Nehemiạ 13 - সান্তালী বাইবেল

Bidisiạkoko begar ocokʼkan

¹ Hoṛko do Moseyakʼ puthi khon paṛhao ańjomatʼko khan ńelena, onḍe do nonka ol menakʼa Amonren ar Moabrenko do Isorren hoṛkoakʼ somajre bako seletʼ daṛeakʼa.

² Niạ reakʼ karon do hoyokʼkana, Mose bidạlre onko do jomakʼ ar ńũi lạgitʼ dakʼ hõ Israelko bako ematʼko tahẽkana, ar onko sarapako lạgitʼ Biliamko bhaṛa ạguledea. Menkhan aboren Isor do sarap bodolteye bhoratʼ bon tahẽkana.

³ Hoṛko do Ạn-ạri reakʼ niạ katha ańjomkate sal mesal jạtren sanam hoṛko Israel somaj khonko begarketʼkoa.

Nehemiạwakʼ mucạtʼ kạmiko

^4-5 Inạ lahare naeke Eliasib, okoe do aboren Isorakʼ khajańci oṛakʼ reakʼ bhare ńamletʼ tahẽkan, uni do mitʼṭecʼ maraṅ okocʼ kandha Tobiại emade tahẽkana, ente Tobiạ do uniren peṛaye tahẽkana. Ona kandhare lahate do phosol samaṅokʼakʼ jinisko, dhup ar mundil oṛakʼ reakʼ jinisko dohokʼkan tahẽkana. Ona chaḍa onḍe do liwiko, sekʼreń dolko ar rurukhiyạko lạgitʼ hukum akatʼ anajko, nãwã darkha rasa ar sunumko reakʼ gelakʼ hĩs reakʼ mitʼ hĩsko dohoyetʼkan tahẽkana ar naekeko lạgitʼ oka emokʼ kan tahẽkan ona hõ onḍegeko dohoyetʼ tahẽkana.

⁶ Menkhan noako tinre hoyokʼ kan tahẽkana unre Jerusalemre do bạń tahẽkana, ente Babelren raj Artaksastowakʼ pegel bar bochor rajokʼ oktere iń do raj ṭheniń ruạṛ senlena. Niạ thoṛa din tayom rajakʼ hukum hataokate iń do Jerusalemteń ruạṛ hecʼena.

⁷ Eliasib do Isorakʼ oṛakʼre Tobiạ mitʼṭecʼ kandhai emade tahẽkante oka bạṛicʼakʼe kạmiletʼ ona do Jerusalemte ruạṛ hecʼkate ona reakʼ iń ańjomkeda.

⁸ Onate iń do edrete Tobiạwakʼ sanam jinisko ona kandha khoniń oḍok giḍikatʼtaea.

⁹ Ona tayom ińakʼ hukumte ona oṛakʼ iń sapha ocokeda ar Isorakʼ oṛakʼ reakʼ jinisko, jomakʼ samaṅokʼakʼ jinisko ar dhupko ạgukate arhõ onḍegeń dohokada.

¹⁰ Iń do noa hõń baḍaekeda je, sereń dolko ar eṭakʼ liwiko do kuṛại bako ńamakatʼte akoakʼ kạmi bạgikate onko do nij nij khet baṛgeteko ruạṛ akana.

¹¹ Onate iń do cetan hudạren kạmiyạkoń ruhetʼketʼkoteń kuliketʼkoa, “Isorakʼ oṛakʼre kạmi lạgitʼ cetʼ cetʼko jạruṛokʼ ona emokʼ do cedakʼpe ḍhilisiliyeda?” Ona tayom iń do onko liwikoń hoho ạguketʼkoa ar nij nij hudạreń bahal ruạṛketʼkoa.

¹² Ona tayom Jihudạren sanam hoṛko do akoakʼ anajko, nãwã darkha rasa ar sunumko reakʼ gelakʼ hĩs reakʼ mitʼ hĩs do khajańci oṛakʼteko ạgukeda.

¹³ Naeke Salemis, dhorom cecetʼicʼ Sadok ar Pedaya ńutuman mitʼṭen liwi noko do khajańci oṛakʼ reakʼ bhariń ematʼkoa ar Sakurren hopon, metakʼme Mataniaren goṛomtetʼ koṛa Hanan do onkoren gokʼṛoyicʼ menkateń bahalkedea. Noko do sanam hoṛgeko pạtiạu akokan tahẽkana. Onko cetanre onkoren gusṭi boehakoakʼ hĩs hạṭińako reakʼ dạyik hõń ematʼkoa.

¹⁴ E ińren Isor, niạko kạmi lạgitʼ disạyińme baṛe. Ińren Isorakʼ oṛakʼ ar onaren sapʼdapʼ kạmi lạgitʼ pạtiạr salakʼ okań ceka akatʼ ona do alom muchạu giḍikakʼa.

¹⁵ Ona jokhecʼ iń ńelkeda Jihudạren hoṛko do jirạukʼ mãhãre darkhako lelen kana, phosolko samṭaoeda ar ona phosol, darkha rasa, loa jo ar eṭakʼ sanamakʼ bojhako do gadhareko ladeyeda. Ona chaḍa onko do jirạukʼ mãhãre Jerusalemte onako aderetʼkana. Onate jirạukʼ mãhãre jomakʼ jinis ạkhriń babotre onkoń sontorkatʼkoa.

