Nehemiạ 5 - সান্তালী বাইবেল

Reṅgecʼ hoṛko goṛowako reaṅ

¹ Tayomte hoṛko ar onkoren bạhuko do akoren kisạ̃ṛ Jihudi boehako upạrte ạḍi gulmalko ehopʼkeda.

² Adomko doko menetʼ tahẽkana, “Ale ar aleren koṛa ar kuṛi hoponko do lekharele ḍhergea; jom-ńũkate jiwetʼ tahen lạgitʼ bạ̃ṛti anaj jạruṛalea.

³ Eṭakʼkoko menetʼ tahẽkana, “Anaj ńam lạgitʼ ale do aleakʼ jaega jumi, darkha bagwan ar oṛakʼ duạr bondhok doho lagao alekana.”

⁴ Arhõ eṭakʼkoko menetʼ tahẽkana, “Rajakʼ khajna emokʼ lạgitʼ jaega jumi ar darkha bagwan bondhok dohokate ṭaka hatao lagaoale kana.

⁵ Ale do mitʼ jạtren hoṛkangeale ar aleren gidrạko hõ onkoren gidrạko leka kangeako enhõ aleren hoponko ar hoponerako do golam menkate emokʼ hoyokʼkantalea, ar aleren hoponerako modre adomko do laharege kạ̃ṛmĩko hoyakana. Ńitokʼ do cetʼ ektiạrige bạnukʼtalea, ente aleakʼ jaega-jumi ar darkha bagwan do eṭakʼ hoṛkoakʼ hoyakana.”

⁶ Onkoakʼ gulmal ar niạ lạlisko ańjomkate iń do ạḍiń raṅgaoena.

⁷ Iń do onkoakʼ kathako hudiskateń ńelkeda ar ona tayom do manotan hoṛko ar mukhiyạko dusiketʼkoteń metatʼkoa, “Ape do aperen nij disạmren hoṛko ṭhen khon sudpe jomeda.” Onate iń do onko bicạrko lạgitʼ mitʼṭecʼ maraṅ sabhań hohokeda.

⁸ Ińiń menkeda, “Be-Jihudiko ṭhen okoeko boehako ạkhrińlen tabon onko do daṛeakʼ bhor bon chaḍao ạgu akatʼkoa.” Ar ńitokʼ do aperen boehako ạkhrińokʼpe jormoṭetʼkoa, onate onko do arhõ kiriń ruạṛ lagao abona.” Niạ katha ańjomkate onko do hapegeko tahẽyena, ente roṛ ruạṛ reakʼ cetʼge baṅ tahẽkantakoa.

⁹ Iń do arhõń metatʼkoa, “Ape okape cekakan ona do ṭhikakʼ do baṅkana. Be-Jihudi bạiriko jemon aloko henosta daṛeabon onate aboren Probhu Isor botorae seletʼ calakʼ do cetʼ lek baṅkan tabona?

¹⁰ Hoṛko ṭhen ińakʼ, ińren boehako ar ińren kạmiyạkoakʼ hõ ṭaka ar anaj reakʼ paona menakʼa. Menkhan dela, abo do noako bon ikạkakʼma.

¹¹ Ńitokʼ ape do onkoakʼ jaega jumi, darkha bagwan, jạitun bagwan ar oṛakʼ duạr ruạṛ katakope, ona chaḍa ṭaka, anaj, nãwã darkha rasa ar sunum iạte oka sudpe hatao akatʼ onahõ ruạṛkatakope.”

¹² Niạ katha ańjomkate onkoko menkeda, “Ale do jotowakʼle ruạṛkatakoa. Ale do onko ṭhen khon cetʼge bale dạbiya. Am cetʼem men onagele kạmiya.” Ona tayom iń do naekekoń hohowatʼkoa ar manotan hoṛko ar mukhiyạkoń kiriạ ocoketʼkoa jemon gokʼ akatʼ lekako kạmi.

¹³ Iń do ińakʼ samaṅ secʼ koṭaketʼteń menkeda, “Okoe noa gokʼakʼ bae rukhiyại Isor do onko mimitʼko onkoakʼ oṛakʼ-duạr ar sompotti khon nonkageye koṭa giḍikakoa. Nonkan hoṛko do nonkageko koṭa giḍi ocokʼa ar onkoakʼ do sanamakʼ cabakʼ takoa.” Niạ katha ańjomkate sanam hoṛko menkeda, “Amen,” ar onko do Probhu Isorko sarhaokedea. Manotan hoṛko do akoakʼ gokʼakʼ lekageko kạmikeda.

¹⁴ Artaksasto raje rajokʼ bargelakʼ bochorre iń do Jihudạ disạmren hoṛkoren disạm cakʼlaoyicʼ iń bahal ocolena, ar un khon uniyakʼ rajokʼ pegel bar bochor hạbicʼ, metakʼme ona gelbar bochor hạbicʼ iń se ińren boehako do disạm cakʼlaoyicʼakʼ bhejawakʼ jomakʼ do bale jomleda.

¹⁵ Menkhan iń lahate okoe disạm cakʼlaokoko tahẽkan onko do hoṛko cetanre hamal bojhako ladeyatʼko tahẽkana ar jomakʼ ar darkha rasa chaḍa hõ onko ṭhen khon mõṛẽ sae bargel gram rupạko hataoetʼ tahẽkana. Onkoren gutiko hõ disạm hoṛko cetanre mạlikiko calaoetʼ tahẽkana. Menkhan iń do Isoriń botoraekante ona leka bạń kạmi akada,

¹⁶ bickom iń do niạ pạcri reakʼ kạmire lạgiạ paṛao akaniń tahẽkana. Ińren sanam gutiko hõ kạmi lạgitʼ onḍeko jarwakʼkan tahẽkana. Ale do okoege jumi do bale kirińleda.

¹⁷ Ona chaḍa hõ Jihudi ar cetan hudạren kạmiyạko mod khon mitʼsae mõṛẽgel hoṛko ar aḍepase jạtrenko khon okoe do ale ṭhenko hijukʼkan tahẽkan onko do ale sãoteko jom-ńũiyetʼ tahẽkana.

¹⁸ Dinạm hilokʼ mitʼṭen ḍaṅgra, turui goṭen bachao akan bheḍa ar adom adom cẽṛẽko do iń lạgitʼko isinetʼko tahẽkana, ar gel mãhã por por sanam lekanakʼ darkha rasa ińko ạguwạńkan tahẽkana. Menkhan iń do tishõ disạm cakʼlaoyicʼakʼ jomakʼ jinis do bạń dạbileda, ente niạko dạbiteakʼ do hoṛko cetanre hamal bojha leka tahẽkana.

¹⁹ E ińren Isor, noko hoṛko lạgitʼ iń okakoń kạmi akatʼ ona iạte bhạlạyiń do alom hiṛińa.