Nehemiạ 11 - সান্তালী বাইবেল

Jerusalem ar ona beṛhaeten hoṛkoakʼ tạlika:

¹ Disạm hoṛkoren mukhiyạko do Jerusalemreko girobasokʼ kan tahẽkana. Ar sarecʼ hoṛko doko gulibãṭkeda jemon onko modren gel hoṛko modre mitʼ hoṛ do jemon Jerusalemreye girobas daṛeakʼ ar sarecʼ are goṭen hoṛ do akoakʼ nij nij atoregeko tahenma.

² Okoeko hoṛ do akoakʼ kusileka Jerusalemre girobasokʼ lạgitʼko khojketʼ hoṛko do onkoko sarhaoketʼkoa.

³ Ḍher Israelko, naekeko, Liwiko, mundil oṛakʼren sapʼdapʼko ar Solomonren gutikoren hoponko do Jihudạ disạm reakʼ eṭakʼ eṭakʼ atokore nij nij jaega jumireko girobasokʼ kan tahẽkana. Ona chaḍa Jihudạ ar Benjạmin gusṭiren thoṛa hoṛ do Jerusalemreko girobasokʼ kan tahẽkana. Disạmren okoeko mukhiyạ do Jerusalemreko girobasokʼ kan tahẽkan onko doko hoyokʼkana:

⁴ Jihudi bõsrenko mod khon Usiạren hopon Athaia ar Barukren hopon Makʼaseya. Usren hapṛamko doko hoyokʼkana Sakariạ, Amaria, Sephaṭia, Mahalel ar Peres.

⁵ Barukren hapṛamko doko tahẽkana Kolhose, Hosae, Adaya, Joyarib, Sekaria ar Siloni.

⁶ Peres bõsren jotote ponsae turuigel irạl daṛean hoṛko do Jerusalemreko girobasokʼ kan tahẽkana.

^7-8 Benjamin bõsrenko mod khon Mesulamren hopon Salu ar uniren gokʼṛoyicʼ Gabai ar Salai. Mesulamren hapṛamko doko tahẽkana Joel, Pedaya, Kolaya, Makʼaseya, Ithiyel ar Jeseya. Niạ bõsren jotote aresae bargel irạl hoṛ do Jerusalemreko girobasokʼ kan tahẽkana.

⁹ Sikriren hopon Joel do onkoren sordare tahẽkana ar Hasenuaren hopon Jihudạ do nagraharen dosaricʼ mukhiyại tahẽkana.

^10-11 Naekeko mod khon do Joyaribren hopon Jedaya, Jakin ar Hilkiạren hopon Seraya. Hilkiạren hapṛamko doko tahẽkana Mesulam, Sadok, Merayot ar Ahiṭub. Ahiṭub do Isorakʼ oṛakʼ ńel todarot kạmiye kạmikan tahẽkana.

^12-14 Onkoren arhõ aema são kạmiyạkoko tahẽkana one okoe do mundilreko kạmikan tahẽkan. Niạ bõsren jotote irạl sae bargel bar naekeko do Jerusalemreko girobasokʼ kan tahẽkana. Ona chaḍa Jerohamren hopon Adaya ar uni bõsren barsae pongel bar naekeko do Jerusalemreko girobasokʼ kan tahẽkana. Noko sanamkoge gharońjren mukhiyạko tahẽkana. Jerohamren hapṛamko doko hoyokʼkana Pelalia, Amsi, Sekaria Pashur ar Malkia. Ona chaḍa Asrelren hopon Amasai ar uni bõsren mitʼsae bargel irạl naekeko hõ Jerusalemreko girobasokʼ kan tahẽkana. Noko sanamkoge daṛean lạṛhại birko tahẽkana; Onkoren subedar do Hagedolimren hopon Sabdiyel tahẽkana. Asarelren hapṛamko do Ahsai, Mesilemoth ar Emer tekoko tahẽkana.

¹⁵ Liwiko mod khon Hasubren hopon Semaya; Hasuburen hapṛamko doko tahẽkana Asrikam, Hasabiạ ar Buni.