¹⁶ Jerusalemre girobasokʼ kan Turren hoṛko do hako ar eṭakʼ eṭakʼ jinisko ạgukate jirạukʼ mãhãre Jerusalemre Jihudạren hoṛ ṭhenko ạkhrińetʼ tahẽkana.

¹⁷ Unre iń do Jihudạren manotan hoṛkoń ruhetʼketʼkote onkoń metatʼkoa, “Noa do cetʼpe ceka kana? Ape do jirạukʼ mãhãre behokakʼpe kạmiyetʼte cedakʼpe besonotetʼ kana.

¹⁸ Aperen hapṛamko do cetʼ nonkage bako kạmileda, ona iạte aboren Isor do abo cetanre, niạ nagraha cetanre bạṛicʼakʼ bae hoyocoakada? Ńitokʼ ape do jirạukʼ mãhã bape sonotetʼte Isor do Israelko cetanre arhõpe bekusi ocoyede kana.”

¹⁹ Iń do niạ hukumiń emokʼ kana je, jirạukʼmãhã ehobokʼre tinre Jerusalem reakʼ phaṭok duạrko cetanre ńut pheḍ hijukʼa unre jemon phaṭok duạr doko sińkakʼ ar jirạukʼ mãhã ạuri cabakʼ hạbicʼ ona do bondge tahenma. Jirạukʼ mãhãre jãhãn bojhage bhitrite alo jemon ạgukʼ ar ona ńel lạgitʼ iń do ińren adom kạmiyạko phaṭok duạr ṭheniń bahalketʼkoa.

²⁰ Onate bepariko ar okoe do joto lekan jinisko ạkhrińetʼ tahẽkan onko do mitʼ bar ńindạ Jerusalem bahrereko aṅga hạṭińena.

²¹ Iń do onko sontor katʼkoteń metatʼkoa, “Ape do pạcri ṭhen cedakʼpe aṅga hạṭińokʼ kana? Arhõ jodi niạ kạmigepe kạmi enḍekhan ape upạrte bebostań hataoa.” Ar unkhon onko do jirạukʼ mãhãre ar bako hijukʼkan tahẽkana.

²² Ona tayom iń do liwikoń hukumatʼkoa onko do apnartetʼko sapha maṛaṅokʼte jirạukʼ mãhã sonot dohoy lạgitʼ senkate jemon phaṭok duạrko horhoe. E ińren Isor, noa iạte hõ disạ dohoyińme ar amakʼ asambheṛ dulạṛte dayawạńme.

²³ Ona jokhecʼ iń do niạ hõń ńelkeda je, Jihudạren adom hoṛko do Asdod, Amoni ar Moabi kuṛikoko bapla akatʼkoa.

²⁴ Onko talaren ḍher gidrạkoge Asdod se eṭakʼ jạtrenkoakʼ pạrsiko roṛeda. Onko do Jihudi pạrsite roroṛ do bako baḍaea.

²⁵ Iń do onkoń ruhetʼketʼkoa ar onko cetanre jemon sarap hecʼako ona hõń metatʼkoa. Onkoren adomko doń dalketʼkoa ar bohokʼ upʼkoń racakʼ tutʼketʼtakoa. Isor ńutumte noań kiriạ ocoketʼkoa jemon porjạtren koṛako sãote akoren hoponerako aloko baplako ar akoren hoponko hõ jemon porjạtren kuṛiko tulucʼ aloko baplako.

²⁶ Ona tayom iń do onkoń metatʼkoa, “Israelren raj Solomon do nonkan bapla iạtegeye kạileda. Eṭakʼ jãhãn jạtrenko modre uni lekan raj do ar celege bako tahẽkana ar Isor do uniye dulạṛede tahẽkana ar uni do sanam Israelko cetanreye rajledea, menkhan enhõ uni do porjạtren maejiuko hotete ạḍiye kạileda.

²⁷ Ńitokʼ do cetʼ ona kathage ańjom hoyokʼ tabona, ape hõ niạ bạṛicʼakʼ kạmigepe kạmikana, metakʼme porjạtren maejiukope baplayetʼkote aboren Isor ṭhen bepạtiạrkope hoyakana?”

²⁸ Maraṅ naeke Eliasibren hopon Jehoyadaren mitʼṭen hopon do Horoni hoṛ Sanbalatren kuṛiye bapla akadea. Ona iạte iń ṭhen khon uni koṛa doń laga ńirkedea.

²⁹ E ińren Isor, nokoakʼ katha disạ dohoyme, ente noko do naeke hudạko bhõnḍ akada ar naeke ar liwikoakʼ kạmi reakʼ bondobosko rạputʼ akada.

³⁰ Nonkate iń do sanamko tala khon porjạtrenkoakʼ jotowakʼ iń sạṅgiń giḍikada. Tayomte naeke ar liwikoakʼ kạmi lekate onko mimitʼko do kạmiń hạṭińatʼkoa.

³¹ Ona chaḍa okte nạpitre kaṭko ar pạhilte rakabokʼ phosol ạgui reakʼ hõń bebostawatʼkoa. E ińren Isor, iń bhạlạyiń lạgitʼ disạyińme baṛe.