Nạhum 3 - সান্তালী বাইবেল

Hae Niniwi

¹ Hae, ona mãyãm joro ocoakatʼ nagraha do, one onare eṛe ar luṭakʼ jiniskote perecʼge, onḍe do jaoge manwako gocʼ ocokʼkana.

² Ańjomme, cạbuk do sapaṭ sapaṭ ar pạ̃ihạ̃ko reakʼ saḍe do ghaṛ ghaṛaokʼkana; sadomko doko don idiyeda; ar rãt gạḍiko do bin sambṛaokʼ leka calakʼ kana;

³ ar aswariko doko ńir bhiṛạukʼkana, tarwaṛe do jhak jhakaokʼ kana, ar borlom do malkaokʼkana. Ńelpe, ḍher ghạl akan hoṛ ar mạ̃ṛĩko reakʼ ḍạṅge, alekha mạ̃ṛĩkoge, ar hoṛko do mạ̃ṛĩreko hãṛãgokʼ kana.

⁴ Noako do uni kusmbiyakʼ aema utạr loṭghuṭi iạte hoyokʼkana; uni doe cemkecʼgea are bukʼlạuicʼ era kana. Uni do acʼakʼ loṭghuṭi iạte jạt jạtrenkoe ạkhrińetʼkoa; ar disạm disạmrenko do acʼakʼ muhnite.

⁵ Phạdkoren Probhu Isore meneda, “E Niniwi, iń do am upạrteń teṅgo akana; amakʼ mẽtʼãhã hạbicʼ kicricʼ iń rakabtama. Amakʼ uluṅ do jạt jạtrenkoń ńel ocokoa ar rajosṭiren do amakʼ lajaoakʼtetʼge.

⁶ Iń do am cetanre jońjalkoń capatʼ lạthiạuama, ar hirkhạ mẽtʼteń ńelmea ar landha dhutʼicʼ hoṛiń hoyocomea.

⁷ Am ńelte hoṛ do mẽtʼãhãko ạcurtakoa arko mena, ‘Niniwi do maraoena, ar ona lạgitʼ do okoeye homor halaṅa?’ Am lạgitʼ jiwi rakʼṛecʼicʼ do okareń ńamea?”

⁸ E Niniwi, am do cetʼ Na-aman khon hõm bhagegea? Uni do nil gaḍa aṛereye tahẽkana ar uni beṛhaete do dakʼ tahẽkana. Gaḍa do uniyakʼ rurukhiyạ bhitge tahẽkana.

⁹ Kus ar Misor do asambheṛ daṛekin emaekan tahẽkana; uniren gateko modre Puṭ ar Libia hõkin tahẽkana.

¹⁰ Enhõ uniren hoṛko do bondikate eṭakʼ disạmteko idi ocolena. Mitʼke mitʼ dobạṭiạkore uniren gidrạ doko tawakʼ gocʼ ocolena. Uniren manotan hoṛko do gulibãṭkate sikṛite tolkateko bondi idi ocolena.

¹¹ E Niniwi, am hõ bul bhuteṛkatem kunḍlạṅ hapekokʼa; ar bạiriko khon okokʼ lạgitʼ asrayem sendrajoṅa.

¹² Amakʼ sanam gaṛko do bele jote perecʼ loa dare leka; jãhãege onae rukui uniyakʼ mocarege ona do ńurokʼa.

¹³ Amren lạṛhại phạdko do jotoge maejiuko leka kanako. Amakʼ disạm reakʼ phaṭok duạrko do amren bạiriko samaṅre jhicʼge menakʼa; ar seṅgel do onako reakʼ duạr-sikṛikoe jeretʼ giḍiakada.

¹⁴ Gherao okte lạgitʼ dakʼ do rakapʼkate dohokakʼme, ar amakʼ gaṛko daṛeanakʼ hoeocoyme. Hasa do lebetʼ khadbadaome; cun ar gitil mesalkate iṭạ tearme.

¹⁵ Seṅgel do onḍe ame jommea; ar tarwaṛe doe samakʼmea ar jarkharetʼkan pohoko lekae marao utạrmea. Am do makʼraokan ar jhãke jhãk pohoko leka lekhate saṅge idikʼme.

¹⁶ Amren bạnij beparkoakʼ lekha do sermaren ipilko khon hõ ḍherem saṅge akatʼkoa, menkhan onko do makʼraokan pohoko leka urkateko uḍạu calaoena.

¹⁷ Amren hohorhoko ar kạmiyạko do jhãke jhãk pohoko lekage, one onko do rabaṅ dinre bhit cetanreko duṛupʼ tahenkan ar siń candoe rakapʼlen khan doko uḍạu calakʼkan, ar okateko calakʼkana ona do celege bako baḍaea.

¹⁸ E Ạsurren raj, amren mukhiyạ doko jạpitʼ joṅkana; ar amren rajren kạmiyạko doko giticʼ akana. Amren hoṛko do burureko pasnao akana, ar onko jarwako lạgitʼ do celege bạnukʼkoa.

¹⁹ Jãhãnakʼ cetʼtege amakʼ ghao do baṅ bogekʼkana; ente amakʼ ghạl do maraṅgea. Okoe amakʼ khoborko ańjomakatʼ onko mimitʼko do amakʼ ńutumte tiko thayoyeda, ente amakʼ bin mucạtʼ dusṭạmire do okoe hale bae paṛao akana?