Nehemiạ 3 - সান্তালী বাইবেল

Jerusalem reakʼ pạcri jut arokʼkan

¹ Maraṅ naeke Eliasib ar uni sãoten naekeko do kạmireko dhurạuente bhiḍi duạrko benao arokeda. Onko do Isor ńutumte onako sonotketʼte ona reakʼ silpińko lagaoada. Ona tayom Humaya gaṛ ar Hananel gaṛ hạbicʼ pạcriko gathaoketʼte ona banar hĩs hõko samaṅkeda.

² Inạ sarecʼakʼ hĩs do Jerikhoren hoṛko gathaokeda ar ona reakʼ sarecʼakʼ hĩs do Emriren hopon Sạkure gathaokeda.

³ Hasena hoponko do hako duạrko jut arokeda. Onko do ona reakʼ kaṭko ar ona reakʼ silpińko, khilko ar huṛkạṛkoko lagaoada.

⁴ Ona reakʼ sarecʼ hĩs do Uriạren hopon Meremote jut arokeda. Uriạ do Hakosren hopone tahẽkana. Ona sarecʼakʼ hĩs do Berakiạren hopon Mesulamren hopone jut arokeda. Berakiạ do Mesesabelren hopone tahẽkana. Ona reakʼ sarecʼ hĩs do Banaren hopon Sadoke jut arokeda.

⁵ Ona sarecʼakʼ hĩs do Tekoaren hoṛko jut arokeda, menkhan onkoren kisạ̃ṛ hoṛko do onkoakʼ ńel todarot tabere kạmi bako rạjilena.

⁶ Paseyaren hopon Joyada ar Besodeya hopon Mesulam tạkin do mare duạrkin jut arokeda. Unkin do ona reakʼ kaṭko ar ona reakʼ silpińko, ona reakʼ khil ar huṛkạṛko kin lagaoada.

⁷ Ona reakʼ sarecʼakʼ hĩs do Gibeonren Melaṭia ar Meronothiren Jadon tekin kin jut arokeda. Nukin do Gibeon ar Misparen hoṛkin tahẽkana. Niạ hĩs do phurạt gaḍa pạchim secʼren disạm cakʼlaoyicʼakʼ oṛakʼ samaṅ secʼre tahẽkana.

⁸ Ona tayom reakʼ hĩs do Harhayaren hopon Usiyele jut arokedea. Usiyel do mitʼṭen sonhare tahẽkana. Ona pante reakʼ do Hananiạye jut arokeda. Uni do jut so mosolakoe benaoetʼ tahẽkana. Nonkate onko do osar pạcri hạbicʼ Jerusalem reakʼ lahateakʼ pạcri lekako beretʼ ruạṛkeda.

⁹ Jerusalem jilạ reakʼ adha hĩs do subedar Hurren hopon Rephaye jut arokeda.

¹⁰ Inạ sarecʼakʼ hĩs do Harumaph ren hopon Jedaye jut arokeda. Niạ hĩs do acʼakʼ oṛakʼ sorrege tahẽkana. Ona tayom reakʼ hĩs do Hesabneya ren hopon Hatuse jut arokeda.

¹¹ Harimren hopon Malkiạ ar Pahat-Moabren hopon Hasub do ona tayom reakʼ hĩs ar bhaṭa buruńj kin jut arokeda.

¹² Jerusalem jilạ reakʼ adha hĩs do subedar Halohes hopon Salum ar uniren hoponerako do tayomakʼ hĩsko jut arokeda.

¹³ Buru nala reakʼ duạr do Hanun ar Sanoar ren hoṛko jut arokeda. Onko do ona reakʼ silpiń, khil, ar huṛkạṛko lagaokeda. Onko do jobra duạr hạbicʼ mitʼ hajar moka jaega hõko jut arokeda.

¹⁴ Beth-Hakem jilạren subedar Rekabren hopon Malkiạ do jobra duạre jut arokeda. Uni do ona reakʼ silpiń, khil ar huṛkạṛe lagaoada.

¹⁵ Mispa jilạren subedar Kolhosren hopon Salum do dakʼ jharna duạre jut arokeda. Uni do onare chade benaoada ar ona reakʼ silpiń, khil ar huṛkạṛkoe lagaoada. Rajakʼ bagwan aṛere Sela pukhri reakʼ pạcri khon ehopʼkate Dạudakʼ nagraha khon okaṭakʼ siṛhi do latarte pheḍ hecʼ akan tahẽkan ona hạbicʼe jut arokeda.

¹⁶ Bethsur jilạ reakʼ adha hĩsren subedar Asbukren hopon Nehemiạ do pạcri reakʼ dosarakʼ hĩs Dạudakʼ bõsrenkoakʼ topa sor ṭhen la akatʼ pukhri ar birbanṭakoakʼ oṛakʼ hạbicʼe jut arokeda.