¹⁶ Ona chaḍa do Sabethai ar Josabad ńutuman Liwiko modre bar hoṛ do mathakin tahẽkana, unkin cetanre do Isorakʼ oṛakʼ reakʼ bahre secʼakʼ kạmi ńeltodarot reakʼ bhar tahẽkana.

¹⁷ Ona chaḍa Mikạren hopon Mataniạ, okoe do gunmanao johar ar sarhao sereń ạyurkoren sordare tahẽkana. Mikạren hapṛam dokin tahẽkana Sabdi ar Asapha. Nukin sãote Bakbukiại tahẽkana okoe do são kạmiyạko modren dosaricʼe tahẽkan. Somuyiren hopon Abda hõe tahẽkana; Samuyiren hapṛam dokin tahẽkana Galal ar Jeduthun.

¹⁸ Sonot nagrahare Liwiko do jotote barsae irạlgel pon hoṛko tahẽkana.

¹⁹ Phaṭok rurukhiyạko doko hoyokʼkana Akub, Ṭalmon ar onkoren sãotenko. Noko mitʼsae eaegel bar hoṛ do phaṭok duạrko horhoyetʼ tahẽkana.

²⁰ Israelkoren sarecʼ hoṛko, naekeko ar Liwiko do Jihudạ reakʼ sanam nagraha ar atokore apan ạpin hapṛamkoakʼ jaega jumireko girobasokʼ kan tahẽkana.

²¹ Ar mundil oṛakʼren sapʼdapʼ hoṛko do Ophel burureko girobasokʼ kan tahẽkana. Onkoakʼ ńel todarot reakʼ bhar do Siha ar Gispa cetanre tahẽkana.

²² Jerusalemre Liwikoren sordar do Baniren hopon Usiye tahẽkana. Baniren hapṛamko doko tahẽkana Hasabia, Matani, Mikạ ar Asaph. Asaph bõsren hoṛko do gaenahako lekate Isorakʼ oṛakʼre sapʼdapʼ kạmiko kạmikan tahẽkana.

²³ Noko sekʼreń dolrenko do rajakʼ hukum tabereko tahẽkana. Ar ona hukum lekage onkoakʼ dinạm hilokʼ reakʼ kạmiko ṭhik dohoyetʼ tahẽkana.

²⁴ Hoṛkoakʼ sanamakʼ bisoete rajren sopolhayicʼ do Mesesabelren hopon Petahiại tahẽkana. Mesesabelren hapṛam do Seraho ar Jihudạ tekin kin tahẽkana.

²⁵ Jihudạ gusṭiren hoṛko do okako ato ar ona reakʼ khet baṛgekoreko girobasokʼ kan tahẽkan onako do noakoge Kiriat-arba ar ona beṛhaeteakʼ atoko, Dibon ar ona beṛhaeteakʼ atoko, Jikab-sil ar ona beṛhaeteakʼ atoko,

²⁶ Jesua, Molada, Beth-pelet,

²⁷ Hasar-sual, Ber-seba ar ona beṛhaeteakʼ atoko,

²⁸ Siklag, Mekona ar ona sorteakʼ atoko,

²⁹ En-rimon, Sora, Jarmut,

³⁰ Sanoa, Adulam ar ona sorteakʼ atoko, Lakis ar ona sorteakʼ atoko ar Aseka ar ona sorteakʼ atoko. Onko do Ber-seba khon ehopʼkate Hinom buru lodam hạbicʼ sanam jaegakoreko girobasokʼ kan tahẽkana.

³¹ Benjạmin gusṭiren hoṛko okako atokoreko girobasokʼ kan tahẽkan onako do hoyokʼkana Geba, Mikmas, Aijare, Bethel ar ona sorteakʼ atoko,

³² Anathot, Nob ar Anania,

^33-35 Hasor, Rama, Gitayim, Hadid, Seboyim, Nebalat, Lod, Ono ar kạrigolkoakʼ lodamge.

³⁶ Ona chaḍa thoṛa Liwiko, okoe do Jihudạ ṭoṭhareko girobasokʼ kan tahẽkan, onko do Benjạmin ṭoṭhare senkate girobasokʼko ehopʼena.