Nehemiạ 10 - সান্তালী বাইবেল

¹ Okoeko ona cetanreko chapatʼ tahẽkan onko doko hoyokʼkana: Hakaliạren hopon disạm cakʼlaoyicʼ Nehemiạ ar Sedekiạ,

² Seraya, Asaria, Jirimiạ,

³ Pashur, Amaria, Malkiạ,

^4-6 Hatus, Sebaniạ, Maluk, Harim, Meremot, Obedia, Daniel, Ginethon, Baruk,

⁷ Mesulam, Abia, Mijamin,

⁸ Makʼasea, Bilgai, Semaya. Noko do jotoge naekeko tahẽkana.

^9-10 Liwiko mod khon okoeko chapatʼ tahẽkan onko doko hoyokʼkana: Asaniạren hopon Jesua, Henadad hoponko modren Binui ar Kadmiyel ar onkoren são kạmiyạko Sebania, Hodiạ, Kelita, Pelaya, Hanan,

¹¹ Mika, Rehob, Hasabia,

¹² Sakur, Serebiạ, Sebania,

¹³ Hodia, Bani ar Beninu.

¹⁴ Disạm hoṛkoren mukhiyạko mod khon okoeko chapletʼ tahẽkan onkoakʼ ńutum do hoyokʼkana Paros, Pahat-Moab, Elam, Satu, Bani,

¹⁵ Buni, Asgad, Bebai,

¹⁶ Adonia, Bigwal, Adin,

^17-19 Aṭer, Hiskiạ, Asur, Hodia, Hasum, Besai, Harip, Anathot, Nebai,

^20-22 Magpias, Mesulam, Hesir, Mesesabel, Sadok, Jaddua, Pelaṭiạ, Hanan, Anaya,

^23-25 Hosea, Hananiạ, Hasub, Halohes, Pilha, Sobek, Rehum, Hasabna, Makʼaseya,

²⁶ Ahiyạ, Hanan, Anan

²⁷ Maluk, Harim ar Bakʼana.

Bondobos bandhao akan reakʼ

^28-29 Ale sarecʼ hoṛko do, metakʼme naekeko, Liwiko, rurukhiyạko, sekʼreń dolko, mundilren sapʼdapʼko ar Isorakʼ ạn-ạri manao lạgitʼ okoe do aḍepase jạtrenko khonko begar akan, aleren bạhuko ar aleren okoe gidrạko do bujhạu reakʼ akel hoyakantako, ale sanamkoge aleren boehako, metakʼme manotan hoṛko sãotele mitʼena. Ale dole meneda je, ale okale kiriạkʼ lạgidokʼ kan ona bale manao enḍekhan ale cetanre sarap paṛaokʼma. Ale do Isorren guti Mose hotete emakʼ Isorakʼ ạn-ạri lekatele calakʼa ar aleren Probhu Isorakʼ sanam hukum ar niạmko joton salakʼle manaoa.

³⁰ Ale do aḍepase jạtrenko sãote aleren hoponerako bale baplakoa se aleren hoponko lạgitʼ hõ onkoren hoponerako bale ạgukoa.

³¹ Jirạukʼ mãhã se eṭakʼ jãhãn sonotakʼ dinre aḍepase jạtrenko jãhãnakʼ jinis se jomakʼ ạkhriń lạgitʼko ạgui enḍekhan onko ṭhen khon do bale kirińa. Ar mimitʼ eaeyakʼ bochorre ale do aleakʼ jumire bale casa ar sanam rinle ikạ katakoa.

³² Aleren Isorakʼ oṛakʼre sapʼsor kạmi lạgitʼ jao bochor mitʼ sekel reakʼ pe hạṭiń reakʼ mitʼ hạṭiń emokʼ reakʼ dạyikle ataṅkeda.

³³ Niạko sekelte jemon ṭebil cetanre samaṅakʼ piṭhạ ńamokʼ ar jaoge jomakʼ ar jeredokʼ samaṅokʼakʼ porob, jirạukʼ mãhãre samaṅokʼakʼ porob, ambas ar eṭakʼ niṭ akatʼ din reakʼ porobko, sonot jinis samaṅokʼakʼ porob ar Israelkoakʼ kại ńutumte samaṅokʼakʼ porob ar Isorakʼ oṛakʼ reakʼ sanam kạmiko jemon hoyokʼ.

³⁴ Aleakʼ ạn-ạrire cetʼleka ol menakʼ ona leka aleren Probhu Isorakʼ pinḍre jeredokʼ lạgitʼ jao bochor niṭ akatʼ oktere aleren Isorakʼ oṛakʼre mitʼke mitʼ bõsko tinre kaṭ ạgu lagao akoa ona ṭhik lạgitʼ ale do, metakʼme naekeko, liwiko ar hoṛkole gulibãṭkeda.

³⁵ Ale do jao bochor pạhilre rakabokʼ phosol ar mitʼke mitʼ dare reakʼ jo do Probhu Isorakʼ oṛakʼtele ạguiya.

³⁶ Ạn-ạrire cetʼ leka ol menakʼ onkage ale do aleren pạhil hoponko ar ḍaṅgrako, meromko ar bhiḍikoren pạhil hoponko Isorakʼ oṛakʼreko dewa sewakan naeke ṭhenle idikoa.

³⁷ Ona chaḍa aleakʼ holoṅ ar jomakʼ reakʼ pạhilakʼ hĩsko, dare reakʼ pạhilakʼ joko ar nãwã darkha rasa ar sunum reakʼ pạhilakʼ hĩs do aleren Probhu Isorakʼ oṛakʼre naekeko ṭhenle ạguiya. Ar aleakʼ gel hạṭiń reakʼ mitʼ hạṭiń do Liwiko ṭhenle ạguiya, ente aleakʼ joto atokore Liwiko do gel hĩsko hataoeda.

³⁸ Liwiko tinre gel hĩsko hataoa unre onko sãote do Aronren bõsren mitʼṭen naekeye tahena. Ar Liwiko do ona gel hĩs reakʼ mitʼ hĩs do Isorakʼ khajańci oṛakʼteko idiya.

³⁹ Ar khajańci oṛakʼ reakʼ okako kandhare sonot jinisko dohoyetʼkan ar sekʼwakan naekeko, rurukhiyạko ar sekʼreń dolrenko okareko tahen onḍe Israelko ar Liwiko do akoakʼ anaj, nãwã darkha rasa ar sunumko ạguiya. Aleren Isorakʼ oṛakʼre jãhãnakʼge jạruṛ onage ale dole emokʼa.