Nạhum 2 - সান্তালী বাইবেল

Niniwi dhaṅdhaserokʼ reaṅ

¹ E Niniwi, okoeṭakʼ hoṛ doe chiṭiạu giḍikakʼkan uni do am upạrteye hijukʼkana. Pạcri gaṛko cetanre amren lạṛhại phạdko sapṛaokom, ar ḍahar horhoeme, ḍanḍa paṭhe keṭejokʼme ar lạṛhại phạdko jarwakom.

² Dhaṅ dhakʼserko do Israelko ujạṛ akadere hõ ar uniyakʼ darkha bagwanko marao akatʼtaere hõ Probhu Isor do ńit hõe Jakobren kangea, metakʼme uni do Israelakʼ lahateakʼ ṭhonoke ruạṛkataea.

³ Bạiri ar lạṛhại phạdkoakʼ ḍhal do arakʼgea ar lạṛhạikoakʼ kicricʼ hõ jeṅgetʼ arakʼgea. Onko do lạṛhại lạgitʼko jarwa akana; onkoakʼ mẽṛhẽtʼ reakʼ rãt gạḍiko do jhak jhakaokʼ kana; ar onko do borlomko hurlạyeda;

⁴ Onkoakʼ sanam rãt gạḍiko do hor horte hoe bharḍo leka calakʼkana ar nagraha reakʼ phaelao jaegako talate baṅ sambṛaoicʼ leka hante natekʼkana. Onako do ńelokʼte jolokʼkan mosal leka; ar bijli leka ńir baṛae kana.

⁵ Raj do acʼren subedarkoe hohoakokana; arko tohotʼ bhindạṛokʼ kanrehõ onko doko laha idikʼ kana; ar nagraha reakʼ bhit ṭhenko ńir calakʼkana; onko do bhit rạpud reakʼ jontroko bạisạueda.

⁶ Gaḍako reakʼ phaṭok duạrko do jhicʼena ar raj oṛakʼ do maraokʼkana.

⁷ Rạniyakʼ kicricʼko do otoṛ giḍikʼkante uni doe bondi idi ocokʼkana Uniren kạ̃ṛmĩko do potam lekako rakʼetʼkana ar koṛamko ceṭagokʼkana.

⁸ Niniwi do phoṛ akatʼ mitʼṭecʼ pukhri leka one ona reakʼ dakʼko ạtu oḍokokʼkan. Onko do “Teṅgokʼpe, teṅgokʼpe” menteko hohoyetʼkana menkhan uniren hoṛ do celege tayom secʼ bako beṅgetʼ ạcureda.

⁹ Uniyakʼ rupạ luṭtaepe, ar sona hõ luṭ joṅpe. Noako jinis do asambheṛgea; noako do uniyakʼ murạiko reakʼ dhon kana.

¹⁰ Uni doe luṭ ocokʼkana, are eken ti ocokʼkana are marao ocokʼkana. Uniren hoṛkoakʼ ontor do norom akana, ar gunṭhi do lakaṛ lukuṛokʼkantakoa; onkoakʼ ḍanḍare daṛe do bạnukʼa, onko mimitʼkoakʼ mẽtʼãhã do mulin akantakoa.

¹¹ Onko dhạcri kulkoakʼ dander ńitokʼ do okare menakʼa, one okare akoren hoponko nunuako kan tahẽkan, ar onḍe dhạcri kul ar kul eṅga do hoponko salakʼ khạtirjomako tahẽkana?

¹² Dhạcri kul do acʼren hoponko lạgitʼ janware gocʼetʼko tahẽkana ar acʼren kul eṅga lạgitʼ hõe limbạtʼ gocʼetʼko tahẽkana; uni doe gocʼ akawan janwarte acʼakʼ oṛakʼ are or cirạ akatʼko janwarte acʼakʼ dandere perecʼetʼ tahẽkana.

¹³ Phạdkoren Probhu Isore meneda, “E Niniwi, iń do am upạrte; amakʼ rãt gạḍikoń jeretʼ giḍikakʼa, ar tarwaṛe do amren dhạcri kulkoe jomkoa. Iń do amren sikạr lạgitʼ celege noa dhạrtire bạń doho oṭokakoa. Ar amren sombat emokʼkoakʼ aṛaṅ hõ ar baṅ ańjomokʼtakoa.”