Liwiko okoe do pạcri reakʼko kạmiketʼ

¹⁷ Ona tayom reakʼ hĩs do Bani hopon Rehumakʼ tabere Liwikoko jut arokeda. Ar ona tayom reakʼ hĩs do Keyila jilạren adha hĩsren subedar Hasabiạ do acʼakʼ ṭoṭha ńutumteye jut arokeda.

¹⁸ Ona tayom reakʼ hĩs do onkoren boehako, metakʼme Keyila jilạren sarecʼ adha hĩsren hoṛko jut arokeda. Onko do akoren subedar Henadad ren hopon Bawaiakʼ tabere tahẽkateko jut arokeda.

¹⁹ Ona tayom reakʼ hĩs do, metakʼme Misparen disạm cakʼlaoyicʼ Jesuạren hopon Eser do khanḍa bhanḍa dohowakʼ oṛakʼte rakabokʼ hor reakʼ samaṅ reakʼ jaega khon pạcri reakʼ konac hạbicʼe jut arokeda.

²⁰ Ona tayom Sabairen hopon Baruk do pạcri reakʼ konac khon maraṅ naeke Eliaserakʼ oṛakʼ duạr hạbicʼ mon lagaokateye jut arokeda.

²¹ Ona tayom reakʼ hĩs do Uriạren hopon Meremoth do Eliasibakʼ oṛakʼ reakʼ silpiń khon ehopʼkate oṛakʼ reakʼ mucạtʼ hạbicʼe jut arokeda. Uriạ do Hakosren hopone tahẽkana.

Naekeko okoe do pạcri reakʼko kạmiketʼ

²² Ona tayom reakʼ hĩs do Jordan gaḍa bilạn ṭạnḍire girobasokʼ kan naekekoko jut arokeda.

²³ Ona tayom reakʼ hĩs do Benjamin ar Hasub tekin kin jut arokeda. Noa do unkinakʼ oṛakʼ samaṅ senakʼ hĩs tahẽkana. Ona tayom reakʼ hĩs do Makʼaseya ren hopon Asariại jut arokeda. Niạ hĩs do uniyakʼ oṛakʼ aṛe reakʼ hĩs tahẽkana. Makʼaseya do Ananiạ ren hopone tahẽkana.

²⁴ Ona aṛere Henadad ren hopon Binui do Asariạwakʼ oṛakʼ khon ehopʼkate konac hạbicʼ ar mitʼ hĩse jut arokeda

^25-26 Usạiren hopon Palal do konac reakʼ eṭakʼ aṛeye jut arokeda. Noa hĩs do pahradarkoakʼ bakher raca ṭhenakʼ raj oṛakʼ khon oḍok hecʼ akan usul buruńj samaṅ reakʼ tahẽkana. Ona tayom reakʼ hĩs do Parosren hopon Pedaye jut arokeda ar mundil oṛakʼ reakʼ sapʼ sosorko okoeko do Ophelreko girobasokʼ kan tahẽkan onko do purub secʼ reakʼ dakʼ duạr ar sate oḍokʼ akan buruńj hạbicʼko jut arokeda.

Eṭakʼko okoe do pạcri reakʼko kạmiketʼ

²⁷ Onko aṛe reakʼ do Takoaren hoṛko ona sate oḍok akan maraṅ buruńj khon Ophel reakʼ pạcri hạbicʼ ar mitʼ hĩsko jut arokeda.

²⁸ Sadom duạr samaṅ reakʼ hĩs do naekekoko jut arokeda. Onko mimitʼko do apan ạpin oṛakʼ sor reakʼ pạcriko jut arokeda.

²⁹ Ona tayom reakʼ hĩs do Imerren hopon Sadoke jut ocokeda. Niạ do uniyakʼ oṛakʼ samaṅ secʼakʼ tahẽkana. Ar ona tayom reakʼ hĩs do purub duạrren pahradar Sekaniạren hopon Semayae jut arokeda.

³⁰ Ona aṛe reakʼ hĩs do Selemiạ ren hopon Hananiạ ar Salaphren turuicʼ hopon Hanun tạkin do ar mitʼ hĩs kin jut arokeda. Ona aṛe reakʼ hĩs do Berikhiạ ren hopon Mesulame jut arokeda. Noa do uniyakʼ oṛakʼ samaṅ secʼ tahẽkana.

³¹ Ona tayom reakʼ hĩs do Malkiạ ńutuman mitʼṭen sonharre jut arokeda. Niạ do jarwakʼ duạr samaṅre mundil oṛakʼren sapʼ sosorkoakʼ ar bạnij beparkoakʼ oṛakʼ hạbicʼ tahẽkana ar pạcri konac reakʼ koṭha kandha hạbicʼ.

³² Sonhar ar bạnij bepariko do pạcri konac reakʼ koṭha kandha ar bhiḍi duạra tala reakʼ jaegako jut arokeda.