Nehemiạ 4 - সান্তালী বাইবেল

Pạcri jut aroyre tạkicʼakʼko

¹ Sanbalat do pạcri bhit arhõle jut aroyetʼkane ańjomketʼ khan ạḍitetʼe bekusiyena ar edreteye seṅgelena. Uni do Jihudikoe cigạriyatʼkoa.

² Uni do acʼ sãoten hoṛko ar Samariạren lạṛhại phạdko samaṅreye menkeda, “Noko nijor Jihudiko do cetʼko cekayeda? Noko do cetʼ arhõ benao ruạṛ lạgitʼko muruk akada? Isorakʼ goṛo ńam lạgitʼ cetʼ janwarkoko samaṅkoa? Onko do cetʼ mitʼ dintegeko sạta? Jobra ḍạṅ khon cetʼ jiwetʼ dhiriko oḍok ocoya? Onako ma rapakʼ roṅgo akan coṅ!”

³ Unre Amoni Tobia do uni aṛereye tahẽkana; uni doe menkeda, “Onko okako benaoetʼkan ona cetante mitʼṭen khĩkṛĩye decʼlen khan hõ dhiri pạcri do dhasao lạnduṛokʼtakoa.”

⁴ Unre Nehemiạ doe koekeda, “E aleren Isor, ańjomtaleme baṛe cetʼlekale nihạ̃t ocokʼ kana mente. Onkoakʼ henosta do onkoakʼ bohokʼrege baṛe ruạṛ ocoytakome. Am do nonkaeme jemon onko do bondikate luṭ reakʼ jinis lekate eṭakʼ disạmko idi ocokʼ.

⁵ Onkoakʼ behokakʼ do alom ikại takoa se amakʼ mẽtʼ samaṅ khon onkoakʼ kại do alom meṭaotakoa, ente okoe pạcriko benaoetʼ onko samaṅrege onko do amko henosta akatʼmea.”

⁶ Pạcri tinạkʼ usulokʼ ona reakʼ adha hạbicʼle gathao akada, ente hoṛko do akoakʼ goṭa monte niạko kạmi akada.

⁷ Menkhan Sanbalat, Tobiạ, Arabiạko, Amoniạko ar Asdadren hoṛko do tinreko ańjomkeda je, Jerusalem pạcri jut aroe reakʼ kạmi calakʼ kana mente ar paṛakʼko hõ esedokʼ kana unre onko do ạḍiko edreyena.

⁸ Onko sanamko mitʼkate niạko soṛojontrokeda je, senkate Jerusalem upạrteko lạṛhạiya ar gulmalko ehoba.

⁹ Menkhan ale do aleren Isor ṭhenle koekeda ar onko botorte siń ńindạ pahrae lạgitʼle bebostakeda.

¹⁰ Inạkʼtege Jihudạren hoṛko menkeda, “Kạmiyạ hoṛ doko nijor idikʼkana ar gejer dhiriko do nunạkʼ ḍhera je, ale do pạcri ar bale gathao daṛeakʼkana.”

¹¹ Aleren bạirikoko meneda, “Onko ạuriko baḍaerege onko talare bon senokʼa ar bon gocʼkote kạmi bon bond oṭokakʼa.”

¹² Ona iạte okoe Jihudiko do onko sorreko girobasokʼ kan tahẽkan onko do hecʼkateko metalekan tahẽkana, “Ale ṭhen ruạṛ hijukʼpe.”

¹³ Niạ katha ańjomkate iń do pạcri bhitri reakʼ copotʼ jaegakore ar okakore paṛakʼ akan tahẽkan onḍe do bõsrenko lekate hoṛkoń bahalketʼkoa ar onkoakʼ tire tarwaṛe, borlom ar akʼ sariń ematʼkoa.

¹⁴ Ona tayom iń do sanamakʼ ńel jut baṛakate lekman hoṛko, maraṅ hudạren hoṛko ar sarecʼ hoṛkoń metatʼkoa, “Onko do alope botorakoa. Menkhan maraṅ daṛeanicʼ ar botoranicʼ Probhu Isorakʼ katha baṛe disạipe ar aperen boehako, koṛa hoponko ar kuṛi hoponko, bạhuko ar oṛakʼ lạgitʼ lạṛhạipe.”

¹⁵ Aleren bạiriko tinreko ańjomkeda, ale do onkoakʼ soṛojontro reakʼ kathale baḍae akada ar Isor do ona bae jo baha ocoletʼtakoa, unre ale sanamkoge pạcri ṭhen ruạṛ senkate apan ạpin kạmirele dhurạuena.

^16-17 Enhilokʼ khon ińren adha hoṛ do kạmireko tahẽyena ar sarecʼ adha hoṛ do borlom, ḍhal, mẽṛhẽtʼ ar akʼ sarante sapṛao akanko tahẽyena. Jihudạren okoeko hoṛ do pạcriko gathaoetʼ tahẽkan onko sãote mukhiyạko hõko tahẽkana. Ar okoe mal-jalko gokʼ idiyetʼ tahẽkan onko do mitʼ titeko kạmiyetʼ tahẽkana ar eṭakʼ tite do khanḍa bhanḍako sapʼetʼ tahẽkana.

¹⁸ Okoeko gathaoetʼ tahẽkan onko mimitʼko do ḍanḍare tarwaṛe tolkateko kạmikan tahẽkana, Ar okoe sakwae oroṅetʼ tahẽkan uni do iń ṭhene tahenkan tahẽkana.

¹⁹ Tayomte iń do manotan hoṛko, cetan hudạren kạmiyạko ar sarecʼ hoṛkoń metatʼkoa, “Kạmi do maraṅgea ar phaelaote menakʼa; onate abo do pạcrire hanḍe nanḍe sạṅgiń macha menakʼ bona.

²⁰ Jãhãege sakwa reakʼ saḍepe ańjom unrege ale ṭhenpe jarwakʼa. Ar aboren Isor do abo ńutumteye lạṛhạiya.”

²¹ Ar ạḍi setakʼ khon ehopʼkate ạuri ńuhumokʼ hạbicʼ adha hoṛ do borlomko sapʼkakʼ kan tahẽkana ar nonkate ale dole kạmiyetʼ tahẽkana.

²² Unre iń do hoṛko arhõń metatʼkoa, “Mimitʼ hoṛ apan ạpin gutikoante ńindạ do Jerusalemreko tahẽ aṅgakʼma arko horhoema ar sińre doko kạmi tabonma.”

²³ Iń se ińren boehako se ińren gutiko se ińren rurukhiyạko ale do okoe hõ kicricʼge bale totʼletʼtalea; ar dakʼ ṭhen senkate hõ ale do apnarakʼ khanḍa bhanḍale idiyetʼ tahẽkana.