Nehemiạ 12 - সান্তালী বাইবেল

Naeke ar Liwikoakʼ tạlika

¹ Okoeko naeke ar liwiko do Sealṭiyelren hopon Serubabel ar Jesua sãote bondi dosa khonko ruạṛ hecʼlen onko doko hoyokʼkana: Naekeko modre Seraya, Jeremiạ, Esra,

² Amaria, Maluk, Haṭus,

³ Sekania, Rehum, Meremot,

^4-6 Ido, Genthoi, Abiạ, Mijamin, Makʼadia, Bilga, Semaya, Joyarib, Jedaya,

⁷ Salu, Amok, Hilkiạ ar Jedaya. Noko do Jesua oktere naeke ar onko bõsren mathako tahẽkana.

⁸ Liwiko modre Josuại, Binui, Kadmiyel, Serebiạ, Jihudạ ar Matania. Nui Mataniạ ar uni bõsrenko cetanrege gun manao sereńko ńel todarot reakʼ bhar do tahẽkana.

⁹ Ar Bakbukia ar Uno do dewa sewa kạmi oktere onko samna sạmni kin teṅgokʼkan tahẽkana.

Maraṅ naeke Josuạren bõsko

¹⁰ Josuạren hopontetʼakʼ ńutum do Joyakin, Joyakinren hopon do Eliasib, ar Eliasibren hopon do Joyada;

¹¹ Joyadaren hopon do Jonathan ar Jonathanren hopon do Jaddua.

Naeke gusṭiren mathako

¹² Joyakim oktere naeke bõsko modre okoeko mathako tahẽkan onko doko hoyokʼkana: Serayaren hopon Meraya, Jirimiạren hopon Hanaiạ,

¹³ Esraren hopon Mesulam, Amariaren hopon Jehohanan,

¹⁴ Maulkiren hopon Jonathan, Sebaniaren hopon Joseph,

¹⁵ Harimren hopon Adma, Merayot bõsren Helkai,

¹⁶ Idoren hopon Sekaria, Ginethonren hopon Mesulam,

¹⁷ Abiạren hopon Sikri, Miniamin bõsren mitʼ hoṛ, Moadiạ bõsren Pilṭai,

¹⁸ Bilga hopon Samua, Semaya hopon Johanathan

¹⁹ Joyarib hopon Matenai, Jedayaren hopon Usi,

²⁰ Salariren hopon Kalai, Amokren hopon Eber,

²¹ Hilkiạ hopon Hasabia, Jedayaren hopon Nethaniel.

Naeke ar Liwi gharońjrenkoakʼ tạlika

²² Eliasib, Joyada, Johanan ar Jadua teko oktere Liwiko ar naekekoakʼ bõsren mathakoakʼ ńutum do tạlikare ol hoylena, ar ona do Perosren raj Darjawesakʼ rajokʼ oktere sạtena.

²³ Liwi bõsren mathakoakʼ ńutum do Eliasibren hopon Johanan okte hạbicʼ bõsbudạ puthire ol caṛhao hoylena.

²⁴ Liwikoren mukhiyạ Hasabia, Serebia, Kadmiyelren hopon Josua ar onkoren bõsren hoṛko do Isorren hoṛ Dạudakʼ katha lekage eṭakʼ dolren samna sạmni teṅgokate Isor sarhao arko gun manao joharae kan tahẽkana.

²⁵ Matania, Bukbukia, Obadia, Mesulam, Talmon ar Akub do rurukhiyạkoko tahẽkana. Noko do phaṭok sor reakʼ khajańci oṛakʼko horhoyetʼ tahẽkana.

²⁶ Josuạren hopon, metakʼme Josabadren goṛomtetʼ koṛa Joyakim ar disạm cakʼlaoyicʼ Nehemiạ ar naeke ar dhorom guru Esra oktere noko doko horhoyetʼ tahẽkana.

Jerusalem reakʼ pạcriko uḍhạuetʼkan

²⁷ Jerusalem reakʼ pạcri Isor ńutumte samaṅokʼ reakʼ porob jokhecʼ Liwiko okareko girobasokʼ kan tahẽkan onḍe khon Jerusalemteko ạgu ocoyena jemon onko do kortal, binạ banam ar peṛesaṅ banam salakʼ sarhaoteakʼ sereńko sereńte rạskạ salakʼ ona porobko palon daṛeakʼ,

^28-29 Jerusalem beṛhaeteakʼ jaega Netophatikoakʼ atoko khon, Beth-gilgal khon, Geba ar Asmawet ṭoṭha khon gaenahako ạgu jarwaketʼkoa. Noko Liwi gaenahako do Jerusalem beṛhaeteakʼ jaegakore atoko benaoan tahẽkana.

³⁰ Naeke ar Liwiko do apnartetʼko saphayena ar hoṛko hõko saphaketʼkoa; ar ona tayom do pạcri ar phaṭok duạrko saphakeda.

³¹ Ona tayom iń do Jihudạ mukhiyạko ona pạcri cetanreń idiketʼkoa ar gun manao johar lạgitʼ barea maraṅ sereń dolkoń bahalketʼkoa. Mitʼ dolrenko do pạcri cetante jojomsa aṛe jobra phaṭok duạr secʼ gente getecʼko sen idiyena.

