Nehemiạ 2 - সান্তালী বাইবেল

Nehemiạ Jerusalemteye calakʼkan

¹ Artaksast rajakʼ bargel bochor reakʼ Nisan candore mitʼ din jojom jokhecʼ raj samaṅre darkha rasa tahẽkana, ar iń do ona idikate rajiń emadea. Niạ lahare tis hõ iń do raj samaṅre mulin do bạń tahẽkana.

² Ona iạte raj do ińe metadińạ, “Am ma bacom ruạkʼkan, enḍekhan mẽtʼãhã do cekate mulinge ńelokʼkantama? Noa do amakʼ ontor reakʼ kosṭo chaḍa ar cetʼhõ baṅkana.” Iń do noa katha ańjomkate ạḍiń botorena,

³ enhõ rajiń metadea, “Maharaj do jaejug jiwetʼ baṛeye tahenma. Ińren hapṛamko oka nagrahareko topa ocoakan ona nagraha doko dhaṅ dhaser akada ar ona reakʼ phaṭok duạrko do seṅgelteko jeretʼ akada ar ona ańjomkate ińakʼ mẽtʼãhã do mulin baṅkhan cekakʼtińa?”

⁴ Raj do ińe metadińạ, “Am do cetʼem khojkana?” Unre iń do sermaren Isor ṭheniń koeyana.

⁵ Ona tayom rajiń roṛ ruạṛadea, “Maharaj amem kusige khan ar amren guti amakʼ mẽtʼre dayae ńamakatʼ khan enḍekhan ińren hapṛamkoakʼ topa oka do Jihudạre menakʼ ona nagrahate calakʼ reakʼ hukum baṛe imạńme jemon arhõ onań benao rakapʼ daṛeakʼ.”

⁶ Unre raj aṛere rạni hõe duṛupʼ akan tahẽkana. Ar raj do ińe kulikedeńạ, “Tinạkʼ din calakʼ lagaoama, ar tisokʼem ruạṛ hijukʼa?” Iń do mitʼṭecʼ okte reakʼ kathań roṛketʼ khan raj doe kusiyente calakʼ reakʼ hukume emadińạ.

⁷ Unre arhõ raj iń metadea, “Maharaj ińrem kusige khan enḍekhan phurạt gaḍa hanasaren disạm cakʼlaoko ṭhen ciṭhi olme jemon onko do akoakʼ disạm talate Jihudạteko sen ocoạń.

⁸ Ona chaḍa uni do acʼren bir rurukhiyạicʼ Ashap ṭhen ciṭhiye ol jemon mundil oṛakʼ buruńj reakʼ duạrako lạgitʼ ar nagraha reakʼ pạcri lạgitʼ ar ińakʼ tahen oṛakʼre lạgitʼ kaṭkoe imạń.” Ińren Isorakʼ bhạlạiyanakʼ ti iń cetanre tahẽkante raj do ińakʼ nehõre dohoketʼtińạ.

⁹ Uni do iń sãote adom lạṛhại phạdkoren subedarko ar sadomkoe kolketʼkoa. Iń do phurạt gaḍa hanasaren disạm cakʼlaoko ṭhen senkate rajakʼ ciṭhiń ematʼkoa.

¹⁰ Israelkoakʼ bhạlại lạgitʼ mitʼṭen hoṛe hecʼakan reakʼ katha ańjomkate Horoni Sanbalat ar Amoni kạmiyạicʼ Tobiạ tekin do bạkin kusilena.

Pạcri bhite ńeletʼkan

^11-12 Iń do Jerusalemte senkate onḍe pe din tahen tayom ńindạ jokhecʼ adom hoṛko soṅgekateń oḍokena. Jerusalemre oka cekae lạgitʼ Isor do ińakʼ monreye uskurkedeń ona do okoege bạń lạiyatʼkoa. Iń do okoeṭakʼ janwar cetanreń decʼakan tahẽkan uni chaḍa ar cele janwar hõ iń sãote do bako tahẽkana.

¹³ Enhilokʼ ńindạ iń do oḍokkate buru nala duạrte toyo- kuń ar ona tayom do jobra duạrteń oḍok calaoena ar Jerusalem reakʼ rạputʼ pạcri ar seṅgelte ḍahao akan duạrko reakʼ dosakoń ńelkeda.

¹⁴ Ar ona tayom do dakʼ jharna reakʼ duạr ar rajakʼ pukhri secʼ iń laha idiyena; menkhan iń do okoeṭakʼ janwarren decʼakan tahẽkan uniyakʼ do onkate calakʼ reakʼ jãhãn horge baṅ tahẽkana.

¹⁵ Ona iạte iń do enhilokʼ ńindạge pạcri reakʼ dosa ńel ńelte buru nala talateń senena ar buru nala duạrte arhõń ruạṛ hecʼena.

¹⁶ Iń do okateń senlena ar cetʼ iń cekakeda ona do cetan hudạren kạmiyạko bako baḍae daṛeada, ente iń do unrehõ disạmren Jihudiko ar naekeko ar lekman hoṛko se maraṅ hudạren hoṛko se kạmiyạko hõ cetʼge bạń baḍae ocoakatʼko tahẽkana.

¹⁷ Tayomte onko maraṅ hudạren kạmiyạkoń metatʼkoa, “Abo harkhet ar sasetre menakʼ bon ona dope ńeletʼgea. Jerusalem do dhaṅ dhaser akana ar ona reakʼ phaṭok duạrko do seṅgelteko jeretʼ akada. Onate dela abo do, Jerusalem reakʼ pạcri arhõ bon beretʼ ruạṛa. Inạ khan henostawan hoṛ mente do ar babon tahena.”

¹⁸ Ińren Isor cetʼlekae bhạlại akadiń ar raj okae men akawạdiń ona do onkoń baḍae ocoketʼkoa. Onkoko roṛ ruạṛadińa, “Dela enḍekhan, benao bon ehopʼlege.” Ar niạ menkate ona bhage kạmi ehopʼ lạgitʼko sapṛaoena.

¹⁹ Menkhan Horoni Sanbalat, Amoni Tobiạ ar Arabi Gesem teko do niạ katha ańjomkateko landa dhutʼatʼlea. Onkoko menkeda, “Ape do cetʼ pe ceka kana? Ape do cetʼ raj upạrtepe hula?”

²⁰ Iń do onkoń roṛ ruạṛatʼkoa, “Sermaren Isor do aleye jo baha ocolea. Ale do uniren gutiko kanale, onate pạcri do arhõle gathao aroya, menkhan Jerusalem do apeakʼ jãhãn sompotti, jãhãn dạbiteakʼ se jãhãn ạidạriyakʼ do baṅkana.”