgea. Onate onko do bam bạgi giḍiakatʼkoa.

^18-19 Onko do ako lạgitʼ chãchre dul benao akade mitʼṭen mĩhũ reakʼ muṭhạn benaokateko menkeda, ‘nuige aperen Isor do; Misor disạm khon unigeye oḍok ạgu akatʼpea.’ Nonkate onko do amko bemanotketʼmea menkhan amakʼ asambheṛ daya iạte hahaṅkarre bam bạgi giḍiletʼkoa. Sińre ạyurko lạgitʼ do rimil khunṭi ar ńindạ lạgitʼ do seṅgel khunṭitem ạyurletʼkoa.

²⁰ Ar onko cetʼako lạgitʼ do amren bhạlạiyicʼ atmam danatʼko tahẽkana. Am do onko jom ocoko lạgitʼ serma khon Mannam emalena ar ona do bam bondleda; ar onkoakʼ tetaṅ maraotako lạgitʼ do dakʼem ematʼkoa.

²¹ Hahaṅkarre pongel bochor hạbicʼem ạsul jotonketʼkoa. Onko do jãhãn okulạnge baṅ hoylentakoa; onkoakʼ kicricʼ khạnḍwạkʼ hõ baṅ marelena ar onkoakʼ jaṅga hõ baṅ bharaolentakoa.

²² “Tayomte ḍher rajosṭi ar jạtrenko do onkoakʼ tirem jimạketʼkoa, onkoakʼ sanam jaega jumiko Israel jạtrenkom hạṭińatʼkoa. Onko do Hesbonren raj Sihonakʼ disạm ar Basonren raj Ogakʼ disạmem ạidạriatʼkoa.

²³ Sermaren ipilko leka onko do alekha hoponkom ematʼkoa ar okaṭakʼ disạmte bolokate ona ạidạri reakʼ katha onkoren hapṛamkom metatʼko tahẽkan ona disạmtem aderketʼkoa.

²⁴ Onkoren hoponko do ona disạmte senkate onako dokholana. Ar ona disạmren Kananikoko kobojketʼkoa. Am do Kananiko, onkoren rapajko ar disạmren judạ judạ jạtrenko do onkoakʼ tirem jimạketʼkoa jemon onko cetanre akoakʼ kusi lekako ceka daṛeakʼ.

²⁵ Onko do pạcrite esetʼ ḍher nagraha ar bhage jumikoko dokholana; ar bhage bhage jiniste perecʼ oṛakʼ-duạr ar benao ṭhikakʼ kuńko, darkha bagwanko, jạitun bagwanko ar ạḍi utạr jo teakʼ dareko ạidạriana. Onko do jomkateko tirpitena arko moṭayena ar amakʼ maraṅ bhạlạiteko hesecʼ sekrecʼlena.

²⁶ “Menkhan enhõ onko do bebatao iạte am upạrteko hulkeda; ar amakʼ ạn-ạriko bạgiyada. Amren okoeko nạbi do am secʼ ruạṛ lạgitʼko sontoretʼko tahẽkan onko nạbi doko gocʼketʼkoa; ar am do ạḍi bạṛicʼko opomanketʼmea.

²⁷ Onatege am do bạirikoakʼ tirem jimạletʼkoa ar bạiriko do onkoko santaoetʼko tahẽkana. Onkoakʼ kosṭo oktere onko do am ṭhenko rakʼ homoretʼ tahẽkana ar am do serma khonem ańjomletʼtakoa. Amakʼ maraṅ daya iạte onko bańcaoko lạgitʼ hoṛkom kolletʼkoa. Ar bạirikoakʼ ti khon onkom bańcaoketʼkoa.

²⁸ “Menkhan tinre jirạuko ńametʼ tahẽkana unre onko do arhõ amakʼ mẽtʼre oka bạṛicʼakʼkan onageko kạmiyetʼ tahẽkana. Ar inạ tayom do bạirikoakʼ tirem jimạyetʼko tahẽkana jemon bạiriko do onkoren mạlikko hoyokʼ. Menkhan tinre arhõ am ṭhenko rakʼetʼ tahẽkana unre serma khon onkoakʼ ańjomkatem dayawako kan tahẽkana arem bańcaoetʼko tahẽkana.

²⁹ “Amakʼ ạn-ạri secʼ ruạṛ hijukʼ lạgitʼ onkom sontorletʼkoa menkhan onkoakʼ beohar do bạḍạite perecʼge tahẽkantakoa; onko do amakʼ sanam hukumko bebataoleda. Amakʼ okako hukum palonkate hoṛko bańcaokʼ ona upạrteko kạileda. Onko do hoṭokʼko keṭecʼ ketʼtakote amakʼ katha bako ańjomletʼa.

³⁰ Menkhan enhõ ḍher bochor hạbicʼ onkoakʼem sahaoleda. Amren nạbiko ar amren jiu hotete onkom sontorletʼkoa, menkhan onko do ona bako luturatʼ tahẽkana. Onate am do eṭakʼ eṭakʼ jạtrenkoakʼ tirem jimạletʼkoa.

³¹ Menkhan amakʼ asambheṛ daya gunạkʼte onko do bam maraoletʼkoa se bam bạgi giḍiletʼkoa ente am do daya ar mãyãte perecʼ Isor kanam.

³² “E aleren Isor, am dom maraṅgea, am do daṛean ar botoranicʼ Isor kanam. Am do amakʼ asambheṛ dulạṛ reakʼ bondobosem rukhiyạ dohoyeda. Asuren rajkoakʼ okte khon ehopʼkate teheń hạbicʼ okako duk ale cetanre ar aleren rapajko, mukhiyạko, nạbiko, aleren hapṛamko ar aleren sanam hoṛko cetanre calakʼ kan ona do amakʼ mẽtʼre thoṛage baṛe hoyokʼma.

³³ Am do ale cetanre okakom hoyocoakatʼ onate do bam behok akada; am do pạtiạr salakʼgem kạmi akada ar ale dole behok akada.

³⁴ Aleren rapajko, mukhiyạko, naekeko ar aleren hapṛamko do amakʼ ạn-ạri bako manao akada; amakʼ hukum se sontor katha hõ bako ańjomleda.

³⁵ Onkoakʼ rajokʼ oktere am emakʼ maraṅ ar rosaṛ disạmre asambheṛ bhạlạiko jomleda, enhõ onko do amko bạgi giḍiwatʼmea ar bạṛicʼ hor khon bako ruạṛlena.

³⁶ “Ńelme, teheń ale do golam kanale, ar okaṭakʼ disạm do aleren hapṛamkom ematʼko tahẽkan onḍe jemon onko do jo ar joto lekan bhage jinisko jom daṛeakʼ menkhan ale do onḍege golamkole hoyakana.

³⁷ Aleakʼ kại iạte okoeko raj do ale cetanre rajosṭim calao ocoyetʼko onko ṭhenge disạm reakʼ ḍher phosol do calakʼ kana. Onko do akoakʼ kusi leka aleakʼ hoṛmo cetanre ar aleren ạsul janwarko cetanre ạidạriko calaoeda. Ale do ạḍi duk ar kosṭore menakʼlea.”

Bondobosko chapakʼ kan

³⁸ Ona tayom hoṛko doko olkeda: “Niạko karonte ale do ńitokʼ apnar talare olkate bondobosle bandhaoeda, ar ona cetanre aleren mukhiyạko, liwiko ar naekeko doko chapakʼ kana.”