Nehemiạ 8 - সান্তালী বাইবেল

Esra do ạn-ạri reakʼ puthiye paṛhao ańjomatʼkoa

¹ Eaeakʼe cando lahare sanam hoṛko do mitʼ sãote dakʼ phaṭok samaṅre maedanreko jarwayena. Unre dhorom guru Esra do Israelko lạgitʼ Probhu Isorakʼ emakʼ hukum, metakʼme Moseyakʼ ạn-ạri puthi ạgu darako metadea.

² Eaeyakʼ cando reakʼ pạhil dinre naeke Esra do herel hoṛko, maejiuko ar okoe do ańjomkateko bujhạu daṛeakʼ nonkan manḍerren sanam hoṛko samaṅre ạn-ạri reakʼ puthiye ạgukeda.

³ Ar dakʼ phaṭok samaṅ reakʼ maedan secʼ samaṅkate uni do herel, maejiu ar eṭakʼ okoeko bujhạu daṛeakʼ onko do setakʼ khon tikin hạbicʼe paṛhao ańjomatʼkoa, ar hoṛko do goṭa monte ona ạn-ạri puthi reakʼ kathako ańjomkeda.

⁴ Puthi paṛhao lạgitʼ dhorom guru Esra do kaṭ reakʼ oka macanko benaoletʼ onare rakapʼenteye teṅgoyena. Unre uniyakʼ jojomsa aṛe secʼre do Matithia, Sema, Anaya, Uriạ, Hilkiạ, Makʼaseya tekoko teṅgoyena ar leṅgasa aṛe secʼre do Podae, Misayel, Malkia, Hasum, Hasbadana, Sekariạ ar Mesulam tekoko teṅgo akan tahẽkana.

⁵ Ona tayom Esra do puthiye oṭakʼkeda. Ar sanam hoṛge uniko ńel ńamkedea, ente uni do onko khon cetanreye teṅgo akan tahẽkana. Ar puthiye oṭakʼketʼ khan hoṛko doko teṅgoyena.

⁶ Unre Esra do maraṅ Probhu Isore sarhaokedea ar sanam hoṛ do ti tul kateko menkeda, “Amen, Amen.” Ar otre ombakʼkate Probhu Isorko sewawadea.

⁷ Jesua, Bani, Serebia, Jamin, Akub, Sabethai, Hodia, Makʼaseya, Kelita, Asaria, Josabad, Hanan, Pelaia-ar sanam Liwiko do onḍe teṅgo tahekan hoṛko ạn-ạri reakʼko bujhạuatʼkoa.

⁸ Ar oka paṛhaokʼkan ona jemon hoṛkoko bujhạu daṛeakʼ onate onko do Isorakʼ ạn-ạri reakʼ puthi khon paṛhaokate torjomakateko bujhạuatʼkoa.

⁹ Ona tayom disạm cakʼlaoyicʼ Nehemiạ, naekeko ar dhorom guru Esra ar okoe Liwiko do hoṛkoko cetʼako kan tahẽkan onko do sanam hoṛko metatʼkoa, “Teheńakʼ niạ din do aperen Probhu Isor ńutumte sonotakʼ din kana. Ape do alope homora se alope raga.” Uni do niạ kathae menkeda, ente sanam hoṛge ạn-ạri reakʼ katha ańjomkateko rakʼetʼ tahẽkana.

¹⁰ Nehemiạ do onkoe metatʼkoa, “Ape do senkate bhage bhage jomakʼ ar heṛem heṛemakʼ darkha rasa ńũipe ar okoeyakʼ jomakʼ bạnukʼtako onko hõ thoṛa emakope. Teheńakʼ din do aboren Probhu Isor ńutumte sonotakʼ din kana. Ar alope dukokʼa, ente Probhu Isore emakʼ rạskạge apeakʼ daṛe do.”

¹¹ Liwiko do sanam hoṛko hape ocoketʼkoteko metakʼkoa, “Ape do hape akae tahenpe, ente teheńakʼ din do sonotakʼ din kana. Ar alope dukokʼa.”

¹² Unre disạmren sanam hoṛko do rạskạ salakʼ jom-ńũi lạgitʼ ar jomakʼ hĩs khon kol lạgitʼko ruạṛ calaoena, ente okako katha onkoko baḍae ocolen ona doko bujhạu daṛeada.

Chamḍa porob

¹³ Ona cando reakʼ dosarakʼ dinre sanam bõsren mathako, naekeko ar Liwiko do ạn-ạriko mońjte bujhạu lạgitʼ dhorom guru Esra ṭhenko jarwa mitʼena.

¹⁴ Onko do ạn tạrire noako ńamkeda Probhu Isor do Mose hotete niạ hukume emakana je, eaeyakʼ cando reakʼ porob jokhecʼ Israelko do chamḍa oṛakʼkoreko tahena,

¹⁵ ar onkoakʼ atoko ar Jerusalemre onko do niạko lại jạhira, “Cetʼleka ol menakʼ onkage ape do buru ṭoṭhakote senkate chamḍa oṛakʼ benao lạgitʼ jạitun dare reakʼ ḍạrko ar bir jạitun reakʼ ḍạrko, mehndi ḍạrko, khijur ḍạrko ar jhạṛpạ dare reakʼ ḍạrkope ạgudaraea.”

¹⁶ Ona iạte hoṛko do onako ḍạrko ạguketʼte adomko do akoakʼ oṛakʼ chatre se racare se Isorakʼ oṛakʼ reakʼ racare se dakʼ phaṭok ṭhenakʼ phaelao racare se Ephrayim phaṭok ṭhenakʼ phaelao racare apnar lạgitʼ chamḍa oṛakʼko benaokeda.

¹⁷ Bondi dosa khon ruạṛ hecʼakan goṭa dolrenkoge chamḍa oṛakʼ benaokate onakoreko tahẽyena. Nunren hopon Josuạ okte khon enhilokʼ hạbicʼ Israelko do nonka ar bako kạmi akatʼ tahẽkana. Ar onko do ạḍiko rạskạyena.

¹⁸ Pạhil hilokʼ khon ehopʼkate mucạtʼ din hạbicʼ Esra do dinạmge Isorakʼ ạn-ạri reakʼ puthi khone paṛhao ańjomatʼkoa. Hoṛko do eae din hạbicʼko porobena ar irạl hilokʼ do niạm leka mitʼṭecʼ sabhako hoyocokeda.