Nehemiạ 6 - সান্তালী বাইবেল

Nehemiạ upạrte soṛojontro

¹ Tayomte Sanbalat, Tobiạ, Arabiạ, Gesam ar aleren sarecʼ bạirikoko ańjom ńamkeda je, iń do arhõ pạcriyiń gathao akada ar ona pạcri talare jãhãn phãkge bạnukʼa. Ar unhạbicʼ hõ phaṭok duạrkore silpiń bạń lagao akatʼ tahẽkana.

² Unre Sanbalat ar Gesem do niạ kathakin roṛgotʼkada, “Dela hijukʼme, abo do Ono ṭạnḍi reakʼ mitʼṭecʼ atore bon ńapamlenge.” Menkhan unkin do iń hạniń lạgitʼ kin soṛojontrokeda.

³ Onate iń do hoṛ kolkateń roṛ ruạṛatʼ kinạ, “Iń do mitʼṭecʼ bises kạmiyiń kạmikante bạń sen daṛeakʼ kana. Ar kạmi bạgikate aben ṭhen calakʼte cedakʼ kạmi do bond tahena.?”

⁴ Onko do pon dhao inạ khoborge iń ṭhenko kolkeda ar jao dhaoge inạ kathageń roṛ ruạṛatʼkoa.

⁵ Ona tayom mõṛẽ dhaore Sanbalat do inạ khoborantege acʼren guti iń ṭhene kolkedea. Uniyakʼ tire do mitʼṭecʼ ciṭhi tahẽkana.

⁶ Onḍe ol tahẽkana, “Eṭakʼ eṭakʼ jạtrenko ṭhen niạ katha ańjomokʼ kana ar Gemes hõe meneda, am ar Jihudiko do hul reakʼpe soṛojontro kana ar onate pạcripe benaoeda. Ona chaḍa niạko khobor lekate bujhạukʼ kana, am do onkoren raj hoyokʼem meneda.

⁷ Am reaṅ niạ katha jemon Jerusalemre lại saḍekʼ baṅma Jihudạre mitʼṭen raj menaea, onate am do nạbikom bahal akatʼkoa. Ńitokʼ niạ khobor do raj ṭhen seṭerokʼa. Onate dela hijukʼme, abo do mitʼṭecʼ bon sopolhaema.”

⁸ Iń do noań roṛ ruạṛadea, “Am okam menetʼ onka do cetʼge baṅ hoyokʼkana; noa do amakʼ mongoṛa katha kana.”

⁹ Onko do aleakʼ kạmi bond lạgitʼte niạ katha iạte botor udukʼ aleko kurumuṭuiyetʼ tahẽkana. E Isor, ńitokʼ do ińakʼ tire daṛe emokʼme.

¹⁰ Mitʼdin iń do Delayaren hopon Semayawakʼ oṛakʼteń calaoena. Delaya do Mehetabelren hopone tahẽkana. Semaya do uniyakʼ oṛakʼreye oko akan tahẽkana. Uniye menkeda, “Dela hijukʼme, alaṅ do Isorakʼ oṛakʼre, sonot oṛakʼ talare laṅ ńapamlenge ar silpiń laṅ sińkakʼa, ente hoṛko do am gocʼme lạgitʼko hijukʼ kana; onko do ńindạ okte am gogocʼko hijukʼa.”

¹¹ Menkhan ińiń metadea, “Iń lekan hoṛ do cetʼ dạdạṛ lek kantińạ? Iń lekan hoṛ do cetʼ jãhãe leka mundilte bolokate jiwetʼe tahẽkokʼa? Iń do bạń calakʼa.”

¹² Iń doń bujhạu ńamkeda, Isor do uni bae kol akadea; Tobiạ ar Sanbalat do ṭakakin emakawadete iń upạrte noako kathae roṛeda.

¹³ Uni do ṭakae em ocolena jemone botor ocoyiń ar uniyakʼ katha leka kạmikate jemoniń kại, arko durnam ocoyińte lajaoreko paṛaoiń.

¹⁴ E ińren Isor, Tobiạ ar Sanbalat tạkin okaṭakʼ kin kạmi akatʼ ona do disạ dohokakʼme. Maejiu nạbi Noadiạ ar sarecʼ nạbiko okoe do iń botor ocoyiń reakʼko kurumuṭuletʼ onkoakʼ katha hõ disạ dohokakʼme baṛe.

Pạcri jut aroy reakʼ kạmi sạten

¹⁵ Elul cando reakʼ bargel mõṛẽ tạrik reakʼ, mõṛẽgel dosar din hilokʼre pạcri do benao sạtena.

¹⁶ Aleren sanam bạiriko niạ katha tinreko ańjomkeda ar aḍepaseren sanam jạtrenko onako ńelkeda unre aleren bạiriko do dilko atʼketʼtakoa, ente onkoko bujhạu daṛeada, niạ kạmi do aleren Isorakʼ goṛotege hoyakana.

¹⁷ Onako dinre Jihudạren manotan hoṛko do Tobiạ ṭhen aema ciṭhiko koletʼkan tahẽkana ar Tobiạ ṭhen khon hõ onko do roṛ ruạṛko ńametʼ tahẽkana.

¹⁸ Jihudạren ḍher hoṛko do Tobiạ ṭhen kiriạteko tol akan tahẽkana, ente uni do Araho hopon Sekaniạren jãwãegomkete tahẽkana. Ar Tobiạren hopon Jehonan do Berekiạren hopon Mesulamren hoponerae bapla akade tahẽkana.

¹⁹ Ona chaḍa onko manotan hoṛko do Tobiạwakʼ bhageakʼ kạmi reakʼ katha ińko baḍae ocoyediń kan tahẽkana ar ińakʼ katha hõ uniko baḍae ocoyede tahẽkana. Ar Tobiạ do botor ocoyiń lạgitʼ iń ṭhen ciṭhiye oletʼkan tahẽkana.