Mikạ 6 - সান্তালী বাইবেল

Israel upạrte Probhu Isorakʼ katha

¹ E Israel, Probhu Isorakʼ katha ańjomme. Uniye meneda, “E Mikạ, am do teṅgokʼme ar buru-ḍuṅgri samaṅre amakʼ mambla sodorme; amakʼ oka mementeakʼ menakʼtam ona do burukoko ańjomma.”

² E buru-ḍuṅgriko, ape do Probhu Isorakʼ aroj ańjompe; E dhạrti reakʼ jaejug rehetʼko apehõ ańjompe. Noa reakʼ karon do uniren hoṛko upạrte Probhu Isorakʼ mementeakʼ menakʼtaea; uni do Israelko upạrte mitʼṭecʼe mambla akada.

³ Probhu Isore meneda, “E ińren hoṛko, iń do apeakʼ cetʼ iń ceka akada? Ar oka lekate ape do kosṭoń em akatʼpea? Ma roṛ ruạṛạńpe.

⁴ Iń do Misor disạm khoniń oḍok ạgu akatʼpea, ar golam khoniń chaḍao akatʼpea. Ape goṛowape lạgitʼte Mose, Aron ar Mạriạm tekoń kolletʼkoa.

⁵ E ińren hoṛko, Moab raj Balak okae goṭaletʼ ar Beor hopon Biliam okae roṛ ruạṛletʼ ona baṛe hudiskate ńelpe. Siṭim khon Gilgol hạbicʼ apeakʼ calakʼ reakʼ katha disạipe jemon ape do ińiń kạmiletʼakʼ bańcaokʼ reakʼ kathape baḍae daṛeakʼ.”

⁶ Iń do cetʼkoante Probhu Isor samaṅreń hijukʼa ar coṭren Isor samaṅreń omagokʼa? Iń do cetʼ jeredokʼ samaṅokʼakʼ lạgitʼ mitʼ bochor umerren mĩhũkoante uni samaṅreń hijukʼa?

⁷ Probhu do cetʼ hajar hajar bheḍakoteye kusikʼa, uni do cetʼ sunumte perecʼ gaḍakoe bạsutakʼa? Ińakʼ ghạṭko ńutumte iń do cetʼ ińren pạhil janamicʼ hoponiń emaea, ińakʼ kại gunạkʼte cetʼ ińakʼ kukhi reakʼ jogeń samaṅaea?

⁸ E manwa, okaṭakʼ bhageakʼkan ona ma coṅ udukʼ akawatʼme. Hok reakʼem kạmi, dayam dulạṛ ar amren Isor tulucʼ nindhạntem taṛam chaḍa Probhu Isor do ar cetʼhõ coṅ am ṭhen khon ma bae khojkan.

Jerusalem reakʼ behok ar ona reakʼ sạjại

⁹ Ạkilan hoṛ do Probhu Isorko botoraekana. Ma ańjompe, Probhu Isor do nagraharen hoṛkoe hohoako kana. Uni doe meneda, “Ape do sạjại reakʼ ṭheṅga secʼ ar okoe do onae niṭ akatʼ uni secʼ moneyakʼpe.

¹⁰ Bedhorom hoṛkoakʼ oṛakʼre bedhoromte ńamakʼ dhon ar ṭhokako reakʼ sosoṅakʼ doń hirkhạwakʼ kana.

¹¹ Okoeko hoṛ ṭhen ṭhokako reakʼ tulạ ar ojonte kom reakʼ baṭkhara menakʼ uni do cetʼ bin dusạn menteń hudis daṛekea?

¹² Aperen kisạ̃ṛ hoṛko doko sasantaogea, ar ape hõpe ekʼṛegea ar apeakʼ moca hõ phạsiạragetapea.

¹³ Ar onatege iń do apeakʼ ghạṭ iạte bạṛicʼ sạjạiyiń sạjạipea ariń marao utạrpea.

¹⁴ Ape dope jomgea menkhan bape bikʼa; lacʼre reṅgecʼ do tahengetapea. Apeakʼ jinisko mitʼ ṭhạ̃i khon eṭakʼ ṭhạ̃itepe idiygea menkhan cetʼge bape rukhiyạ daṛeakʼa, ar thoṛape rukhiyạ daṛeakʼ khan hõ ona do lạṛhạiteń marao giḍikatapea.

¹⁵ Itạpe eragea menkhan phosol do bape getʼ rakapʼ daṛeakʼa; ape do jạitun jope lelena menkhan ona reakʼ sunum do bape beohar daṛeakʼa, ar darkha len katehõ ona reakʼ rasa hõ bape ńũ daṛeakʼa.

¹⁶ Ape do Omri reakʼ niạmkope manaoetʼ kana ar Ahab bõsrenkoakʼ hewa lekape calakʼkana. Ona iạte iń do maraope reakʼ ti ar landa dhutʼape reakʼ tiregeń jimạkapea; ar ińren hoṛkoakʼ henostagepe gokʼ baṛaea”