³² Ar onko tayomte do Hosaya ar Jihudạren adha mukhiyạko sen idiyena.

³³ Ar onko sãoteko senena Asaria, Esra, Mesulam,

^34-36 Jihudạ, Benjạmin, Semaya ar Jirimiạ. Ona chaḍa sakwawante adom naekeko hõko senena. Onko doko hoyokʼkana Sakaria ar uniren são kạmiyạko Samaya, Asarel, Milalai, Gilalai, Makʼai, Nethanel, Jihudạ ar Hanani. Sekariạren hapṛamko doko tahẽkana Jonathan, Semaya, Matania, Mika, Sakur ar Asaph. Noko do Isorren hoṛ Dạudakʼ katha leka aema lekan bajnawanteko sen idiyena. Ar dhorom guru Esra do noa dol laha lahateye sen idiyena.

³⁷ Dakʼ jharna phaṭok duạr ṭhen okare pạcri do cetan secʼ rakapʼ calao akan onḍe onko do sojhe Dạudakʼ nagrahate rakabokʼ siṛhiteko rakapʼ calaoente Dạudakʼ oṛakʼ aṛete purub secʼ reakʼ dakʼ phaṭok duạr ṭhenko senena.

³⁸ Dosar sereń dolko do onko tayom secʼko laha idiyena. Iń ar sarecʼ adha hoṛko do pạcri cetante onko tayomte gente getecʼle sen idiyena. Onko do tunduru buruńj parom idikate osar pạcri hạbicʼko senena.

³⁹ Ona tayom do Ephrayim phaṭok duạr, Jisana phaṭok duạr, Hako phaṭok duạr, Hananelakʼ gaṛ ar Saeko reakʼ gaṛ aṛete bhiḍi phaṭok duạr hạbicʼko senena. Ar ona tayom do horhokoakʼ phaṭok duạr hạbicʼ senkateko thirena.

⁴⁰ Ona tayom banar sereń dolko do gun manao johar emkate onko do Isorakʼ oṛakʼre akoakʼ jaegare senkateko teṅgoyena. Iń ar iń sãote cetan hudạren adha kạmiyạko hõle teṅgoyena.

⁴¹ Eleakim, Makʼaseya, Minilamin, Mikaya, Elioenae ńutuman naekeko do akoakʼ sakwawante iń sãoteko tahẽyena.

⁴² Ona chaḍa Makʼaseya, Semaya, Eliaser, Usi, Jehohanan, Malkia, Elam ar Eserteko hõko tahẽyena. Ar sereń dolren hoṛko do Jesrahiakʼ ạyur lekako sereńkeda.

⁴³ Isor do ḍher rạskại danatʼkote enhilokʼ hoṛko do maraṅ okocʼ mitʼṭen samaṅokʼakʼ porobko porobena arko hulạsena. Ar onkoren maejiuko ar gidrạko hõko rạskạyena. Jerusalemren hoṛkoakʼ noa rạskạ reakʼ andoṛ do ḍher sạṅgiń hạbicʼ ańjomena.

Mundil oṛakʼ lạgitʼ dan ạgukʼkan

⁴⁴ Khajańci oṛakʼre okako danko ạguiyetʼ tahẽkan ar pạhil rakabokʼ phosolko ar gel hĩsko ạguiyetʼ tahẽkan ona ńel todarot lạgitʼ unre hoṛkoko bahalketʼkoa. Onko do ato beṛhaeteakʼ khet baṛgeko khon ạn lekate naeke ar liwiko lạgitʼ hoṛko ṭhen khon phosol reakʼ hĩsko ạguiyetʼ tahẽkana. Unre Jihudạren hoṛ do kusiteko emokʼkan tahẽkana, ente sekʼwakan naeke ar liwikoakʼ kạmi iạte onko doko kusikʼ kan tahẽkana.

⁴⁵ Dạud ar uniren hopon Solomonakʼ hukum leka naekeko ar liwiko do akoren Isorakʼ sewa kạmi ar saphakʼ reakʼ kạmiko kạmiyetʼ tahẽkana ar sekʼreń dolko ar rurukhiyạko hõ akoakʼ niṭakʼ kạmiko kạmiyetʼ tahẽkana.

⁴⁶ Ḍher bochor lahare Dạud ar Asaphakʼ oktere Isor ńutumte sarhao ar gun manao johar reakʼ sereń lạgitʼ sekʼreń dolko ar sereń dol ạyurkoko bahal ocolena.

⁴⁷ Serubabel ar Nehemiạ oktere hõ Israelko do jotoge gaenaha ar rurukhiyạkoakʼ dinạm hilokʼ reakʼ kuṛạiko emkatako kan tahẽkana. Ona chaḍa onko do eṭakʼ liwikoakʼ kuṛại hõ begarkateko dohokakʼ kan tahẽkana ar liwiko hõ Aron bõsrenkoakʼ paona lạgitʼko begar dohokakʼ kan tahẽkana.